މި ސަރުކާރުން ވެރިކަމަށް އައުމުގެ ކުރިންނާއި ފަހުން ވައުދުވި ގޮތަށް ފޯޅަވަހި އަނބުރާ ހޯދަން ރަސްމީ މަސައްކަތް ފަށަން ސަރުކާރުން ނިންމާފައިވޭތޯ ސާފުކުރަން ރައީސް އޮފީހަށް ހުށަހެޅި އާރުޓީއައިއަށް އެއްވެސް ޖަވާބެއް ނުދިނުމުން އެ މައްސަލަ އިންފޮމޭޝަން ކޮމިޝަނަރު އޮފީހަށް ހުށަހަޅައިފި އެވެ.
ފޯޅަވަހި ނުވަތަ މުޅި ދުނިޔެ ދަންނަ ގޮތުން ނަމަ ޗާގޯސް އައިލެންޑްސްގެ މައްސަލަ ހިލުނީ އެ ޖަޒީރާތަކުގެ މައްޗަށް މޮރިޝަސްގެ ސިޔާދަތީ ބާރު އޮތް ކަމަށް ނިންމައި، ރާއްޖޭގެ ބަޔެއް ކަމަށް ދިވެހިން ބަލަމުން އައި ކަނޑުގެ ސަރަހައްދުން ބަޔެއް ގެއްލުމުންނެވެ.
ރާއްޖޭގެ ހާއްސަ އިގުތިސޯދީ ސަރަހައްދުގެ ތެރޭގައި ހިމެނޭ ކަނޑުން ބަޔެއް ގެއްލުނީ ކަނޑުގެ ސަރަހައްދުގެ ބައިކުރަން އިންޓަނޭޝަނަލް ޓްރައިބިއުނަލް އޮފް ދަ ސީސް (އިޓްލޮސް) އަށް ހުށަހެޅި މައްސަލައިގައި، އިކުއިޑިސްޓެންސް ހަމައިގެ ދަށުން ފުށުއަރާ ކަނޑުގެ ސަރަހައްދު ބައިކުރަން ނިންމުމާ ގުޅިގެންނެވެ.
މި ނިންމުން ރާއްޖެއާ ދެކޮޅަށް އައީ، މި ސަރުކާރާއި އޭރުގެ ސަރުކާރުން މި މައްސަލައިގައި ވަކާލާތުކުރި ގޮތާ މެދު ހިތްހަމަނުޖެހުން ހުރި މީހުން ބުނާ ގޮތުގައި، ކުރީގެ ރައީސް އިބްރާހިމް މުހައްމަދު ސޯލިހު މޮރިޝަސްގެ ބޮޑުވަޒީރަށް ފޮނުއްވެވި ސިޓީއަކާ ގުޅިގެންނެވެ.
މި ބުނާ ސިޓީއަކީ ކަނޑު ބައިކުރުމުގެ މައްސަލަ ބެލޭނެ ކަމަށް އިޓްލޮސްއިން ނިންމި ފަހުން، ޗާގޯސްގެ މައްޗަށް ސިޔާދާތީ ބާރު އޮތް ކަމަށް އދ. ގައި ވޯޓެއް ނަގައިފި ނަމަ، ރާއްޖޭން އެއާ އެއްކޮޅަށް ވޯޓު ދޭނެ ކަމަށް ބަޔާންކޮށްފައިވާ ސިޓީއެކެވެ. އޭރު އުފެދުނު "ކަނޑު ގެއްލުވާލުމާ ދެކޮޅު" އިއްތިހާދުން ކަނޑު ގެއްލުނީ މި ސިޓީއާ ހެދި ކަމަށެވެ.
އަދުގެ ސަރުކާރު ހިންގާ ޕީއެންސީ އާއި އޭރު އިސްކޮށް އޮތް ޕީޕީއެމްއަކީ މި އިއްތިހާދުގެ ބައިވެރިންނެވެ. އަދި ވެރިކަން ލިބިއްޖެ ނަމަ ކަނޑުން ގެއްލުނު ބައި ހޯދައިދޭނެ ކަމަށް ވައުދުވެ، ވެރިކަމާ ހަވާލުވުމަށް ފަހު ސަރުކާރުން ފުރަތަމަ 100 ދުވަހުގެ ތެރޭގައި ކުރާ ކަންކަމުގެ ތެރޭގައި ހިމަނައިގެން މި މަސައްކަތް ފެށި އެވެ.
އެ ގޮތުން އެޓަނީ ޖެނެރަލް އޮފީހުން ބޭރުގެ ވަކީލުންތަކެއް ނަގައިގެން މި މައްސަލަ ދިރާސާކުރަން ފެށި އެވެ. އޭޖީ އޮފީހުން މީގެ ތިން މަސް ކުރިން ބުނީ މި ވަކީލުންގެ ހޯދުންތަކުގެ މައްޗަށް ބިނާކޮށް މި މައްސަލަ ދިރާސާކުރަން އޭޖީ އޮފީހުން އުފައްދާފައިވާ ވިލަރެސް ކޮމިޓީން ތައްޔާރުކުރި ރިޕޯޓު ފައިނަލް ކުރުމުގެ މަސައްކަތް އެ ކޮމިޓީން ކުރަމުންދާ ކަމަށެވެ.
ވިލަރެސް ކޮމިޓީގެ ރިޕޯޓު ދިރާސާ ކުރުމަށްފަހު، ކެބިނެޓަށް ހުށަހެޅުމަށް ކެބިނެޓް ޕޭޕަރެއް ތައްޔާރު ކުރުމަށް ހަމަޖެހިފައިވާ ކަމަށް ވެސް އޭޖީން ބުންޏެވެ. އަދި މި މަސައްކަތް ނިމުމުން ކެބިނެޓުން ނިންމާ ގޮތެއް އާންމުކުރާނެ ކަމަށް ވެސް އެ އޮފީހުން ބުންޏެވެ.
ސަރުކާރުން މި ކަމުގައި ކުރިއަށް ދާން ނިންމާ ގޮތެއް ސާފު ނުވާއިރު، އިނގިރޭސިވިލާތުން ވަނީ ޗާގޯސް މޮރިޝަސްއާ ހަވާލުކޮށްފަ އެވެ. މި އެއްބަސްވުމުގެ ދަށުން ޑިއޭގޯ ގާސިއާ 99 އަހަރަށް އަސްކަރީ މަރުކަޒެއްގެ ގޮތުގައި ބޭނުން ކުރުމުގެ ހުއްދަ އެމެރިކާ އާއި އިނގިރޭސިވިލާތަށް އެ އެއްބަސްވުމުގެ ދަށުން ލިބޭނެ އެވެ. މި ތަނަށް އަހަރަކަށް ޖެހޭ ކުއްޔަކީ 101 މިލިއަން ޕައުންޑެވެ.
އިނގިރޭސިވިލާތުން ޗާގޯސްގެ ސިޔާދަތީ ބާރު މޮރިޝަސްއަށް ދޫކޮށްލިއިރު، އެ ތަން ރާއްޖެއަށް ދިނުން މާ ހައްގު ކަމަށް ބުނެ އިނގިރޭސި ސަރުކާރަށް ރައީސް މުހައްމަދު މުއިއްޒުގެ ސިޓީއެއް ފޮނުއްވާފައި ވަނިކޮށެވެ. މި ސިޓީ ހިއްސާކޮށްދޭން އެދުމުން މި ސަރުކާރުން ވަނީ އެ ސިޓީ ސިއްރުކުރަން ނިންމާފަ އެވެ.
