ކޮވިޑް-19ގެ ސަބަބުން ޓްރެއިނިންތައް ކުރިއަށްގެންދިއުމާއި އެހެނިހެން ގޮތްގޮތުން ހުރި ގޮންޖެހުންތަކުގެ ޝަކުވާކުރަން އޭނާ ބޭނުންނުވާ ކަމަށް ކްލަބް ގްރީން ސްޓްރީޓްސްގެ ކޯޗު އަލީ ނިސްތާރު މުހައްމަދު ބުނެފި އެވެ.
ކޮވިޑް ކޭސްތައް ގިނަވާތީ ހަރުކަށި ގައިޑްލައިންތަކެއްގެ ތެރެއިން ފުޓްބޯޅަ ކުޅެން ފުރުސަތު ދީފައިވާއިރު، ރަނގަޅަށް ޕްރެކްޓިސް ސެޝަންތައް ކުރިއަށްގެންދަން އެކި އުނދަގޫތަކާ ވަނީ ކުރިމަތިވެފަ އެވެ. އޭގެ ތެރެއިން ސަބަބެއް ކަމަށް ބައެއް ކޯޗުން ފާހަގަކުރާ އެއް ކަމަކީ ހާފް ޕިޗެއްގައި ޕްރެކްޓިސް ކުރަން ޖެހުމެވެ.
ނިސްތާރު ބުނީ ކޮވިޑަކީ މުޅި ދުނިޔެ އަށް ކުރިމަތިވެފައިވާ ކަމެއް ކަމަށާއި އެހެންވެ އޭގެތެރޭގައި އުޅޭއިރު ކަންކަން ކުރަން އުނދަގޫތަކެއް ހުންނާނެކަން އެނގޭ ކަމަށެވެ.
"އެއީ އަޅުގަނޑުމެންނަށް ސީޒަން ފެށުނުއިރު ވެސް އެނގޭ ކަންކަން މި ކަހަލަ ގޮތަކަށް ކަން ކަންކަން ހުންނާނީ. މިހާރު ހާފް ޕިޗްގައި ޓްރެއިން ކުރުމަކީ މިހާރު އެކްސްކިއުޒަކަށް (ޝަކުވާ އަކަށް) ނުނެގޭ ކަމަކީ ފުލް ޕިޗް ބޭނުންވީމަ ލިބޭ. އެއީ ހެނދުނު ޕްރެކްޓިސް ކުރާ ކަމަށްވާނަމަ ބޭނުންކުރެވިދާނެ. ފުލް ޕިޗްގައި މުޅި ވީކްގައި އެއްވެސް ބައެއް ޓްރެއިން ނުކުރާނެ އެއީކީ އުނދަގުލެއް ނޫން. ކޮވިޑް މިއީ މުޅި ދުނިޔެ އަށް އޮތް ކަމެއް. އެހެންވީމަ އުނދަގޫތަކެއް ހުންނާނެ،" ނިސްތާރު ބުންޏެވެ.
ލީގުގައި އެންމެ ފަހުން ގްރީން ސްޓްރީޓްސް ކުޅުނު މެޗުން ވަނީ ދަ ގްރާންޑޭ އަތުން މޮޅުވެފަ އެވެ. އެކަމަކު އެ ޓީމު ވަނީ ފުރަތަމަ ބުރުގައި މުހައްމަދު ޝާޒްލީ (ޝާޒް)ގެ ކޯޗުކަމުގައި އޭރު ކުޅުނު ޓީސީ އަތުން ބަލިވެފަ އެވެ. ނިސްތާރު ބުނީ ފުރަތަމަ ބުރުގެ މެޗުން ފިލާވަޅުނަގައި މި މެޗުގައި ކަންތައްތައް ރަނގަޅުކުރާނެ ކަމަށެވެ.
"މި އަހަރު އަޅުގަނޑުމެންނަށް ލަނޑު ދީފައި އިން އެއް ޓީމު (ޓީސީ އަކީ). އެހެންވީމަ އަޅުގަނޑު ދެކެނީ ވަރަށް އުނދަގޫ މެޗެއް ކަމަށް. ވަކި ޓީސީ އެއް ނޫން ކޮންމެ ޓީމަކާ ކުޅުނަސް އަޅުގަނޑުމެން ބައްޔެއް ބޭނުމެއް ނުވޭ ދެެން ވެވުނު ހުރިހާ ތައްޔާރީއެއް ވާނަން،" ނިސްތާރު ބުންޏެވެ.
މި ވަގުތު އަނިޔާގައި ހުރި ސްޕެއިންގެ މިޑްފީލްޑަރު އެންހެލް މުނޯޒަށް އަވަހަށް ކުޅެވޭނެ ކަމަށް ގަބޫލުނުކުރާ ކަމަށް ނިސްތާރު ބުންޏެވެ. އެކަމަކު ނިސްތާރަށް އޮތް ހިތްހަމަޖެހުމަކީ އެންމެ ފަހުން މެޗުގައި ބަދަލު ކުޅުންތެރިއެއްގެ ގޮތުގައި ކުޅެން އަރައި ލަނޑު ޖެހި މުހައްމަދު ރިސްވާން (ފުކޭ) ފިޓްވެފައިވުމެވެ.
ނިސްތާރު ބުނީ އަބަދުވެސް ޓީމެއް ކަނޑައަޅަނީ އެ މެޗަކަށް އެންމެ ރަނގަޅު ނަތީޖާއެއް ނެރެވޭނެ ކުޅުންތެރިންނަށް ބަލައިގެން ކަމަށެވެ.
ލީގުގެ ތިން ވަނައިގައި ގްރީން ސްޓްރީޓްސް އޮތީ 11 މެޗުން 17 ޕޮއިންޓް ހޯދައިގެންނެވެ. މިރޭ ޓީސީ ބަލިކޮށްގެން ގްރީން ސްޓްރީޓްސް އަށް ލީގުގެ ދެ ވަަނައިގައި އޮތް ވެލެންސިއާ އާއި އެއް ވަނައިގައި އޮތް މާޒިޔާއާ ދެމެދު ޕޮއިންޓުގެ ފަރަގު ކުޑަކުރެވޭނެ އެވެ. މާޒިޔާ އަށް 11 މެޗުން 25 ޕޮއިންޓް ލިބިފައިވާއިރު، ރޭ ސަސް އަތުން މޮޅުވި ވެލެންސިއާ ވަނީ 11 މެޗުން 21 ޕޮއިންޓް ހަމަކޮށްފަ އެވެ.
ޓީސީ އާއި ގްރީން ސްޓްރީޓްސް ކުޅޭ މެޗު ފަށާނީ މިރޭ 9 ޖަހާއިރު އެވެ.
