އެމްޑީޕީގެ އެކްޓިވިސްޓު، އަދި ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއީލް ނަސީމުގެ މަންމަ، މަރިޔަމް ޒުބައިރު (މަންދީ) ގެ ގަޔަށް މާޗު 17، ގެ ރޭ ދަންވަރު ކަޅުތެޔޮ ޖެހި މައްސަލައިގައި މީހަކު ހައްޔަރުކޮށްފި އެވެ.

ކްރިމިނަލް ކޯޓުގެ ބަންދު އަމުރުން އެނގޭ ގޮތުގައި އެ މައްސަލައިގައި ފުލުހުން ހައްޔަރުކުރީ މަންދީގެ ގަޔަށް ކަޅުތެޔޮ ޖެހި މީހުން ތިބި ސައިކަލު ދުއްވި ކަމަށް ތުހުމަތު ކުރެވޭ ގއ. ދާންދޫ، ސަންލައިޓްވިލާ، އަހްމަދު ރިޝްމާހް, 20 އެވެ.

އަހްމަދު ރިޝްމާހްގެ ބަންދާ މެދު ގޮތެއް ނިންމަން ކްރިމިނަލް ކޯޓަށް އިއްޔެ ހާޒިރު ކުރުމުން 15 ދުވަހަށް ބަންދު ކުރުމަށް ކޯޓުން ވަނީ އަމުރުކޮށްފަ އެވެ. އޭނާ ހައްޔަރުކުރީ މާޗު 27، ގައި ކޯޓު އަމުރެއްގެ ދަށުން ކަމަށް ފުލުހުން ބުނެ އެވެ.

މަންދީ ގަޔަށް ކަޅުތެޔޮ ޖެހި ވަގުތު ސައިކަލު ނުދުއްވާ ކަމަށް އަހްމަދު ރިޝްމާހް އިންކާރު ނުކުރާއިރު، އޭނާއާ އެކު ސައިކަލުގެ ފަހަތުގައި ހުރި މީހާގެ މައުލޫމާތު ހިއްސާ ކޮށްފައިވާކަން ބަންދު އަމުރުގައި ފާހަގަކޮށްފައިވެ އެވެ.

ދުރާލައި މަންދީއަށް ފާރަލަމުން ގޮސް ކަޅުތެޔޮ ޖެހީ އެމްޑީޕީގެ މުޒާހަރާއެއްގެ ތެރެއިން ރައީސުލްޖުމްހޫރިއްޔާ، ޑރ. މުހައްމަދު މުއިއްޒުގެ ބޭފުޅެއްގެ ވާހަކަ ދެއްކި މަންދީގެ މައްޗަށް ފުލުހުން ޖިނާއީ ތަހުގީގެއް ހިންގަން ފަށާފައިވާ ދަނޑިވަޅެއްގަ އެވެ.

މަންދީ އަދަދު އަށް ބުނީ މީގެ ކުރިން ވެސް ސައިކަލްގައި އެކަނި އުޅޭ ކަމަށާއި ދުވަހަކު ވެސް މަގުމަތިން މީހަކު މިފަދަ ކަމެއް ކޮށްފައި ނެތް ކަމަށެވެ.