ޔޫރޯ 2020: ގަދަ 16 ބުރުގެ ޓީމުތައް

އޮސްޓްރިއާ: އޮސްޓްރިއާ ދެ ވަނަ ބުރުން ފުރުސަތު ހޯދީ ގްރޫޕް ސީގެ ދެ ވަނަ ޓީމުގެ ގޮތުގައި. މި ފަހަރުގެ މުބާރާތަކީ ޔޫރޯއެއްގައި އޮސްޓްރިއާ މެޗަކުން މޮޅުވި ފުރަތަމަ ފަހަރު. އޮސްޓްރިއާ ވަނީ ގްރޫޕް ސްޓޭޖުގެ ދެ މެޗުން ނޯތު މެސެޑޯނިއާ އާއި ޔޫކްރެއިން ބަލިކޮށްފައި.-- ފޮޓޯ: އޭއެފްޕީ

ބެލްޖިއަމް: ދުނިޔޭގެ ރޭންކިންގެ އެއް ވަނައިގައި އޮތް ބެލްޖިއަމުން މި ފަހަރުގެ ޔޫރޯ އަށް ކޮލިފައިވީ ކޮލިފައިން ގްރޫޕް ހުރިހާ މެޗަކުން މޮޅުވެގެން. ބެލްޖިއަމް މުބާރާތުގެ ދެ ވަނަ ބުރުން ފުރުސަތު ހޯދީ މުބާރާތުގެ ގްރޫޕް ސްޓޭޖުގެ ތިން މެޗުން މޮޅުވެގެން.-- ފޮޓޯ: އޭއެފްޕީ

ޕޯޗުގަލް: އެންމެ ފަހުގެ ޗެމްޕިއަން ޕޯޗުގަލް އަނެއް ބުރުން ފުުރުސަތު ހޯދީ އެންމެ ރަނގަޅު ނަތީޖާ ނެރޭ ތިން ވަނަ ޓީމުތަކުގެ ތެރެއިން. މިއީ އެންމެ ރަނގަޅު ނަތީޖާ ނެރޭ ތިން ވަނަ ޓީމުތަކުގެ ތެރެއިން ޕޯޗުގަލް ޖެހިޖެހިގެން ޔޫރޯ ދެ ވަނަ ބުރަށް ހޮވުނު ފުރަތަމަ ފަަހަރު. ޕޯޗުގަލް އިން 2016 ވަނަ އަހަރުގެ ޔޫރޯ ކާމިޔާބުކުރިއިރު ވެސް ގްރޫޕް ސްޓޭޖުން ލިބުނީ ތިން ވަނަ.--- ފޮޓޯ: އޭއެފްޕީ

ފްރާންސް: އެންމެ ފަހުން 2018 ވަނަ އަހަރުގެ ފީފާ ވޯލްޑް ކަޕްގެ ޗެމްޕިއަންކަން ހޯދި ފްރާންސް އިން ޔޫރޯ ދެ ވަނަ ބުރުގެ ފުރުސަތު ހޯދީ މަރުގެ ގްރޫޕްގެ އެއް ވަނަ ޓީމުގެ ގޮތުގައި. ގްރޫޕް ސްޓޭޖުން ފްރާންސް ވަނީ ޖަރުމަނު ބަލިކޮށް ޕޯޗުގަލް އާއި ހަންގޭރީއާ އެއްވަރުވެފައި.-- ފޮޓޯ: އޭއެފްޕީ

ސްވިޒަލެންޑް: މި ފަހަރުގެ ޔޫރޯގައި ސްވިޒަލެންޑް ވާދަކުރި ގްރޫޕުން އެ ޓީމު ދިޔައީ ތިން ވަނަ. އެ ޓީމު ދެ ވަނަ ބުރުން ފުރުސަތު ހޯދީ އެންމެ ރަނގަޅު ނަތީޖާ ނެރޭ ތިން ވަނަ ޓީމުތަކުގެ ރޭންކިންގެ ތެރެއިން ތިން ވަނަ ހޯދައިގެން.-- ފޮޓޯ: އޭއެފްޕީ

ކްރޮއޭޝިއާ: ކްރޮއޭޝިއާ މި ފަހަރު ޔޫރޯގެ ދެ ވަނަ ބުރުން ފުރުސަތު ހޯދީ ވާދަކުރި ގްރޫޕްގެ ދެ ވަނަ ޓީމުގެ ގޮތުގައި. ކްރޮއޭޝިއާ ގްރޫޕްގެ ފުރަތަމަ މެޗުން އިންގްލެންޑް އަތުން ބަލިވެ، ދެ ވަނަ މެޗުގައި ޗެކް ރިޕަބްލިކާ އެއްވަރުވިއިރު، ފަހު މެޗުން ވަނީ ސްކޮޓްލެންޑް ބަލިކޮށްފައި.-- ފޮޓޯ: އޭއެފްޕީ

ސްޕެއިން: ޔޫރަޕްގެ ޗެމްޕިއަންކަން ތިން ފަހަރު ހޯދި ސްޕެއިން މި ފަހަރުގެ މުބާރާތުގައި ފުރަތަމަ ކުޅުނު ދެ މެޗުން ސްވިޑެން އާއި ޕޮލެންޑާ ދެކޮޅަށް ކުޅެގެން ވީ އެއްވަރު. ފަހު މެޗުން ސްލޮވާކިއާ އަތުން ހޯދި ރެކޯޑް މޮޅާ އެކު ސްޕެއިން ދެ ވަނަ ބުރުން ފުރުސަތު ހޯދީ ގްރޫޕްގެ ދެ ވަނަ ޓީމުގެ ގޮތުގައި.-- ފޮޓޯ: އޭއެފްޕީ

ސްވިޑެން: ސްވިޑެން އިން ވަނީ ގްރޫޕް ފުރަތަމަ މެޗުގައި ސްޕެއިންއާ އެއްވަރުވި ނަމަވެސް ދެން ކުޅުނު ދެ މެޗުން ސްލޮވާކިއާ އާއި ޕޮލެންޑް ބަލިކޮށްފައި. ގްރޫޕް އެއް ވަނަ ޓީމުގެ ގޮތުގައި ސްވިޑެން ދެ ވަނަ ބުރުން ފުރުސަތު ހޯދިއިރު، މިއީ ފާއިތުވި 17 އަހަރު ތެރޭ ސްވިޑެން މި މުބާރާތުގެ ނޮކައުޓް ބުރުގައި ކުޅޭ ފުރަތަމަ ފަަހަރު.-- ފޮޓޯ: އޭއެފްޕީ

ޔޫކްރެއިން: ޔޫކްރެއިން އަކީ ގްރޫޕް ސްޓޭޖުގެ ހުރިހާ މެޗެއް ނިމުމުން އަނެއް ބުރުން ފުރުސަތު ލިބުނު ޓީމު. ޔޫކްރެއިން ދިޔައީ ވާދަކުރި ގްރޫޕްގެ ތިން ވަނަ. ޔޫކްރެއިން ދެ ވަނަ ބުރަށް ހޮވުނީ އެންމެ ރަނގަޅު ނަތީޖާ ނެރޭ ތިން ވަނަ ޓީމުތަކުގެ ތެރެއިން. މިއީ ޔޫކްރެއިންގެ ނަމުގައި ކުޅެން ފެށި ފަހުން ޔޫރޯއެއްގެ ނޮކައުޓް ބުރުގައި އެ ޓީމު ކުޅޭނެ ފުރަތަމަ ފަހަރު.-- ފޮޓޯ: އޭއެފްޕީ

އިންގްލެންޑް: އިންގްލެންޑުން ގްރޫޕްގެ އެއް ވަނައިގެ ގޮތުގައި ގަދަ 16 ޓީމުގެ ބުރުން ފުރުސަތު ހޯދިއިރު، އެ ޓީމުން ޖެހީ އެންމެ ދެ ގޯލު. މިއީ ޔޫރޯ ތާރީހުގައި ގްރޫޕްގެ އެއް ވަނައިގެ ގޮތުގައި އެންމެ މަދުން ގޯލު ޖަހައިގެން އަނެއް ބުރުން ޓީމެއް ފުރުސަތު ހޯދި ފުރަތަމަ ފަހަރު. އިންގްލެންޑަކީ މި ފަހަރުގެ ޔޫރޯގައި ބައިކޮޅަށް ގޯލެއް ނުވަދެ އޮތް ދެ ޓީމުގެ ތެެރެއިން އެއް ޓީމު.-- ފޮޓޯ: އޭއެފްޕީ

ޖަރުމަނު: ޖަރުމަނުން މި ފަހަރުގެ ޔޫރޯގެ ދެ ވަނަ ބުރުން ފުރުސަތު ހޯދީ މަރުގެ ގްރޫޕްގެ ދެ ވަނަ ޓީމުގެ ގޮތުގައި ފުރަތަމަ މެޗުން ފްރާންސް އަތުން ބަލިވި ނަމަވެސް ދެ ވަަނަ މެޗުން ޕޯޗުގަލް އަތުން ބޮޑު މޮޅެއް ހޯދި. އެކަމަކު ފަހު މެޗުގައި ހަންގޭރީ އަތުން ޕޮއިންޓެއް ހޯދުނީ ފަހު ވަގުތު ޖެހި ގޯލަކުން.-- ފޮޓޯ: އޭއެފްޕީ

ނެދަލެންޑްސް: ނެދަލެންޑްސް އަކީ ގްރޫޕް ސްޓޭޖުގައި ފުރިހަމަ ރެކޯޑަކާ އެކު މި ފަހަރުގެ ޔޫރޯ ދެ ވަނަ ބުރުން ފުރުސަތު ހޯދި ތިން ޓީމުގެ ތެރެއިން އެއް ޓީމު. އެންމެ ފަހުން ޔޫރޯ އަށް ކޮލިފައިނުވި ނެދަލެންޑްސް ވަނީ މި ފަހަރުގެ މުބާރާތުގައި މޮޅު ކުޅުމެއް ދައްކާފައި. އެ ޓީމުން އެންމެ ފަހުން ޔޫރޯ ނޮކައުޓް ބުރުގައި ކުޅުނީ 2008 ވަނަ އަހަރު.-- ފޮޓޯ: އޭއެފްޕީ

ޗެކް ރިޕަބްލިކް: ޗެކް ރިޕަބްލިކް ނޮކައުޓް ބުރުން ފުރުސަތު ހޯދީ ގްރޫޕްގެ ތިން ވަނަ ޓީމުގެ ގޮތުގައި ނިންމައި އެންމެ ރަނގަޅު ނަތީޖާ ނެރޭ ތިން ވަނަ އަށް ދާ ޓީމުތަކުގެ ރޭންކިން އަށް ބަލާއިރު ދެ ވަނަ ލިބޭތީ. އެ ޓީމު އެންމެ ފަހުން ނޮކައުޓް ބުރުގައި ކުޅުނީ 2012 ވަނަ އަހަރުގެ މުބާރާތުގައި.-- ފޮޓޯ: އޭއެފްޕީ

ވޭލްސް: މުޅިން އަލަށް 2016 ވަަނަ އަހަރު ޔޫރޯގައި ވާދަކޮށް ސެމީ ފައިނަލަށް ދަތުރުކުރި ވޭލްސް މި ފަހަރުގެ މުބާރާތުގެ ދެ ވަނަ ބުރުން ފުރުސަތު ހޯދީ ގްރޫޕް އޭގެ ދެ ވަނަ ޓީމުގެ ގޮތުގައި. ވޭލްސް ފުރަތަމަ މެޗުން ސްވިޒަލެންޑާ އެއްވަރުވި ނަމަވެސް ދެ ވަނަ މެޗުން ވަނީ ތުރުކީ އަތުން މޮޅުވެފައި. ފަހު މެޗުގައި އިޓަލީ އަތުން ވީ ބަލި.-- ފޮޓޯ: އޭއެފްޕީ

ޑެންމާކް: ޑެންމާކަކީ ޔޫރޯ ތާރީހުގައި ފުރަތަމަ ދެ މެޗުން ބަލިވުމަށް ފަހު ގްރޫޕްގެ ފަހު މެޗުން މޮޅުވެގެން ގަދަ ދެ ޓީމުގެ ތެރެއިން ނޮކައުޓް ބުރަށް ކޮލިފައިވި ފުރަތަމަ ޓީމު. ޑެންމާކް ފުރަތަމަ ދެ މެޗުން ބަލިވީ ފިންލެންޑާއި ބެލްޖިއަމް އަތުން އެކަމަކު ފަހު މެޗުގައި ވަނީ ރަޝިއާ އަތުން ބޮޑު މޮޅެއް ހޯދާފައި.-- ފޮޓޯ: އޭއެފްޕީ

އިޓަލީ: މުބާރާތުގެ ދެ ވަނަ ބުރުން އިޓަލީ ފުރުސަތު ހޯދީ ގްރޫޕް އޭގެ އެއް ވަނަ ޓީމުގެ ގޮތުގައި. އެ ޓީމުން ވަނީ ގްރޫޕް ސްޓޭޖުގެ ތިން މެޗުން ބައިކޮޅަށް ގޯލެއް ނުވަދެ މޮޅުވެފައި. އިޓަލީ އަކީ މި ފަަހަރުގެ މުބާރާތުގެ ފޭވަރިޓް. އެ ޓީމު އެންމެ ފަހުން މެޗަކުން ބަލިވެފައިވަނީ 2018 ވަަނަ އަހަރު.-- ފޮޓޯ: އޭއެފްޕީ