ފޮޓޯ ސްޓޯރީ: އޭދަފުށީ މީހުން މާއްޑޫ ކާށި ހޮވުން

މާލޭގައި އުޅޭ މީހަކަށް ރާއްޖެތެރޭ ރަށަކަށްގޮސް ގޭގައި މަޑު މަޑުން އޮތުމަކީ އުނދަގޫ ކަމެކެވެ. ހަމަ އެގޮތަށް ހުދު އަހަންނަށްވެސް ރަށަކަށް ގޮސް ގޭގައި އޮތުމަކީ އެއީ ނުވާނެ ކަމެކެވެ. އެންމެ ފަހުން އޮފީސް ދަތުރެއްގައި އޭދަފުއްޓަށް ގޮސް ރަށުުތެރެ ބަލާލަން ނުކުމެލީމެވެ. ކޮނޑުގައި ކެމެރާ އަޅުވައިން ސައިކަލަށް އަރައިގެން ރަށް ވަށާ ދުއްވަނިކޮށް ބަނދަރުމަތިން ފެނުނީ ތަފާތު މަންޒަރެކެވެ. ބޮޑު ކާށި ފުންޏެކެވެ. އެ ކާށިތައް ބެހުމުގެ މަސައްކަތުގައި ހައެއް މީހުން ހަރަކާތްތެރި ވަމުން ދިޔަ އެވެ.

އެ ކާށި ފުންޏަކީ އޭދަފުއްޓާ ވަރަށް ކައިރީގައި އޮންނަ މާއްޑޫއިން ހޮވައިގެން ގެނެސްފައިވާ ކާއްޓެވެ. މާއްޑޫގައި މީގެ ބައިގަރުނު ކުރިން މީހުން ވެސް ދިރިއުޅުނެވެ. އެ ރަށުން ކާށި ހޮވަން ދެވެނީ އޭދަފުށީ ކައުންސިލުން ހަދައިފައިވާ އުސޫލުތަކަކާ އެއްގޮތަށް ހުއްދަ ނަގައިގެނެވެ.

ހޮވައިގެން ގެނެސްފައިވާ ކާށިތައް ބައިބަޔަށް އެޅުމުގައި މީހަކު ހަރަކާތްތެރި ވަމުން ދަނީ އެވެ.

މާއްޑޫން ކާށި ހޮވުމުގެ ހުއްދަ ކައުންސިލުން ދޫކުރަނީ މަހަކު ދެ ފަހަރު އެވެ. އެއީ ފޯމު ލާ ތަރުތީބުންނެވެ. އެގޮތުން ކޮންމެ ހޮނިހިރު ދުވަހަކު ކާށި ހޮވަން ދާން ހުއްދަ ދޭއިރު، ދެވޭނީ މަދުވެގެން 5 މީހުންގެ ޓީމަކަށެވެ. ހުއްދަ ދޫކުރާ ވަގުތުގެ ތެރޭގައި ކާށި ހޮވައިގެން އެނބުރު އަންނަންޖެހެ އެވެ.

ހޮވައިގެން ގެންނަ ކާށިތައް ބަހަންޖެހޭ ގޮތުގެ އުސޫލުތަކެއްވެސް އޮންނަ ވާހަކަ އެ ރަށުން ވާހަކަ ދެއްކި މީހުން ކިޔައިދިނެވެ. ކާށިތައް ރަށަށް ގެނެސް އެ ހޮވި މީހުންނަށް ބައި އަޅާއިރު ކައުންސިލަށް ވެސް ބައި އަޅަންޖެހެ އެވެ. އެގޮތުން، ކުދި ކާށި ވަކި ކުރުމަށްފަހު ކާށި ހޮވަން ދިޔަ މީހުންނަށް އެރި ކާށީގެ ގޮތުގައި ކޮންމެ ހަތަރު ކާށިން އެއް ކާށި ލިބެ އެވެ. އަދި ކުދި ކާއްޓާއި ކުރޮޅިން އެރީގެ ގޮތުގައި ކޮންމެ ތިން ކާށިން ކާއްޓެއް، ކުރޮޅިއަކުން ކުރޮޅިއެއް ލިބޭނެ އެވެ. ހަމަ މި އުސޫލުން އެރީގެ ގޮތުގައި ދޯންޔަށް ވެސް ބައި އެޅެއެވެ.

ފޮޓޯ ސްޓޯރީ: އޭދަފުށީ މީހުން މާއްޑޫ ކާށި ހޮވުން

އެރީގެ ގޮތުގައި ނެގި ބަޔަށް ފަހު، ބާކީ ހުރި ކާއްޓަކީ ކައުންސިލްގެ ބަޔެވެ. އެއީ ރަށް ބަލަހައްޓާ ފަރާތުގެ ހައިސިއްޔަތުންނެވެ. ކައުންސިލަށް ލިބޭ ކާށި ވިއްކާނީ، ކާއްޓެއް 2ރ. ގެ ރޭޓުންނެވެ. ކުޑަ ކާއްޓެއް ރުފިޔާ އަށެވެ. އެންމެ ގިނަވެގެން ގެއަކަށް ވިއްކަނީ 15 ކާއްޓެވެ.

ހުއްދަ ނަގައިގެން މާއްޑޫއަށް ދާ ފަރާތްތަކަށް ދެވަނަ ފަހަރަށް ފޯމު ލެވޭނީ 6 މަސް ދުވަސް ފަހުންނެވެ. ކޮންމެ ހަފްތާއަކު ދަނީ އާ ބައެކެވެ.