ބާސެލޯނާ (20 އޮކްޓޫބަރު) - ޗެމްޕިއަންސް ލީގުގެ ދެ ވަނަ ބުރަށް ދިއުމަށް ބާސެލޯނާ އިން ކުރާ އުންމީދުތައް ދެމެހެއްޓޭނީ، މި މުބާރާތުގައި މިރޭ ޑައިނަމޯ ކިއޭވްއާ ދެކޮޅަށް ކުޅޭ މެޗުން މޮޅުވެގެން ކަމަށް ބާސެލޯނާގެ ކޯޗު ރޮނާލްޑް ކޫމަން ބުނެފި އެވެ.
ޗެމްޕިއަންސް ލީގުގައި މިހާތަނަށް ކުޅުނު ދެ މެޗުގައި ބަޔާން މިއުނިކާއި ބެންފީކާ އަތުން ބަލިވެ، ބާސެލޯނާ އޮތީ ގުރޫޕް އީގެ ފުލުގަ އެވެ. މި މުބާރާތުގައި ބާސެލޯނާ އަށް ދެން އޮތީ ޑައިނަމޯ ކިއޭވްއާ ދެކޮޅަށް ކުޅޭ ދެ މެޗެވެ. ޑައިނަމޯ ކިއޭވްއާ ދެކޮޅަށް ބާސެލޯނާ މިރޭ ނުކުންނާނީ އަމިއްލަ ދަނޑުގަ އެވެ.
ޗެމްޕިއަންސް ލީގުގެ ގުރޫޕް ސްޓޭޖުން ބާސެލޯނާ އެންމެ ފަހުން ކެޓީ މީގެ 21 އަހަރު ކުރިންނެވެ.
މެޗުގެ ކުރިން އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ކޫމަން ބުނީ ޗެމްޕިއަންސް ލީގުގެ ދެ ވަނަ ބުރުގެ އުންމީދެއް ބާސެލޯނާ އަށް އޮތީ މިރޭގެ މެޗުން މޮޅުވެގެން ކަމަށެވެ.
"މާދަމާ (މިރޭ) ބާސެލޯނާ ނުކުންނާނީ ޗެމްޕިއަންްސް ލީގުގައި ކުރިއަށް ދިއުމަށް އޮތް ފުރުސަތު ދަމަހައްޓަން،" ކޫމަން ބުންޏެވެ.
"ފުރަތަމަ ދެ މެޗުން ބަލިވުމުން، އަހަރަމެންނަށް މި މެޗުން މޮޅުވުން ނޫން ގޮތެއް ނެތް."
ބާސެލޯނާ އާއި ޑައިނަމޯ ކިއޭވް ކުޅޭ މެޗު ފަށާނީ ރާއްޖެ ގަޑިން މިރޭ 12 ޖަހާއިރު އެވެ.
ފާޓީއާ މެދު ބޮޑު އުއްމީދެއް
އަނިޔާގެ ސަބަބުން ކުޅުމާ ދުރުގައި 11 މަސް ދުވަސް ހޭދަކުރުމަށް ފަހު، އަންސޫ ފާޓީ އެނބުރި ދަނޑަށް ނުކުތުމާއެކު ބާސެލޯނާގެ ސަޕޯޓަރުންގެ އުންމީދުތައް ވަނީ އާވެފަ އެވެ. އަނިޔާ އިން ރަނގަޅުވުމަށް ފަހު ކުޅުނު ފުރަތަމަ މެޗުގައި ފާޓީ ވަނީ ލެވަންޓޭ ކޮޅަށް މިދިޔަ މަހު ލަނޑު ޖަހައިފަ އެވެ. އަދި ސްޕެނިޝް ލީގުގައި އާދިއްތަ ދުވަހު ވެލެންސިއާ އަތުން ބާސެލޯނާ މޮޅުވި މެޗުގައި ވެސް އޭނާ ލަނޑުޖެހި އެވެ.
މި ސީޒަންގެ ނިޔަލަށް ފާޓީގެ ކޮންޓްރެކްޓް ހަމަވާއިރު، އޭނާ އެހެން ކްލަބަކަށް ބަދަލުވާނެ ކަމުގެ އަޑުތަކެއް ވެސް ވަނީ ފެތުރިފަ އެވެ. އެކަމަކު ކޫމަން ބުނީ ފާޓީގެ ކޮންޓުރެކްޓް އާކުރާނެކަމުގެ އުންމީދު ބޮޑު ކަމަށެވެ.
"އަހަންނަށް އެނގޭ ކަމަކީ ފާޓީގެ ކޮންޓުރެކްޓް އާކުރުމުގެ މަޝްވަރާތައް މިހާރު ގާތްގަނޑަކަށް ނިމިފައިވާކަން. މިއީ ވަރަށް މުހިންމު ހަބަރެއް. ފާޓީ އަކީ މި ކްލަބުގެ މުސްތަގްބަލް ބައްޓަންކުރާނެ ފެންވަރުހުރި ކުޅުންތެރިއެއް،" ކޫމަން ބުންޏެވެ. -- އޭއެފްޕީ
