ސްޓެލްކޯގެ އެމްޑީކަމުން އަހްމަދު ޝަމާހު ރަޝީދު މިއަދު ވަކިކުރިތާ ގަޑިއިރުތަކެއް ފަހުން އެ ކުންފުނީގެ ޕްރޮކިއުމަންޓް ހެޑް، އަޒްހަދު ރަމީޒް ވެސް މަގާމުން ވަކިކޮށްފި އެވެ.

އަދަދު އަށް އެނގިފައިވާ ގޮތުގައި ސްޓެލްކޯގެ ހިންގުން ވަގުތީ ގޮތުން ހަވާލުވި ޑރ. އަލީ އަޒްވަރު ވަނީ އަޒްހަދު މަގާމުން ވަކިކޮށްފަ އެވެ.

އަޒްހަދުގެ ބަދަލުގައި ސްޓެލްކޯގެ ޕްރޮކިއުމަންޓްގެ ހިންގުން ވަގުތީ ގޮތުން ހަވާލުކޮށްފައިވަނީ ބިއުރޯ ހެޑް އަސްފާ ހުސައިންއާ އެވެ.

ޝަމާހް އާއި އަޒްހަދު މަގާމުން ވަކިކުރި ފަހުން ޝަމާހްގެ އޯޑިއޯއެއް ވަނީ ލީކުވެފަ އެވެ. އެ އޯޑިއޯގައި ޝަމާހު ވަނީ ސްޓެލްކޯގައި ހިންގާ ވައްކަންތައް އަޒުހަދަށް އެނގޭ ކަމަށް ވިދާޅުވެފަ އެވެ. އެއީ ސައްހަ އޯޑިއޯއެއްކަން މިހާތަނަށް ކަށަވަރެއް ނުވެ އެވެ.

ސްޓެލްކޯއާ 2015 ވަނަ އަހަރު ގުޅުނު އަޒްހަދު މި ސަރުކާރު ވެރިކަމަށް އައިއިރު ހުރީ ޕްރޮކިއުމަންޓް އޮފިސަރެއްގެ ގޮތުގަ އެވެ. ނަމަވެސް ސްޓެލްކޯގެ އެމްޑީއަކަށް ފަހުމީ ހަމަޖެއްސިފަހުން އޭނާއަށް ޕްރޮކިއުމަންޓް ހެޑްކަން ދިނެވެ.

ސްޓެލްކޯގެ އެމްޑީ މަގާމުން ވަކިކުރި ސަބަބެއް ސަރުކާރުން އަދި ޕީސީބީން ވެސް ހާމައެއް ނުކުރެ އެވެ. އޭގެއިތުރުން ޕްރޮކިއުމަންޓް ހެޑް ވަކިކުރި ސަބަބެއް ސްޓެލްކޯއިން ހާމައެއް ނުކުރެ އެވެ.

މި ސަރުކާރުގައި ސްޓެލްކޯގެ އެމްޑީއަކަށް އެންމެ ފުރަތަމަ އައްޔަންކުރީ ހުސައިން ފަހުމީ އެވެ. އޭނާ ވަކިކުރީ މިދިޔަ ސެޕްޓެމްބަރު 7، ގަ އެވެ. ފަހުމީގެ ބަދަލުގައި ޝަމާހު އައްޔަންކުރީ އެ ދުވަހު ކަމަށްވާއިރު، އޭނާ މަގާމުގައި ހޭދަވީ އެންމެ ހަތަރު މަހެވެ.