މިއުނިކް، ޖަރުމަނު (މާޗް 30) - ޖަރުމަނު ލީގުގައި ރޭ އެންމެ ފަހުގެ ޗެމްޕިއަން ބަޔާ ލެވަކޫސަން އިން 3-1 ގެ ނަތީޖާއަކުން ބޮކުމް ބަލިކުރިއިރު، ބަޔާން މިއުނިކުން 3-2 ގެ ނަތީޖާ އަކުން ޕައުލީގެ މައްޗަށް ކުރިހޯދައިފި އެވެ.

ލެވަކޫސަންގެ ދަނޑުގައި ކުޅުނު މެޗުގެ 20 ވަނަ މިނިޓްގައި އެ ޓީމުން ވަނީ ގޯލު ޖަހައި ލީޑު ނަގައިފަ އެވެ. މި ލަނޑު އެ ޓީމަށް ޖަހާދިނީ އަލެކްސް ގާސިއާ އެވެ. އެކަމަކު، މެޗުގެ 26 ވަނަ މިނިޓްގައި ބޮކުމްގެ ފީލިކްސް ޕާލްސަކް ވަނީ ގޯލު ޖަހައި ނަތީޖާ ހަމަހަމަ ކޮށްފަ އެވެ.

މެޗުގެ 60 ވަނަ މިނިޓްގައި ލެވަކޫސަންގެ ވިކްޓަ ބޮނިފޭސް ވަނީ ގޯލު ޖަހައި އަލުން އެ ޓީމަށް ލީޑު ނަގައިދީފަ އެވެ. މިއީ، ޕެއޭރޯ ހިންކަޕިއޭގެ އެހީތެރިކަމާ އެކު ބޮނިފޭސް ޖެހި ގޯލެކެވެ. އަދި، މެޗުގެ 87 ވަނަ މިނިޓްގައި ލެވަކޫސަންގެ އަމީން އަދްލީ ވަނީ ގޯލު ޖަހައި އެ ޓީމުގެ ލީޑު ފުޅާކޮށްދީފަ އެވެ.

ޖަރުމަނު ލީގުގެ އެންމެ ކާމިޔާބު ޓީމު ކަމަށްވާ، ބަޔާނުން ޕައުލީ ބަލިކުރި މެޗުގެ 17 ވަނަ މިނިޓްގައި އެ ޓީމުން ވަނީ ގޯލު ޖަހައި ލީޑު ނަގާފަ އެވެ. މި ގޯލު އެ ޓީމަށް ޖަހައިދިނީ ތަޖުރިބާކާރު ފޯވާޑް ހެރީ ކޭން އެވެ. އެކަމަކު، މެޗުގެ 27 ވަނަ މިނިޓްގައި އެލާޔަސް ސާދް ވަނީ ގޯލު ޖަހާ ނަތީޖާ ހަމަހަމަ ކޮށްފަ އެވެ.

ދެވަނަ ހާފުގައި ބަޔާން އިން އެ ޓީމުގެ އެޓޭކުތައް ވަރުގަދަކުރިއިރު، މެޗުގެ 53 ވަނަ މިނިޓްގައި ލެރޯއީ ސާނޭ ވަނީ ގޯލު ޖަހައި އަލުން އެ ޓީމަށް ލީޑު ނަގަައިދީފަ އެވެ. އަދި މެޗުގެ 71 ވަނަ މިނިޓްގައި ސާނޭ ވަނީ އިތުރު ގޯލެއް ޖަހައި އެ ޓީމުގެ ލީޑު ފުޅާކޮށްފަ އެވެ. އެކަމަކު، މެޗުގެ އިތުރު ވަގުތުގައި ޕައުލީގެ ލާޒް ރިޓްކާޒް ވަނީ ގޯލު ޖަހައި ފަރަގު ކުޑަކޮށްފަ އެވެ.

މި ނަތީޖާތަކާ އެކު، ޖަރުމަނު ލީގު ތާވަލުގެ އެއް ވަނައިގައި ބަޔާން އޮތީ 27 މެޗުން 65 ޕޮއިންޓް ހޯދައިގެންނެވެ. ދެ ވަނައިގައި އޮތް ލެވަކޫސަން އަށް 27 މެޗުން 59 ޕޮއިންޓް ވަނީ ލިބިފަ އެވެ.