ލިކުއިފައިޑް ނެޗުރަލް ގޭސް (އެލްއެންޖީ) އުފައްދާ ދުނިޔޭގެ އެންމެ ބޮޑު ކުންފުނި، ގަތަރު އެނަޖީ އަށް އިރާނުން ހަމަލާދިނުމުން އެ ފެކްޓަރީއިން ގޭސް އުފެއްދުން ހުއްޓާލައިފި އެވެ.

ގަތަރު އެނަޖީއިން ގޭސް އުފެއްދުން ހުއްޓާލުމާއެކު ގޭހުގެ އަގު ވަނީ 50 ޕަސެންޓު އުފުލިފަ އެވެ. ފެކްޓަރީގެ މަސައްކަތް އަލުން ފަށާނެ ދުވަހެއް ގަތަރުގެ ސަރުކާރުން ހިންގާ ގަތަރު އެނަޖީއަކުން އަދި ނުބުނެ އެވެ.

އަލްޖަޒީރާ އިން ބުނީ ގަތަރު އެނަޖީއަށް ހަމަލާ ދިނީ އިރާނުގެ ދެ ޑްރޯންއަކުން ކަމަށެވެ. ޑްރޯންއަކީ މީހުން ނުލައި، ދުއްވުމުގެ ގާބިލްކަން ހުރި، މަތިންދާބޯޓެވެ.

އިޒްރޭލާއި އެމެރިކާ ގުޅިގެން އިރާނަށް ހަމަލާދޭން ފެށީ މިދިޔަ ހޮނިހިރު ދުވަހެވެ. އޭގެ ފަހުން އިޒްރޭލުން ވަނީ އިރާނުގެ ސުޕްރީމް ލީޑަރު ހާމަނާއީ އަވަހާރަކޮށްލައިފަ އެވެ. ބަދަލުގައި އިރާނުން ހަމަލާދޭން ފެށީ އެމެރިކާއިން އަސްކަރީ ބޭސްތައް ހަދައިގެން އުޅޭ އިރާނާ އަވައްޓެރި ގައުމުތަކަށެވެ.

މިހާތަނަށް އިރާނުން ވަނީ ގަތަރުގެ އިތުރުން، ކުވެއިތާއި އޮމާން އާއި ޔޫއޭއީ އާއި އުރުދުންއަށް ހަމަލާތަކެއް ދީފަ އެވެ. އެންމެ ވަރުގަދަ ހަމަލާތަކެއް ދިނީ ޔޫއޭއީއަށެވެ. އެ ގައުމުގައި އެމެރިކާގެ ސިފައިންގެ ބަޔަކު ތިބި ހޮޓަލަކަށް ވެސް އިރާނުން ހަމަލާދިނެވެ.

ހަމަލާތައް ދިނުމުގެ ކުރިން އިރާނުން އާންމު ކުރި މެސެޖެއްގައި އަރަބި ގައުމުތަކަށް މުހާތަބުކޮށް ބުނީ، އިރާނުން ހަމަލާދެނީ އެމެރިކާގެ ބޭސްތަކަށް ކަމަށެވެ. އަދި އެއީ އެގައުމަށް ދޭ ހަމަލާއެއްގެ ގޮތުގައި ނުބެލުމަށް ވެސް އިރާނުން ގޮވައިލި އެވެ.