މަނީ ޗޭންޖިން ވިޔަފާރިތަކުގެ ބާވަތްތައް ކަނޑައަޅާ ގޮތަށް ބަދަލުތަކެއް ގެނެސް، ލައިސަންސް ނަގަން ދައްކަން ޖެހޭ އެޕްލިކޭޝަން ފީގެ އަގާއި އަހަރީ ފީގެ އަގު ބޮޑުކޮށް، މަނީ ޗޭންޖިން ވިޔަފާރިތަކުގެ ގަވާއިދު މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބަދަލުކޮށްފި އެވެ.

ހުސްވި ހަފުތާގެ ތެރޭގައި އެމްއެމްއޭއިން ގެޒެޓުކޮށްފައިވާ މަނީ ޗޭންޖިން ގަވާއިދުގައި، ބޭރު ފައިސާ ގަނެވިއްކުމުގެ ހުއްދަ ލިބޭ ޓިއާ 1 ގެ ވިޔަފާރިތައް ވަނީ ދެ ކެޓެގަރީއަކަށް ގިންތިކޮށްފަ އެވެ.

"ކެޓެގަރީ އޭ" ގެ ދަށުން ރަޖިސްޓްރީ ކުރުމުުން އާންމުންނަށާއި ވިޔަފާރިތަކާއި އެހެން ވެސް ފަރާތްތަކުން ޑޮލަރު ގަނެވިއްކާ، ވިޔަފާރި ކުރެވޭނެ އެވެ. "ކެޓެގަރީ ބީ" ގެ ދަށުން ހުއްދަ ނަގައިގެން ޑޮލަރު ގަނެވިއްކުމުގެ ވިޔަފާރި ކުރެވެނީ އެހެން ވިޔަފާރިތަކާ އެކަންޏެވެ.

އެމްއެމްއޭއިން ވަނީ، ޑޮލަރު ވިއްކުމުގެ ވިޔަފާރި ކުރާ ދާއިމީ ތަންތަން ހުންނަން ޖެހޭ މިންގަނޑުތައް ވެސް ކަނޑައަޅާފަ އެވެ. އެ މިންގަނޑުތަކަކީ:

• އޮފީހެއްގެ ގޮތުގައި ގާއިމުކޮށްފައި ހުންނަން ޖެހޭ
• އެ ތަނުގައި އެއް ވިޔަފާރިއަށް ވުރެ ގިނައިން ހިންގިޔަސް، ހާއްސަ ކައުންޓަރެއް ހެދުން
• ފަސޭހައިން ވަދެނިކުމެވޭ ގޮތަށް ހުރުން
• ޑޮލަރު ވިއްކާ ކައުންޓަރުން އެހެން ވިޔަފާރިއެއް ނުކުރުން
• ކަސްޓަމަރުންނަށް ޕްރައިވެސީ ލިބޭ ގޮތަށް، ރައްކާތެރިކަމާ އެކީ ވިޔަފާރިކުރެވޭ ކައުންޓަރަކަށް ވުން
• ބިއްލޫރި ނޫނީ އެ ނޫން ވެސް އެތެރެ ފެންނަ ފަސާޑެއް ހުންނަން ޖެހޭ
• އެހެން ވިޔަފާރިއެއް ކުރާ ތަނެއްގައި ހުއްޓަސް، ޑޮލަރު ވިއްކާ ކައުންޓަރު ހުންނަން ޖެހޭނީ ޖާގައިގެ ގޮތުންނާއި ހިންގުމުގެ ގޮތުން ވަކިން

ޑޮލަރު ޗޭންޖިން ވިޔަފާރިތަކުގެ ގަވާއިދަށް ގެނައި ބަދަލުތަކުގެ ތެރެއިން، ޑޮލަރު ގަނެވިއްކުމުގެ ވިޔަފާރީގައި ހަރަކާތްތެރިވާން ބޭނުންވާ ސަރުކާރު ކުންފުނިތަކާއި ސަރުކާރު ހިއްސާވާ ކުންފުނިތަކަށް ވެސް ވަނީ ހާއްސަ އުސޫލުތަކެއް ކަނޑައެޅިގެން ގޮސްފަ އެވެ.

މި އުސޫލުތަކުގެ ދަށުން ސަރުކާރު ކުންފުންޏަކުން ނޫނީ ސަރުކާރު ހިއްސާވާ ކުންފުންޏަކުން ޓިއާ 1 ލައިސަންސް ނަގައިގެން ޑޮލަރު ގަނެ ވިއްކުމުގެ މުއާމަލާތްތައް ހިންގެނީ އެކަމަށް ހާއްސަ ބޭންކު އެކައުންޓަކުންނެވެ. އަދި އެކަމަށް ހާއްސަކޮށްގެން، އެ ކުންފުންޏެއްގެ ވިޔަފާރި ހަރަކާތްތަކާ ވަކިން ބިޒްނަސް ޔުނިޓެއް ވެސް ގާއިމުކުރަން ޖެހެ އެވެ.

ފީތަކާއި ޑިޕޮސިޓުތަކަށް އައި ބަދަލު

• ދާއިމީ ތަނުގައި ނޫން ތަނެއްގައި ޑޮލަރު ވިއްކަން ބޭނުން ނަމަ - 40،000ރ.
• ޓިއާ 1 ލައިސަންސަކަށް އެދެން - ކުރިން 20،000ރ.، މިހާރު 40،000ރ.
• ޓިއާ 1 ލައިސަންސް އާ ކުރަން - ކުރިން 10،000ރ. މިހާރު 20،000ރ.
• ޓިއާ 1 ލައިސަންސެއްގެ އަހަރީ ފީ - ކުރިން 24،000ރ. މިހާރު 48،000ރ.
• ޓިއާ 1 ގެ ދާއިމީ ލައިސަންސް ނަގާފައިވާ ތަން ނޫން އިތުރު ތަންތަނަށް - ކޮންމެ ތަނަކަށް 24،000ރ.
• ޓިއާ 2 ލައިސަންސަކަށް އެދެން - ކުރިން 1300 ޑޮލަރު، މިހާރު 2600 ޑޮލަރު
• ޓިއާ 2 ލައިސަންސް އާކުރަން - ކުރިން 650 ޑޮލަރު، މިހާރު 1300 ޑޮލަރު
• ޓިއާ 2 ލައިސަންސްގެ އަހަރީ ފީ - ކުރިން 1800 ޑޮލަރު، މިހާރު 3600 ޑޮލަރު
• ސެކިއުރިޓީ ޑިޕޮސިޓު - ކުރިން 50،000 ޑޮލަރު، މިހާރު 100،000 ޑޮލަރު
• ހުއްދަ ހޯދާ އިތުރު ކޮންމެ ތަނެއްގެ ސެކިއުރިޓީ ޑިޕޮސިޓު - 50،000 ޑޮލަރު

އެމްއެމްއޭއިން ވަނީ ޑޮލަރު ވިއްކަން ބޭނުންވާ ވިޔަފާރިތަކުން ހުށަހަޅަން ޖެހޭ މައުލޫމާތުގެ ތެރޭގައި ބިޒްނަސް ޕްލޭނެއް ހިމަނާފަ އެވެ. ކުރިން މި މާއްދާގައި އޮތީ ބޭރު ފައިސާ ހޯދާނެ ގޮތުގެ ތަފުސީލުތައް ހިމެނޭ ގޮތަށް، ވިޔަފާރި ކުރާނެ ގޮތް ހުށަހެޅުމަށެވެ. މިހާރު އޮތް ގޮތުން، ފައިސާ ހޯދާނެ ގޮތާއި މުވައްޒަފުނާއި އިންޓާނަލް ކޮންޓްރޯލްތައް ހިމެނޭ އޮޕަރޭޝަން ޕްލޭނު، މި ބިޒްނަސް ޕްލޭނުގައި ހިމަނަން ޖެހެ އެވެ.

ޑޮލަރު ގަވާއިދަށް ގެނައި ބަދަލުގެ ދަށުން ކެޓެގަރީ ބީ ގެ ވިޔަފާރިތަކަށް، ޑޮލަރު ވިއްކުމުގެ އެއްވެސް މުއާމަލާތެއް ކުރެވޭނީ ބޭންކު މެދުވެރިކޮށް އެކަންޏެވެ. މި ހުއްދަ ނަގައިގެން ނަގުދު ފައިސާއިން އެއްވެސް މުއާމަލާތެއް ނުކުރެވޭނެ އެވެ.

އެމްއެމްއޭއިން ބުނި ގޮތުގައި މި އިސްލާހުގެ މަގުސަދަކީ ލައިސަންސް ދޫކުރުމުގައި ހުރި ގޮންޖެހުންތައް ލުއިކޮށް، ގަވާއިދު ތަންފީޒުކުރުން ހަރުދަނާކޮށް، އަދި މަނީ ޗޭންޖިން ލައިސަންސް ލިބިފައިވާ ފަރާތްތަކަށް ވިޔަފާރިކުރުން ފަސޭހަކޮށްދިނުމެވެ.