ސަތާރަ ވަނަ ގަރުނުގައި ޗައިނާގެ މިންގު ޑައިނާސްޓީގެ ރަސްކަމުގައި ފެނިގެން ދިޔަކަމެކެވެ. ގިނަ އަދަދެއްގެ ކެނަލްތަކާ ކިއްލާތައް ހެދުމުގެ މަސައްކަތްތައް ހަވާލުކުރެވުނީ ގާތް އެކުވެރިންނަށް، އެ މީހުންނަށް ފައިދާވާ ގޮތްގޮތަށެވެ. މަސައްކަތްތައް ދިޔައީ ނުނިމި ފުނިޖެހެމުންނެވެ. ހަރަދުތައް ދިޔައީ އިންތިހާއަށް އިތުރުވަމުންނެވެ. ރައްޔިތުންގެ ހާލަތު ދިޔައީ ބިކަވަމުންނެވެ. މިންގް ޑައިނާސްޓީގެ ނިމުން އައުމަށް މާގިނަ ދުވަހެއް އޭގެ ފަހުން ނުނަގައެވެ. އޭގެ ކުރިން މިންގް ޑައިނާސްޓީގައި އޮތީ ދުނިޔެއަށް ލާމަސީލު ސިވިލް ސަރވިސްގެ އޮނިގަނޑެއް ގާއިމުކުރެވިފައެވެ. ފަހުން ވަޒީފާތަކަށް ހޮވި މަސްއޫލިއްޔަތުތައް ހަވާލުކުރެވުނީ ގާތް ގުޅުން ހުރި ފަރާތްތަކާ ފައިސާދޭ ފަރާތްތަކަށެވެ. ކޮރަޕްޝަންގެ ސަބަބުން ވަރުގަދަ ރަސްކަމެއް ހަލާކުވެގެން ދިޔައެވެ.

އޭގެ ދެހާހެއްހާ އަހަރު ފަހަށް ބަލާލަން ހިނގާށެވެ. އިންޑޮނޭޝިޔާގެ ރައީސް ސުހާޓޯ އަކީ 1967 އިން 1998 އަށް ވެރިކަން ކުރެއްވި ބޭފުޅެކެވެ. ވެރިކަމުގެ ކުރީކޮޅުގައި މަގުބޫލު ލީޑަރެކެވެ. ނަމަވެސް އަހަރުތައް ފާއިތުވިހެން ފެނިގެންދިޔައީ މުޅި ސަރުކާރު ކޮރަޕްޝަންގެ ހާއްޔަކަށް ބަދަލުވެގެންދިޔަ ތަނެވެ. އެ ވެރިކަން ވެސް ނިމިގެން ދިޔައީ ރައްޔިތުންގެ ނުރުހުން ކޮޅުންލައިގެން ދިޔުމުންނެވެ.

2025 ގެ ރާއްޖެ އެވެ. ސަރުކާރަށް އަދި ދެ އަހަރެވެ. ރައްޔިތުންގެ ކަންބޮޑުވުން މިހާރުވެސް އިންތިހާއަށް ދާން ނުހަނު ގިނަ ސަބަބު ހާމައަށް ފެންނަން އެބަހުއްޓެވެ. އެންމެ ބޮޑު ކަމަކަށް މިވަގުތު އެންމެންވެސް ފާހަގަކުރަނީ އެއް ކަމެކެވެ. ކޮންޓްރެކްޓާ ފައިނޭންސްގެ ނަމުގައި ބޭންކް އޮފް މޯލްޑިވްސް މެދުވެރިކޮށް ސަރުކާރުން 2.7 ބިލިއަން ރުފިޔާ ބަހާލުމެވެ. މިއީ ކިހިނެއް ކުރެވުނު ކަމެއްތޯ، މީގެ ނަތީޖާއަކީ ކޮބައިތޯ، މިކަމާ އަޅުގަނޑުމެން ކޮންމެ ރައްޔިތެއްވެސް ކަންބޮޑުވަނީ އަދި ކަންބޮދުވާންވީ ކީއްވެތޯ؟

ސަރުކާރުން މިބުނާ ކޮންޓްރެކްޓަރ ފައިނޭންސް އަކީ ކޮބާ؟

• ސަރުކާރުން ކޮންޓްރެކްޓަރުންތަކަކަށް 2.7 ބިލިއަން ރުފިޔާގެ ޕްރޮޖެކްޓް އެވޯޑްކޮށް ބީއެމްއެލް މެދުވެރިކޮށް އެ ކޮންޓްރެކްޓަރުންނަށް ފައިސާ ދޫކުރުން
• ފަހުން ސަރުކާރުން އެ ފައިސާ ބީއެމްއެލް އަށް ދޭނެކަމަށް ބުނުން

މާނައަކީ، ސަރުކާރު ބަޖެޓުން ބޭރުން، ބީއެމްއެލްގެ ތެރެއިން ސަރުކާރުން ފައިސާ ޚަރަދުކުރުން. އަސްލު ކޮންޓްރެކްޓަރ ފައިނޭންސްއަކީ ކޮންޓްރެކްޓަރުގެ އަމިއްލަ ފައިސާގަ ޕްރޮޖެކްޓް އެއްކޮށް ނިންމުމުން ޕްރޮޖެކްޓް އެވޯޑްކުރި ފަރާތުން ކޮންޓްރެކްޓަރަށް ފައިސާ ދޫކުރުން.

ޕްރޮޖެކްޓްތައް އެވޯޑުކޮށްފަވަނީ ކިހިނެތް؟

އިއުލާނެއް ނުކޮށް ބިޑަކާ ނުލާ ޕްރޮޖެކްޓްތައް ވަނީ ސަރުކާރުން ބޭނުންވާ ބަޔަކަށް ބަހާލެވިފަ. މިކަމުގެ ސަބަބުން:

• ޕްރޮޖެކްޓްތަކުގެ އަސްލު އަގަށްވުރެ އެތައް ގުނައެއް އަގު ބޮޑުވުން
• މަސައްކަތްކުރުމުގެ ޤާބިލްކަން ނެތް ކުންފުނިތަކާ މަސައްކަތް ހަވާލުކުރެވި އެ މަސައްކަތްތައް ނުނިމުން

1. ޕްރޮޖެކްޓްތައް ދީފަވަނީ ސިޔާސީގޮތުން ސަރުކާރާ ގުޅިފަވާ ފަރާތްތަކަށް
2. ޕްރޮޖެކްޓްތައް ދީފަވަނީ އެމަސައްކަތް ކުރެވޭނެ ޤާބިލް ކުންފުނިތަކެއްތޯ ބެލުމެއް ނެތި
3. ޕްރޮޖެކްޓްތައް އެކުލަވާލާފަވަނީ މިވަގުތު ރައްޔިތުންނަށް އެންމެ ބޭނުންވެފަވާ ކަންކަމަށް ބެލުމެއް ނެތި

ބީއެމްއެލް އިން ކަންކޮށްފަވަނީ ކިހިނެއް؟

• ސިޔާސީ ބޭނުންތަކަށް ބީއެމްއެލްގަ ހުރި ފައިސާ ބޭނުންކުރަން ފެށުން
• ކޮންޓްރެކްޓަރުންތަކަކަށް ބޮޑެތި އަދަދުން ފައިސާ ދޫކުރާއިރު އެ ކުންފުނިތަކަކީ ކިހާވަރެއްގެ ދަރަނި އޮތް އެ މަސައްކަތް ކުރެވޭނެވަރުގެ ކުންފުނިތަކެއްތޯ ނުބަލާ
• ސަރުކާރުން އެ ފައިސާ ބީއެމްއެލް އަށް ނުދެވި ލަސްވެއްޖެނަމަ، ބީއެމްއެލްގެ ފައިދާ އާއި ކެޕިޓަލް ދަށްވާނެ
• ބީއެމްއެލްގެ ކެޕިޓަލް ދަށްވެއްޖެނަމަ، މުޅި މާލީ ނިޒާމަށް ނޭދެވޭ އަސަރުކުރާނެ
• ބީއެމްއެލް އިން އާންމު ވިޔަފާރިތަކާ އާންމުންނަށް ލޯނު ދޫކުރުން މަދުވުން

މިކަމުގައި ރައްޔިތުން ކަންބޮޑުވަނީ/ވާންވީ ކީއްވެ؟

• ދަރަނީގެ ނަން ބޭނުން ނުކޮށް ސަރުކާރުން ބީއެމްއެލް އިން ފައިސާ ނެގުން
• ބީއެމްއެލް އަކީ ދައުލަތުގެ ކުންފުންޏެއްކަމުން، ސަރުކާރުން ބުނެގެން ދޫކުރާ ފައިސާ އަނބުރާ ނުލިބިއްޖެ ހާލަތެއްގަ ހުރިހާ ގެއްލުމެއް ލިބެނީ ރައްޔިތުންނަށް
• 2.7 ބިލިއަން ރުފިޔާއިން ޚަރަދުކުރާއިރު ރައްޔިތުންގެ މަޖިލިހުގެ ބަހެއް ނުހޯދުން
• ބީއެމްއެލްގަ ހުރި ފައިސާ ސިޔާސީ ބޭނުންތަކަށް ބޭނުންކުރުމަކީ މުޅި ބޭންކިން ސެކްޓަރ އަށް ހުރި ބޮޑު ނުރައްކަލެއް.
• ބިޑުކުރުމެއް ނެތި ޕްރޮޖެކްޓްތައް ބަހާލުމުން މި މަސައްކަތްތަކުގެ އަގު އެތައް ގުނައެއް ބޮޑުވުން
• ފާޅުކަން ބޮޑު ގޮތެއްގަ ސަރުކާރުން ކޮރަޕްޝަން އާންމުކުރުން
• ބަޖެޓްގަ ނުޖަހާ ޕްލޭނެތް ކުރުމެއް ނެތި ޕްރޮޖެކްޓްތައް ހިންގަން ހަރަދުކުރާއިރު ރައްޔިތުންނަށް އެންމެ ބޭނުންވެފަވާ ކަންކަން ނުވުން