ރައީސްގެ ޕްރައިމަރީ ކެމްޕޭން ފޮޓޯއިން

އެމްޑީޕީގެ ރިޔާސީ ޕްރައިމަރީ މި މަހު 28 ވަނަ ދުވަހު ނިމިގެން ދިޔަ އިރު ދެ ކެންޑިޑޭޓުންގެ ފަރާތުން ތަފާތު ފޯރިގަދަ ކެމްޕެއިން ހަރަކާތްތަކެއް ފެނިގެންދިޔަ އެވެ. 'ފިކުރެއްގެ ދިރުން' ނަމުގައި ރައީސް ނަޝީދު ވަނީ ރައީސް ސޯލިހަށް ވުރެ ކުރިން ކެމްޕެއިން ފައްޓަވާފަ އެވެ. 'އެމްޑީޕީ ކުރިއަށް' ނަމުގައި ރައީސް ސޯލިހު ކެމްޕެއިން ފެއްޓެވީ އެމްޑީޕީ މައި ހަރުގޭގަ އެވެ.

ރައީސް ސޯލިހު ގެ ކެމްޕޭންގެ އެންމެ ފުރަތަމަ ޖަލްސާ ޖަނަވަރީ 4 ގައި އެމްޑީޕީ މައި ހަރުގޭގައި ބޭއްވި އެވެ. ކުރީ ސަފުގައި އެމަނިކުފާނުގެ ކެމްޕެއިން މެނޭޖަރ ނާޝިޒް، ފޮރިން މިނިސްޓަރ އަބްދުﷲ ޝާހިދު، ޑިފެންސް މިނިސްޓަރ މާރިޔާ ދީދީ ފަދަ ކެބިނެޓުގެ ނުފޫޒުގަދަ މިނިސްޓަރުން ތިއްބެވި އެވެ. އަދި، އެ މަނިކުފާނަށް ތާއީދު ކުރައްވާ ގިނަ އަދަދެއްގެ ބަޔަކު އެ ސަރަހައްދަށް ޖަމާވި އެވެ.

ފުރަތަމަ ކެމްޕޭން ޖަލްސާގައި ފެނިގެންދިޔަ ޖޯޝާއި ފޯރި ވެގެންދިޔައީ މުޅި ކެމްޕޭން އޭގެ މައްޗަށް ބިނާ ވެގެންދިޔަ ކަމަކަށެެވެ.

ފުރަތަމަ ޖަލްސާއަށް ފަހު ރައީސް ސޯލިހް ރާއްޖެތެރޭގެ ރަށްރަށަށް ދަތުރުފުޅުތައް ފެއްޓެވި އެވެ. އުތުރުން ދެކުނަށް، ގިނަ ރަށްރަށަށް ދަތުރުކުރެއްވި އިރު ހުރިހާ ރަަށަކުން ވެސް ރައީސަށް ދެންނެވީ ވަރަށް ހޫނު މަރުހަބާއެކެވެ. ބައެއް ރަށްރަށުގައި ދޮރުން ދޮރަށް ހިންގެވި އެވެ. ބައެއް ރަށްރަށުގައި ޖަލްސާ ބޭއްވި އެވެ. ދަރުތުތަކުގެ މެދުތެރެއިން ބްރޭކެއް ނަންގަވާ ރައީސް މާލޭގައި މަޑުކުރައްވާ ދުވަސްތަކުގައި ވެސް އުޅުއްވީ މާލޭގައި ކެމްޕޭން ކުރެއްވުމުގަ އެވެ.

މާލޭގައި ރައީސް ސޯލިހު ދޮރުން ދޮރަށް ހިންގަވަައި އެމްޑީޕީގެ މެމްބަރުންގެ ތާއިދު އިތުރުކުރެއްވުމަށް ގިނަ މަސައްކަތްތަކެއް ކުރެއްވި އެވެ.

އެމްޑީޕީގެ މެމްބަރުންގެ އަރިހަށް ގޮސް ތާއިދު އިތުރުކުރެއްވުމަށް އެމަނިކުފާނު މަސައްކަތްޕުޅު ކުރެއްވި އެވެ. އަދި، މެމްބަރުންގެ ކަންބޮޑުވުންތައް އައްސަވައި އެކަންކަމަށް ހައްލު ހޯއްދަވާނެ ކަމަށް ވިދާޅުވި އެވެ.

މާލެއަށްވުރެ ބޮޑަށް ކުދި ރަށްރަށަށް ބޮޑަށް ފޯކަސް ކުރިތަން ކެމްޕެއިންއިން ފެނުނެވެ. ނަމަވެސް، ރައީސް ސޯލިހަށް މާލޭގައި އޮތް ތަރުހީބު ކުޑަނޫންކަން ދެން ފެނުނީ، އާޓިފިޝަލް ބީޗުގައި ބޭއްވި ރައީސްގެ ކެމްޕެއިންގެ ބޮޑު ޖަލްސާ އިންނެވެ.

މުޅި އާޓިފިޝަލް ބީޗް ސަރަހައްދު ފުރިފައިއޮތް މި ޖަލްސާގައި ރައީސް ސޯލިހަށް ތާއީދު ކުރައްވާ ގިނަ މަޖިލިސް މެމްބަރުންނާއި، ކެބިނެޓްގެ ވަޒީރުންނާއި ބައިވެރިވެފައިވެ އެވެ. އަދި އޭގެތެރެއިން ބައެއް ބޭފުޅުން ޖަލްސާގައި ވާހަކަ ވެސް ދެއްކެވި އެވެ.

މި ޖަލްސާއަށް ފަހު ރާއްޖޭގެ ދެކުނަށް ދަތުރުކުރައްވަން ފެއްޓެވި އެވެ. ހުވަދޫ، ފުވައްމުލަށް އަދި އައްޑޫއަށް ދަތުރުކުރެއްވުމަށް ފަހު، ކެމްޕެއިން ނިންމާލުމުގެ ޖަލްސާ ގިނަ އަދަދެއްގެ ބަޔަކާއި އެކު އައްޑޫގައި ބޭއްވުމަށް ފަހު މާލެ ވަޑައިގަތެވެ.

ފޯރިގަދަ ކެމްޕޭނަކަށް ފަހު ރައީސް ސޯލިހު އިންތިހާބު ކާމިޔާބު ކުރެއްްވީ 61 ޕަސެންޓު އެމްޑީޕީ މެމްބަރުންގެ ތާއިދާއެކު އެވެ. ސެޕްޓެމްބަރުގެ އިންތިހާބުގައި އެމްޑީޕީގެ ޓިކެޓުގައި ވާދަކުރައްވާނީ އެމަނިކުފާނެވެ.