‏ޗައިނާއިން އެމެރިކާއަށް އިމްޕޯޓްކުރާ ‏‏ސްމާޓްފޯނާއި ކޮމްޕިއުޓަރު ފަދަ އިލެކްޓްރޯނިކް ‏‏ތަކެއްޗަށް ޓެރިފް އިސްތިސްނާ ދީފި އެވެ.

‏‏މިއާއެކު، އެމެރިކާގެ ރައީސް ޑޮނަލްޑް ޓްރަމްޕް ‏‏އިއުލާނުކުރި 125 އިންސައްތައިގެ ރެސިޕްރޮކަލް ‏‏ޑިއުޓީން މި ތަކެތި ސަލާމަތްވެގެން ދާނެ އެވެ‏‎.‎

‏އެމެރިކާގެ ކަސްޓަމްސް އެންޑް ބޯޑާ ‏‏ޕްރޮޓެކްޝަން (ސީބީޕީ) އޭޖެންސީން ‏‏ޝިޕަރުންނަށް ފޮނުވި ނޯޓިސްއެއްގައި، ޑިއުޓީން ‏‏އިސްތިސްނާ ކުރެވޭ ޓެރިފް ކޯޑުތަކުގެ ލިސްޓެއް ‏‏ޝާއިއުކޮށްފައިވެ އެވެ. މި އިސްތިސްނާތައް ‏‏ރެޓްރޯއެކްޓިވްކޮށް 5 އޭޕްރިލް ހެނދުނު 12:01 ‏‏އަށް ހިނގަން ފަށާނެ އެވެ‏‎.‎

‏ސީބީޕީން އާންމުކުރި ލިސްޓުގައި 20 ބާވަތެއްގެ ‏‏އުފެއްދުން ހިމެނެ އެވެ. މީގެ ތެރޭގައި ހުރިހާ ‏‏ކޮމްޕިއުޓަރުތަކާއި، ލެޕްޓޮޕްތަކާއި، ޑިސްކް ‏‏ޑްރައިވްތަކާއި އަދި އޮޓޮމެޓިކް ޑޭޓާ ‏‏ޕްރޮސެސިން ތަކެތި ހިމެނޭ 8471 ކޯޑެއް ‏‏ހިމެނެ އެވެ.

މީގެ އިތުރުން ސެމިކޮންޑަކްޓާ ‏‏ޑިވައިސްތަކާއި، އިކުއިޕްމަންޓްތަކާއި، މެމޮރީ ‏‏ޗިޕްތަކާއި އަދި ފްލެޓް ޕެނަލް ޑިސްޕްލޭތައް ވެސް ‏‏ހިމެނިފައިވެ އެވެ‏‎.‎

‏މި ނިންމުމުގެ ސަބަބުން އެޕަލް، ޑެލް ‏‏ޓެކްނޮލޮޖީސް އަދި އެހެނިހެން ބޮޑެތި އެމެރިކާގެ ‏‏ޓެކްނޮލޮޖީ ކުންފުނިތަކަށް ބޮޑު ލުޔެއް ‏‏ލިބިގެންދާނެ އެވެ. އަދި ޓްރަމްޕްގެ މި ނިންމުމުގެ ‏‏ސަބަބުން ޗައިނާ ފިޔަވައި އެހެން ގައުމުތަކުން ‏‏އިމްޕޯޓްކުރާ ތަކެއްޗަށް ކަނޑައަޅާފައިވާ 10 ‏‏އިންސައްތައިގެ "ބޭސްލައިން" ޓެރިފްއިން ވެސް ‏‏މި އިލެކްޓްރޯނިކް ތަކެތި ‏‏އިސްތިސްނާވެގެންދާނެ އެވެ.

މިއާއެކު ޓައިވާނުން ‏‏އިމްޕޯޓްކުރާ ސެމިކޮންޑަކްޓަރުތަކާއި އިންޑިއާގައި ‏‏އުފައްދާ އެޕަލް އައިފޯނުތައް އިމްޕޯޓްކުރުމުގެ ‏‏ހަރަދު ކުޑަވެގެންދާނެއެވެ‏‎.‎

‏ނަމަވެސް، ޗައިނާއިން އިމްޕޯޓްކުރާ ތަކެއްޗަށް މި ‏‏އިސްތިސްނާ ދެވިފައިވަނީ ހަމައެކަނި ޓްރަމްޕްގެ ‏‏ރެސިޕްރޮކަލް ޓެރިފްތަކަށެވެ. ކުރިން ޗައިނާގެ ‏‏ހުރިހާ އިމްޕޯޓްތަކަށް ކަނޑައަޅާފައިވާ 20 ‏‏އިންސައްތައިގެ ޑިއުޓީ ދެމިއޮންނާނެކަމަށް ވައިޓް ‏‏ހައުސްގެ އޮފިޝަލެއް ވަނީ ބުނެފަ އެވެ‏‎.‎