ފޮޓޯ ސްޓޯރީ: ގދ. ތިނަދޫ "ބިޒީ" ބަނދަރު

ޒަމާނުއްސުރެ ގދ. ތިނަދޫއަކީ ހުވަދު އަތޮޅުގެ ރަށްރަށުގެ މީހުން އެކި ކަންކަމުގައި ވަރަށް ގިނައިން އަންނަ ނުވަތަ އަންނަން މަޖުބޫރު ވެފައި އޮތް ރަށެކެވެ. ކުޑަދަރިފުޅު ގޮވައިން ޑޮކްޓަރަށް ދައްކަން އައުމުން ފެށިގެން ވިޔަފާރި ދަތުރުތަކާއި ގޭގައި ބޭނުންކުރާ ސާމާނު ގަންނަން މި ރަށަށް އައި ހަނދާން ހުވަދު އަތޮޅު އެހެން ރަށްރަށުގެ މީހުންގެ ފިލައި ނުދާނެ އެވެ.

އެކި ރަށްރަށުން ހަފްތާއެއްގެ ތެރޭގައި އެތައް ސަތޭކަ ބަޔަކު ތިނަދޫއަށް އާދެއެވެ. އެމްޓީސީސީ ފެރީގެ ދަތުރު ގދ.ގެ ރަށްރަށުންނާއި ގއ.ގެ ރަށްރަށުން ކޮންމެ ދުވަހަކު އޮންނަ އިރު، އެންމެ ފަހު މަންޒިލަކަށް ބަނދަރުކުރަނީ ތިނަދޫގަ އެވެ. ހަމަ އެ ދުވަހު އަނބުރާ އެ ރަށްތަކަށް ފެރީދެ އެވެ. އެމްޓީސީސީ ފެރީއަކީ މި ދެ އަތޮޅުގެ މީހުންނަށް ލިބުނު ދިރުމެކެވެ.

ފެރީގެ އިތުރުން ދެން އެންމެ ގިނައިން ތިނަދޫ ބަނދަރުން ފެންނަނިީ އެކި ރަށްރަށުންނާއި ރިސޯޓުތަކުން އަންނަ ލޯންޗުފަހަރެވެ. ތެޔޮ އެޅުމަށާއި ޝެޑިއުލް ދަތުރުކުރާ ލޯންޗެވެ. ތިނަދުއާއި ކައިރީގައި އެއާޕޯޓް އޮތުމުގެ ސަބަބުން ގިނަ ރިސޯޓު ލޯންޗުތައް އެންމެ ގިނައިން ޓްރާންސިޓް ވަނީ ތިނަދޫ ބަނދަރުގައެވެ.

ފެރީއެއް ނުވަތަ ލޯންޗެއް ބަނދަރަށް ކައިރި ކުރާ ވަގުތު އެއީ ކުއްލިޔަކަށް ހަލަބޮލި ކަމެއް އުފެދިގެންދާ ވަގުތެކެވެ. ފޮށި ތަންމަތި ހިފައިގެން ތިބޭ މީހުންނާއި ޓެކްސީ ޑްރައިވަރުންނެވެ. ޑޮކްޓަރަށް ދައްކަން ދަރިންނާއި މުސްކުޅި މައިންބަފައިން ގޮވައިން އަންނަ މީހުން ދަރިން އުރުގައި ޖަހައިގެންނެވެ. މަންމަ ގޮނޑީގައި ބައިންދައިންނެވެ.

އެންމެން ރަށުތެރެއަށް އަރައި ބަނދަރުމަތި އަމާންވުމުން ދެން އޮންނާނީ ތެޔޮ އެޅުމާއި ފެރީ ފުރަން ތައްޔާރުކުރުމާއި މުދާ ބަރުކުރުމެވެ. ވިޔަފާރިވެރިން ރަށަށް ގެންދަންޖެހޭ އެކި އެކި ސާމާނު ފެރީއަށް އެރުވުމެވެ. ބޮޑު މާސިންގާ ފޮށިގަނޑުތަކުން ފެށިގެންގޮސް އެންމެ ކުޑަ ކޮތަޅުވެސް ފެރީތަކަށް ލައެވެ. ނޫނީ ފެރީގެ ކްރޫއަކާ ހަވާލުކުރެއެވެ.

އެ މީހަކު އައި ބޭނުން އެ ދުވަހު ނިމިއްޖެނަމަ މެންދުރުފަހު ފެރީއިން މީހުން ރަށްރަށަށް ދެއެވެ. އަދި ބައެއްފަހަރު ދަތުރުގެ މަގްސަދު އެންމެ ފުރިހަމައަށް ހާސިލް ނުވިޔަސް ގިނަ މީހުން ދުވަހުން ދުވަހަށް އެނބުރި ރަށަށް ދެއެވެ.

މެންދުރު ފަހު 2:00 އާއ 3:00 އާ ދެމެދު ބަނދަރުމަތި އަނެއްކާ ވެސް ހަލަބޮލިވެ، މީހުން ހޭލަމޭލަ ވާން ފަށައެވެ. ލޯންޗުތަކާއި ފެރީތައް އަނބުރާ ރަށަށް ދާށެވެ. މިއީ ކޮންމެ ދުވަހަކު ކަހަލަ ގޮތަކަށް ތިނަދޫ ބަނދަރުގެ މާހައުލު އޮންނަ ގޮތެވެ.