މިނިވަން މީޑިއާ ނެތިކޮށްލާ ބިލު ޑްރާފްޓު ކުރުމުގެ ކުރިން ދިރާސާއެއް މަޝްވަރާއެއް ކޮށްފައި ނުވާތީ މޯލްޑިވްސް ބްރޯޑްކާސްޓިން ކޮމިޝަނުން ކަންބޮޑުވުން އިއްޔެ ފާޅުކުރި އެވެ. އަދި އެ ބިލް މިހާރު އޮތް ގޮތަށް ފާސްކޮށް ގާނޫނަކަށް ހެދިޔަސް ތަންފީޒު ކުރެވޭނެ ކަމަށް ގަބޫލު ނުކުރާ ކަމަށް އެ ކޮމިޝަނުން ބުންޏެވެ.

މިނިވަން މީޑިއާ ނެތިކޮށްލާ ބިލު ހުށަހެޅުމުގެ ކުރިން މަޝްވަރާ ނުކުރާތީ ބްރޯޑްކޮމްގެ މެންބަރުން ކަންބޮޑުވުން ފާޅުކުރީ އެ ބިލު ދިރާސާ ކުރުމަށް މިއަދު ބޭއްވި މަޖިލީހުގެ މިނިވަން މުއައްސަސާތަކުގެ ކޮމިޓީއަށް ހާޒިރުވެ ވާހަކަދައްކަމުންނެވެ.

ކޮމިޓީގައި ވާހަކަަ ދައްކަވަމުން ބްރޯޑްކޮމްގެ ރައީސް, ސަފާ ޝަފީގު ވިދާޅުވީ އެ ބިލު މަޖިލީހަށް ހުށަހެޅުމުގެ ކުރިން ބްރޯޑްކާސްޓިން ކޮމިޝަނާ ބައްދަލު ކޮށްފައި ނުވާ ކަމަށާއި އެކަމާ ހިތާމަ ކުރައްވާ ކަމަށެވެ.

"އަޅުގަނޑުމެންނަކީ އެއް ރެގިއުލޭޓަރީ ބޮޑީ، އަޅުގަނޑުމެންނާ ހަމަ ގައިމުވެސް ކޮންސަލްޓެއް ނުކުރައްވާ އިނގޭތޯ؟ އެހެންވީމާ އަޅުގަނޑަކަށް ހިއެއް ނުވޭ އެއްވެސް ކަހަލަ ނޭޝަންވައިޑް ރީސާޗެއް ނޫނީ ސްޓޭކް ހޯލްޑާސްއާ އެއްވެސް ވަރަކަށް ބައްދަލު ކުރި ހެނެއް، އެހެންވީމާ މިއީ ހަމަ އަޅުގަނޑު ހިތާމަ ކުރާ ކަމެއް،" ސަފާ ވިދާޅުވި އެވެ.

ނޫސްވެރިންނާއި އަދި ކަމާ ގުޅުންހުރި ފަރާތްތަކާ މަޝްވަރާ ކުރި ނަމަ މީޑިއާތައް ރެގިއުލޭޓު ކުރުމުގައި ދިމާވާ ހަގީގީ މައްސަލަތައް ދެނެގަނެ އެ ކަންކަމަށް ހައްލު ހޯދަން ފަސޭހަވީސް ކަމަށް ސަފާ ވިދާޅުވި އެވެ. އެގޮތުން މީޑިއާތައް ރެގިއުލޭޓު ކުރާ ބިލެއް ޑްރާފްޓު ކުރުމުގެ ކުރިން މީޑިއާތައް މިހާރު ރެގިއުލޭޓު ކުރަމުންދާ ބްރޯޑްކޮމް އާއި މޯލްޑިވްސް މީޑިއާ ކައުންސިލާ މަޝްވަރާ ކުރުން ވަރަށް މުހިންމު ކަމަށް އޭނާ ވިދާޅުވި އެވެ.

"އަޅުގަނޑުމެންގެ ސޭ އެއް [ބަހެއް] ވަރަށް މުހިންމުވާ ސަބަބަކީ އަޅުގަނޑުމެންނަށް މިހާރު އެނގޭނެ އަޅުގަނޑުމެންނަށް މިހާރު ހުރި ގޮންޖެހުންތަކަކީ ކޮބައިކަން، އަޅުގަނޑުމެންނަށް ބައެެއް މަސައްކަތްތައް ލަސްވެގެން ދަނީ ނުކުރެވިގެން ދަނީ ކޮން ސަބަބުތަކަށްޓަކައިކަން އަޅުގަނޑުމެންނަށް ވަރަށް ރަނގަޅަށް އެނގޭ، އިމްޕްލިމެންޓު ކުރަން ތިބި ބަޔަކަށް އެނގޭނީ މިކަން ނުކުރެވޭ ސަބަބަކީ ކޮބައިކަން،" ސަފާ ވިދާޅުވި އެވެ.

މިފަދަ ބިލެއް މަޖިލީހަށް ހުށަހެޅުމުގެ ކުރިން ދުނިޔޭގެ ކުރިއަރާފައިވާ ގައުމުތަކުގައި ކަން ކުރާ ގޮތް ވެސް ބަލައި ދިރާސާ ކުރުން މުހިންމު ކަމަށް ސަފާ ވިދާޅުވި އެވެ. އެގޮތުން ބޭރު ގައުމުތަކުގައި މީޑިއާތައް ރެގިއުލޭތު ކުރަން ގެންގުޅޭ ނިޒާމުތައް ރާއްޖެއަށް ގެނެސްގެން ނުކުންނާނެ ނަތީޖާއާ މެދު ވެސް ވިސްނަންޖެހޭ ކަމަށް ސަފާ ވިދާޅުވި އެވެ.

"ސެލްފް ރެގިއުލޭޓަރީ ސިސްޓަމަކަށްތޯ އަޅުގަނޑުމެން ދާންވީ، ހުރިހާ މެންބަރުންނަކީ ވޯޓު ލައިގެން ކަނޑައަޅާ ސެލްފް ރެގިއުލޭޓަރީ ސިސްޓަމަކަށްތޯ ދާންވީ ނޫނީ ކޯ ރެގިއުލޭޝަންއަށްތޯ؟ އަޅުގަނޑު ގަބޫލު ކުރާ ގޮތުގައި މީތި ވެސް ހަމަ އެކަޑެމިކަލީ ކޮލިފައިޑް ބައެއްތޯ ހަމަ ކުރީގައި ދެންނެވިހެން ބަލާފައި މެޖޯރިޓީ އޮފް ދަ ޖާނަލިސްޓުންނަކީ ސެލްފް ޑިސިޕްލިންޑު ބައެއްތޯ ބެލުން ވަރަށް މުހިންމޭ،" ސަފާ ވިދާޅުވި އެވެ.

މިހާރު މަޖިލީހަށް ހުށަހަޅާފައި އޮތް ބިލާމެދު މަޖިލީހުން ކޮންމެ ގޮތަކަށް އަމަލު ކުރި ނަމަވެސް އެ ބިލު މިހާރު އޮތް ގޮތަށް ބަލާއިރު، އެ ބިލުގައި ހުރި ކަންކަން ތަންފީޒު ކުރަން ފަސޭހަ ނުވާނެކަމަށް ސަފާ ވިދާޅުވި އެވެ.

އެގޮތުން މިހާރު ވެސް ބްރޯޑްކޮމްއަށް ދީފައި އޮންނަ ބަޖެޓު ކުޑަވުމާއި އެކަށީގެންވާ މޮނިޓަރިން ނިޒާމެއް ނެތްކަން އޭނާ ފާހަގަކުރެއްވި އެވެ. ކަންކަން އެހެން ހުރި ނަމަވެސް، މިހާރު މަޖިލީހަށް ހުށަހަޅާފައިވާ ބިލުގައި ބްރޯޑްކާސްޓިން މީޑިއާތަކުގެ އިތުރުން ޕްރިންޓް އަދި އޮންލައިން މީޑީއާތަކާއި ރީބްރޯޑްކާސްޓިން މީޑިއާ އަދި އޯޓީޓީ ޕްލެޓްފޯމްތައް އެއްކޮށްލަން ނިންމާފައިވުމުން އެ ގޮންޖެހުންތައް އިތުރުވެގެންދާނެކަން ސަފާ ފާހަގަކުރެއްވި އެވެ.

އޭގެއިތުރުން މީޑިއާތައް ރެގިއުލޭޓު ކުރުމަށް އުފައްދާ ކޮމިޝަނުގައި ތިއްބަވާނެ މެންބަރުންގެ ޝަރުތުތައް ކަނޑައެޅުމުގައި ވެސް ހުރި ކަންބޮޑުވުންތައް އޭނާ ފާހަގަކުރެއްވި އެވެ.

ސަފާގެ ވާހަކަތަކަށް އެ ކޮމިޝަނުގެ އެހެން މެންބަރުން ވެސް ތައީދު ކުރެއްވި އެވެ.

ނަމާދު ވަގުތު

މުހިއްމު ބައެއް ހަބަރު