މިހާރު ކުރިއަށްދާ ހިއުންޑާއި ގޯލްޑަން ފުޓްސަލް ޗެލެންޖުގެ ޒޯން 8، މާލެ ޒޯން ގައި ރޭ ކުޅުނު ފުރަތަމަ މެޗުތަކުން މައްޗަންގޯޅި އާއި ހުޅުމާލޭން މޮޅަކުން ފަށައިފި އެވެ.

މާލެ ޒޯނުގައި، ހަތަރު ޓީމުން ވާދަކުރާއިރު، މިދިޔަ އަހަރުގެ މި ޒޯނުގެ ޗެމްޕިއަން، ވިލިމާލޭ ކައިރިން ރޭ މައްޗަންގޯޅި މޮޅުވީ 4-3 އިންނެވެ. މި މެޗުގައި، މައްޗަންގޯޅީގެ ޔޫސުފް އަޔާން އާމިރު ދެ ލަނޑު ޖެހިއިރު، އަނެއް ލަނޑުތައް ޖެހީ، އަބްދުﷲ އާއިޝް އަލީ އާއި ރިލްވާން ވަހީދު (ރިލޭ) އެވެ. މި މެޗުގައި، ވިލިމާލޭގެ އަބްދުﷲ ސަމީހު މޫސާ (ސަމިއްޓެ) ދެ ގޯލު ޖެހިއިރު، އަނެއް ލަނޑު ޖެހީ އަބްދުﷲ ޝައްފާން (ޝާކާ) އެވެ.

މި ޒޯނުގައި ރޭ މާފަންނު ކައިރިން ހުޅުމާލޭން ކުރި ހޯދީ 1-0 އިންނެވެ. މި މެޗުގައި ހުޅުމާލޭގެ ހަމައެކަނި ލަނޑު ޖެހީ އަހުމަދު މަހުދީ އެވެ.

ޒޯން ހަތެއްގައި ޓީމުތަކުން ދެ ވަނަ މެޗު ކުޅުނުއިރު، ގްރޫޕް އޭގައި ވާދޫން ވަނީ 2-2 އިން ހިތަދޫއާ އެއްވަރުވެފަ އެވެ. އަދި ދަޑިމަގުން ވަނީ 3-1 އިން ގއ. ކަނޑުހުޅުދޫ އަތުން ބަލިވެފަ އެވެ. ވާދޫގެ މުހައްމަދު ނާއިލް އާއި އިބްރާހިމް ޝައުފު މުހައްމަދު ލަނޑުތައް ޖެހިއިރު، ހިތަދޫން ލަނޑުތައް ޖެހީ އީމާން ނަޒީރު އާއި ހާޒިމް ފައުޒީ އެވެ. ކަނޑުހުޅުދޫން ލަނޑުތައް ޖެހީ އަހުނަފް ޒާހިރު ދެ ގޯލާއި އަލީ އަޒްވާން އަބްދުލް އަޒީޒް އެވެ. ދަޑިމަގުގެ ހަމައެކަނި ލަނޑު ޖެހީ މުހައްމަދު ސާދު ނިޒާރު އެވެ.

މި ގްރޫޕްގެ އެއް ވަނައިގައި އޮތް ވާދޫ އާއި ދެ ވަނައިގައި އޮތް ހިތަދޫ އަށް ހަތަރު ޕޮއިންޓް ލިބިފައިވާއިރު، ތިން ވަނައިގައި އޮތް ކަނޑުުހުޅުދޫގެ އޮތީ ތިން ޕޮއިންޓެވެ. އަދި، ފުލުގައި އޮތް ދަޑިމަގު ވަނީ ދެ މެޗުން ވެސް ބަލިވެފަ އެވެ.

ގްރޫޕް ބީގައި އިއްޔެ ކުޅުނު މެޗުން މަރަދޫން ވަނީ 3-2 އިން ދެއްވަދޫ ބަލިކޮށްފަ އެެވެ. މަރަދޫގެ ލަނޑުތައް ޖެހީ، މުހައްމަދު ސަހާއު އަލީ ދެ ގޯލާއި ހުސެއިން އައިކް އެވެ. އަދި، ދެއްވަދޫން ލަނޑު ޖެހީ ޝިފާޒް އާދިލް އާއި ވިޝާހު އަބްދުލް މަޖީދު (ވިއްޓު) އެވެ. މި ގްރޫޕްގެ އެއް ވަނައިގައި އޮތް ދެއްވަދޫ އާއި ދެ ވަނައިގައި އޮތް މަރަދޫ އަށް ތިން ޕޮއިންޓް ލިބިފައިވާއިރު، ފުލުގައި އޮތް ހޯނޑެއްދޫ އަށް ޕޮއިންޓެއް ނުލިބެ އެވެ.

ޒޯން ފަހެއްގައި އިއްޔެ ކުޅުނު މެޗުން މަގޫދޫ އަތުން ދިއްގަރު ވަނީ އިސްމާއިލް ޒަޔާން ސުލައިމާން ޖެހި ގޯލުން 1-0 އިން މޮޅުވެފަ އެވެ. ޒޯން ހައެއްގައި ރޭ ކުޅުނު ދެ މެޗު ވެސް ނިމުނީ އެއްވަރުވެގެންނެވެ. މުބާރާތުގެ ދެ ޗެމްޕިއަނުން ކަމަށްވާ ތ. ތިމަރަފުއްޓާއި ލ. ގަމުން ކުޅުނު މެޗު 0-0 އިން އެއްވަރުވިއިރު، ލ. އިސްދޫ އާއި ތ. ކިނބިދޫގެ މެޗު ނިމުނީ 1-1 އިން އެއްވަރުވެގެންނެވެ. މުހައްމަދު ޝާފިއު، ކިނބިދޫ އަށް ލަނޑު ޖަހައިދިންއިރު، އިސްދޫގެ ލަނޑު ޖެހީ އަލީ ހުމޭޒު އެވެ. މި މެޗުން މޮޅުވާން ދެ ޓީމަށް ވެސް ފުރުސަތު ލިބުނުއިރު، ބޭނުމެއް ނުކުރެވުނެވެ.

ޒޯން ތިނެއްގައި، ބ. އަތޮޅު ޗެމްޕިއަން، އޭދަފުށިން ވަނީ، ކ. އަތޮޅުގެ ރަނަރަޕް، މާފުށި އަތުން، މުހައްމަދު ފާސިރު (ފާއްޓޭ) ޖެހި ގޯލުން 1-0 އިން މޮޅުވެފަ އެވެ. މި ގްރޫޕްގެ އަނެއް މެޗުގައި، ކ. އަތޮޅުގެ ޗެމްޕިއަން، ގާފަރުން ވަނީ 1-1 އިން ޅ. އަތޮޅުގެ ޗެމްޕިއަން، ކުރެންދޫއާ އެއްވަރުކޮށްފަ އެވެ. ކުރެންދޫގެ ލަނޑު ޖެހީ، އަލީ އިބްރާހިމް (އައްޔަ) އެވެ. ގާފަރުގެ ލަނޑު ޖެހީ ޝަނާން ރަޝާދު އެވެ.

ގޯލްޑަން ފުޓްސަލް ޗެލެންޖުގައި މިހާރު ކުރިއަށްދަނީ ޒޯން ބުރެވެ. މި ބުރުގައި، މިރޭ ހަ މެޗު ކުޅޭނެ އެވެ.

މިރޭގެ މެޗުތައް:

20:00: ޒޯން އެކެއް - ހއ. މާރަންދޫ - ހދ. ނޮޅިވަރަންފަރު

20:00: ޒޯން އެކެއް - ހދ. ނައިވާދޫ - ހއ. ކެލާ

21:00: ޒޯން ދޭއް - ށ. ކަނޑިތީމް - ނ. މާޅެންދޫ

21:00: ޒޯން ދޭއް - ށ. ފޯކައިދޫ - ރ. ދުވާފަރު

22:00: ޒޯން ހަތަރެއް - ވ. ކެޔޮދޫ - އއ. މަތިވެރި

22:00: ޒޯން ހަތަރެއް - އދ. އޮމަދޫ - އދ. މަހިބަދޫ