ބިންވެރިޔާ ސްކީމުގެ ދަށުން ގޯތި ދޫކުރުމަށްޓަކައި ހިއްކަމުން އަންނަ ގިރާވަރުފަޅު ހިއްކައި ނިންމަން ރައީސް މުހައްމަދު މުއިއްޒު ދެއްވި ތާރީހުގައި އެ ތަން ހިއްކައި ނިންމޭ ގޮތެއް ނުވި އެވެ.

ނޮވެމްބަރު 25، 2025، ގައި އެކްސްގައި ކުރެއްވި ޕޯސްޓެއްގައި މުއިއްޒު ވިދާޅުވީ ކުރިއަށް އޮތް ދޭއް ނުވަތަ ތިން މަސްދުވަހުގެ ތެރޭގައި ގިރާވަރުފަޅު އެއްކޮށް ހިއްކައި ނިންމައިލެވޭނެ ކަމަށެވެ.

ގިރާވަރުފަޅު ހިއްކަން ރައީސް ދެއްވި ސުންގަޑި ހަމަވާނީ މާދަމާއަށެވެ. އެކަމަކު، މިދިޔަ ބުރާސްފަތި ދުވަހު ސެޓެލައިޓުން ނަގާފައިވާ ފޮޓޯތަކުން ފެންނަ ގޮތުގައި ގިރާވަރުފަޅުގެ އެންމެ ފުން ސަރަހައްދު އަދިވެސް އޮތީ ނުހިއްކަ އެވެ.

އޭގެ އިތުރުން، ލޭންޑް ޔޫސް ޕްލޭނަށް ބަދަލު ގެނެސް އަލުން ގޯތީގެ ގުރު ނެގުމަށްފަހު ރަޖިސްޓްރީ ހަވާލު ކުރަން ފަށާނެ ކަމަށް ވެސް ސަރުކާރުން އޮތީ ބުނެފަ އެވެ. ގިރާވަރުފަޅުގެ ގުރު ނެގީ ޖެނުއަރީ 31، ގަ އެވެ. އެކަމަކު އަދިވެސް ގޯތީގެ ރަޖިސްޓްރީ ހަވާލު ކުރަން ނުފަށަ އެވެ.

ގިރާވަރުފަޅާއެކު ހުޅުމާލެ ފޭސް ތިނެއް ހިއްކުމުގެ މަސައްކަތް ވެސް ސަރުކާރުން ފެށި އެވެ. އެ ތަން ވަނީ ހިއްކައި ނިންމައިފަ އެވެ. އެ ތަންތަން ހިއްކަން ފެށީ ލޯކަލް ކައުންސިލުގެ އިންތިހާބާ ދިމާކޮށެވެ.

ގިރާވަރުފަޅުން ހިއްކަނީ 219 ހެކްޓަރެވެ. އެއީ މި ސަރުކާރުން އެ ޕްރޮޖެކްޓަށް އިތުރު ކުރި 50 ހެކްޓަރު ހިމަނައިގެންނެވެ. ގިރާވަރުފަޅު ހިއްކައި ނިމުމުން އެ ރަށުން 4072 ގޯތި ދޫކުރަން ވަނީ ހަމަޖެހިފަ އެވެ. އެއީ މުޅިން ވެސް ބިންވެރިޔާ ސްކީމުގެ ދަށުން ދޫކޮށްފައި ހުރި ގޯތިތަކެވެ.