ސާފް ފުޓްސަލް ޗެމްޕިއަންޝިޕްގެ ލީގު ބުރުގައި ރާއްޖޭން ކުޅުނު ފަހު މެޗުން ސްރީ ލަންކާ އަތުން 5-2 އިން ކާމިޔާބުކޮށް، ރާއްޖޭން ހުރިހާ މެޗަކުން މޮޅުވެ، ސައްތަ އިން ސައްތަ ރެކޯޑަކާ ޗެމްޕިއަންކަން ހޯދައި މުބާރާތް ނިންމާލައިފި އެވެ.

ރާއްޖޭން މި ފަހަރުގެ ސާފް ފުޓްސަލް ޗެމްޕިއަންޝިޕްގައި، ކުުޅުނު ފުރަތަމަ ތިން މެޗުން ވެސް މޮޅުވީ ފަރަގު ބޮޑުކޮށެެވެ. އެ ގޮތުން، ފުރަތަމަ މެޗުގައި ޕާކިސްތާން އަތުން 7-1 އިން މޮޅުވިއިރު، ދެ ވަނަ މެޗުގައި ބަންގްލަދޭޝް އަތުން 6-1 އިން މޮޅުވި އެވެ. އަދި، ތިން ވަނަ މެޗުގައި، 5-0 އިން އިންޑިއާ ބަލިކޮށް، ވާދަކުރާ ހުރިހާ ޓީމަކަށް ބޮޑު މެސެޖެއް ދިނެވެ.

އެކަމަކު ފަހުން ކުޅުނު ތިން މެޗުގައި، ރާއްޖެ ކައިރިން ނޭޕާލާއި ބޫޓާން އަދި ލަންކާ އިން ޑިފެންސިވްކޮށް ރަނގަޅު ކުޅުމެއް ދައްކައި، ރާއްޖެ އަށް އުނދަގޫތަކެއް ކުރިމަތިކުރި ނަމަވެސް އެ ދެ މެޗުން ވެސް ރާއްޖޭން ކުރިހޯދި އެވެ. ނޭޕާލް އަތުން 2-1 އިން އަދި، ބޫޓާންގެ މައްޗަށް 3-1 އިންނެވެ. އަދި، މިއަދު، ލަންކާ އަތުން 5-2 އިން ވަނީ މޮޅުވެ

ރާއްޖޭން މި މެޗަށް ނުކުތްއިރު ވެސް އޮތީ ފުރަތަމަ ފަސް މެޗުން މޮޅުވެގެން ބާކީ މެެޗެއް އޮއްވައި މުބާރާތުގެ ޗެމްޕިއަންކަން ޔަގީންކޮށްފަ އެވެ. މި މެޗަށް ނުކުތްއިރު، ރާއްޖެ އަށް ދިމާވެފައި އޮތް މައްސަލަ އަކީ، ދެ ކާޑު ހަމަވުމުގެ ސަބަބުން އަބްދުﷲ ޝާފިއު (ޝާއްޕެ) ސަސްޕެންޑްވެފައިވުމެވެ. ޝާއްޕެ ވަނީ ފުރަތަމަ ފަސް މެޗުގައި ވެސް ފަށާ ފަހެއްގައި ކުޅެފަ އެެވެ. ޝާއްޕެގެ ބަދަލުގައި އަބްދުﷲ ޖުނައިދު (ޖެންނޭ) އަށް ފުރަތަމަ ފަހަކުން ޖާގަ ދިންއިރު ރާއްޖޭން މި މެޗުގައި ކުޅުނީ ކީޕަރު ޒައިދާން އަހުމަދު (އަސޫ)ގެ ބަދަލުގައި އިބްރާހިމް ނާޖިހު (ހޭޓް) ލައިގެންނެވެ.

ހުއަމާކް އިންޑޯ ސްޓޭޑިއަމްގައި މިއަދު ކުޅުނު މެޗުގައި، ރާއްޖެ ކައިރީގައި ރަނގަޅަށް ޑިފެންސްކޮށްގެން ލަންކާ އިން ފެށި އެވެ. އެެހެން ނަަަމަަވެސް މެޗުގެ 12 ވަނަ މިނިޓްގައި، ރާއްޖޭގެ ކެޕްޓަން، މުހައްމަދު އިމްރާން (އިންމި) ވަނީ ގޯލެއް ޖަހައި ލީޑުނަގައިދީފަ އެވެ.

އެކަމަކު، ރާއްޖޭން ހެދި ގޯހެއްގެ ފައިދާނަގައި، މެޗުގެ 17 ވަނަ މިނިޓްގައި ލަންކާ އިން އެއްވަރުކުރި އެވެ. މި ލަނޑު އެ ޓީމަށް ޖަހައިދިނީ އާކިބް މުހައްމަދު ދިން ބޯޅައަކުން، މުހައްމަދު ތިލްހަމް އެވެ.

ފުރަތަމަ ހާފު ނިމެން ސިކުންތު ކޮޅަކަށް ވެފައިވަނިކޮށް، ރާއްޖެ އަށް ލީޑުނަގައިދިނީ ހުޒައިފަތު ރަޝީދު (ހުޒޭ) އެވެ. މިއީ، ކިކް އިންއެއްގައި ފެނުނު ކޮމްބިނޭޝަނަށް ކުޅުމަކުން އަހުމަދު ހަމީދު (އައްމަޑޭ) ހުސްކޮށްލާފައި ދިން ބޯޅައަކުން ހުޒޭ ޖެހި ލަނޑެކެވެ. އޭގެ ކުރިން ހުޒޭ ޖެހި ބޯޅައެއް އަދި ދެ ވަނަ ހާފުގެ ކުރީކޮޅުގައި ފޮނުވާލި ހަމަލާއެއް ވަނީ ދަނޑިއަށް އަމާޒުވެފަ އެވެ.

ދެ ވަނަ ހާފުގެ ހަ ވަނަ މިނިޓްގައި، ލަންކާ އަށް އެއްވަރުކޮށްދިން ލަނޑު ޖެހީ އޭރިއާބޭރުން މަތީ ކަނަށް ބޯޅަ އަމާޒުކޮށްލައިގެން އަމާން މުހައްމަދު ފައިޒާ އެވެ. އޭގެ ފަހުން، ހުޒޭ އަށް ލިބުނު ފުރުސަތެއްގައި ފޮނުވާލި ބޯޅަ ލަންކާގެ ކީޕަރު މުހައްމަދު ޝަރީފް ފުލައިލް ވަނީ މަތަކޮށްފަ އެވެ.

ރާއްޖޭން ނުވަ ވަނަ މިނިޓްގައި ލީޑުނެގީ އައްމަޑޭ ނެގި ބޯޅައެއް ހުއްޓުވަން އުޅުމުގެ ތެރޭގައި، އާކިބް އަތުން ބައިކޮޅަށް ވަން ގޯލުންނެވެ. އަދި، 14 ވަނަ މިނިޓްގައި، ހުސެއިން ސުހައިލް (ސޮކޭ) ވަނީ ރާއްޖޭގެ ހަތަރު ވަނަ ގޯލު ޖަހައިފަ އެވެ. ލިބުނު ފުރުސަތުގައި، ސޮކޭ ވަނީ ހަަމަޖެހިލައިގައި ގޯލަށް ބޯޅަ ފޮނުވާލައިފަ އެވެ.

މެޗުގެ 16 ވަނަ މިނިޓްގައި، އިންމި ވަނީ ރާއްޖޭގެ ފަސް ވަނަ ލަނޑު ޖަހައިފަ އެވެ. މިއީ، އަލީ ޝިޔާހު (ޝިޔަޅޭ) ދިން ބޯޅައަކުން އިންމި ޖެހި ލަނޑެކެވެ. މިއީ، މުބާރާތުގައި އެންމެ ގިނަ ގޯލު ޖެހި އިންމި ކާމިޔާބުކުރި ނުވަ ވަނަ ލަނޑެވެ.

ހާފުގެ މެދެއްހާ ހިސާބުން ރާއްޖޭގެ ކީޕަރު، ޒައިދާން ބޯޅައިގައި އަތްލުމުން ރެފްރީ ވަނީ އޭނާ އަށް ރަތް ކާޑެއް ދައްކައިފަ އެވެ.