ލަންޑަން (ނޮވެމްބަރު 5) - ޔޫރޮޕާ ލީގުގެ ރޭގެ މެޗުތަކަށް ފަހު އިންގްލެންޑްގެ ވެސްޓް ހޭމް ޔުނައިޓެޑާއި ފްރާންސްގެ ލިޔޯން އަދި ޖަރުމަނުގެ އެއިންޓްރަކްޓް ފްރޭންކްފާޓުން ބާކީ ދެ މެޗު އޮއްވައި މުބާރާތުގެ ގަދަ 16 ޓީމުގެ ބުރުގެ ޖާގަ ޔަގީންކޮށްފި އެވެ.
ރޭގެ ނަތީޖާތަކަށް ބަލާއިރު، ބެލްޖިއަމްގެ ގެންކާ ދެކޮޅަށް ކުޅެ ވެސްޓް ހޭމް އެއްވަރުވީ 2-2 އިންނެވެ. ލިޔޯނުން ވަނީ އަމިއްލަ ދަނޑުގައި ޗެކް ރިޕަބްލިކްގެ ސްޕާޓާ ޕްރާގު 3-0 އިން ބަލިކޮށްފަ އެވެ. އަދި ގްރީސްގެ އޮލިމްޕިއާކޯސް ދަނޑުގައި ފްރޭންކްފާޓް މޮޅުވީ 2-1 އިންނެވެ.
ވެސްޓް ހޭމްގެ ކޯޗު ޑޭވިޑް މޮއިސްގެ ކޯޗިން ކެރިއަރުގެ 1000 ވަނަ މެޗުގައި ލީޑުނެގީ ގެންކުންނެވެ. މެޗުގެ ހަތަރު ވަނަ މިނިޓްގައި ގެންކްގެ ޔޯސެޕް ޕެއިންޓްސިލް ވަނީ ގެންކަަށް ލީޑުނަގައިދީފަ އެވެ. ވެސްޓް ހޭމް ކޮޅަށް ނަތީޖާ އަނބުރާލީ އަލްޖީރިއާގެ ވިންގް ސައީދް ބެންރަހްމާގެ ދެ ގޯލުންނެެވެ. އެކަމަކު، މެޗުގެ ފަހު ކޮޅުގައި ވެސްޓް ހޭމްގެ ތޯމަސް ސޫޝެކް އަތުން ބައިކޮޅަށް ގޯލެއް ވަދެ މެޗު ނިމުނީ އެއްވަރު ވެގެންނެވެ.
ގްރޫޕް އެޗްގެ އެއް ވަނައިގައި ވެސްޓް ހޭމް އޮތީ މެޗަކުން ބަލިނުވެ ހަތަރު މެޗުން 10 ޕޮއިންޓް ހޯދައިގެންނެވެ. ދެ ވަނައިގައި ކްރޮއޭޝިއާގެ ޑިނަމޯ ޒަގްރެބް އޮތީ ހަތަރު މެޗުން ހަ ޕޮއިިންޓް ހޯދައިގެންނެވެ. ތިނެއްގައި އޮތް ގެންކަށް ހަތަރު މެޗުން ހަތަރު ޕޮއިންޓް ލިބިފައިވާއިރު، އެންމެ ފުލުގައި އޮތް އޮސްޓްރިއާގެ ރެޕިޑް ވިއޭނާ އަށް ވަނީ ހަތަރު މެޗުން ތިން ޕޮއިންޓް ލިބިފަ އެވެ.
އިންގްލެންޑްގެ ލެސްޓާ ސިޓީ ވަނީ ރޭ އަމިއްލަ ދަނޑުގައި ސްޕާޓާ މޮސްކޯއާ 1-1 އިން އެއްވަރުވެފަ އެވެ. ލެސްޓާ މޮޅުކޮށްދޭން ޖޭމީ ވާޑީ އަށް ލިބުނު ރަނުގެ ފުރުސަތުން އޭނާ ޖެހި ޕެނަލްޓީ ވަނީ ސްޕާޓާގެ ކީޕަރު އަލެކްސަންޑަ ސެލިކޯފް މަތަކޮށްފަ އެވެ. ބާކީ ދެ މެޗު އޮތްއިރު، ލެސްޓާ އޮތީ ނަޕޯލީ އާއި ލެހިއާ ވޯސޯ ފަހަތުން ގްރޫޕް ސީގެ ތިން ވަނައިގަ އެވެ.
ސްޕާޓާ ޕްރާގް ކޮޅަށް ލިޔޯންގެ ތިން ގޯލުގެ ތެރެއިން ދެ ގޯލު ޖެހީ އަލްޖީރިއާގެ ފޯވާޑް އިސްލާމް ސްލިމާނީ އެވެ. އަނެއް ގޯލު ޖެހީ ކާލް ޓޯލޯ އެކަމްބީ އެވެ.
ލިޔޯން، ގްރޫޕް އޭގެ އެއް ވަނައިގައި އޮތީ ކުޅުނު ހަތަރު މެޗުން ވެސް މޮޅުވެ 12 ޕޮއިންޓާ އެކު އެވެ. ދެން އޮތް ތިން ޓީމު ވެސް ހަތަރު މެޗު ކުޅެފައިވާއިރު، ދެ ވަނައިގައި އޮތް ސްޕާޓާ އާއި ތިނެއްގައި އޮތް ރޭންޖާސް އަށް ވަނީ ހަތަރު ޕޮއިންޓް ލިބިފަ އެވެ. އަދި ހަތަރެއްގައި އޮތް ބްރޮންޑްބީ އަށް ލިބިފައިވަނީ ތިން ޕޮއިންޓެވެ.
ޔޫސެފް އެލް އަރާބީގެ ގޯލުން އޮލިމްޕިއާކޯސް ލީޑުނަގާފައިވަނިކޮށް ފްރޭންކްފާޓް މޮޅުވީ ފަހަތުން އަރަ އެވެ. ފްރޭންކްފާޓަށް އެއްވަރުކޮށްދިނީ ޑައިޗީ ކަމާޑާ އެވެ. އަނެއް ގޯލު ޖެހީ ބަދަލެއްގެ ގޮތުގައި އެރި ޔެންސް ޕީޓާ ހޯގާ އެވެ.
ގްރޫޕް ޑީގެ އެއް ވަނައިގައި ފްރޭންކްފާޓް އޮތީ ހަތަރު މެޗުން 10 ޕޮއިންޓާ އެކު އެވެ. ދެ ވަނައިގައި އޮތީ ހަތަރު މެޗުން ހަ ޕޮއިންޓާ އެކު އޮލިމްޕިއާކޯސް އެވެ. ތިން ވަނައިގައި އޮތް ފެނަބާޗޭ އަށް ހަތަރު މެޗުން ފަސް ޕޮއިންޓް ލިބިފައިވާއިރު، އެންމެ ފުލުގައި އޮތް ބެލްޖިއަމްގެ އެންޓްވާޕަށް ހަތަރު މެޗުން ލިބިފައިވަނީ އެންމެ ޕޮއިންޓެކެވެ.
