ދައުލަތުގެ ތިން ބާރުގެ ތެރެއިން ގާނޫނު ހެދުމާއި ރައްޔިތުން ތަމްސީލު ކުރުމުގެ ބާރު ކަމަށްވާ ރައްޔިތުންގެ މަޖިލީހުގެ މިއަދުގެ ޖަލްސާ އެންމެ 30 ވަރަކަށް މިނެޓު ތެރޭ ނިންމާލައިފި އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގެ އެޖެންޑާގައި އޮތީ ސަފީރުން އައްޔަންކުރުމުގެ ދެތިން މައްސަލައަކާއި ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) އިކޮނޮމިކް މިނިސްޓަރު މުހައްމަދު ސައީދުއާ ލިޔުމުން ޖަވާބު ހޯދުމަށް ކުރި ހަތަރު ސުވާލެއްގެ ޖަވާބު ތަޅުމަށް އިއްވުމެވެ.

Advertisement

ގާތްގަނޑަކަށް 10:30 ގައި ފެށި ޖަލްސާގެ ވޯޓު ރަނގަބީލު 20 ވަރަކަށް މިނެޓުގެ ތެރޭގައި ވަނީ ޖަހާފަ އެވެ. އަދި 11:00 ޖެހިއިރު ޖަލްސާ ވަނީ ނިންމާލާފަ އެވެ.

މިއަދު ވޯޓަށް އެހީ ރަޝިއާ އަދި މޮރޮކޯއަށް ކަނޑައަޅާ ނޮން ރެސިޑެންޝަލް ސަފީރުންގެ ނަންތައް ފާސްކުރުމަށެވެ. އެ ވޯޓުގައި ބައިވެރިވީ 57 މެންބަރުންނެވެ. އެއީ މަޖިލީހުގެ 61 އިންސައްތަ މެންބަރުންނެވެ.

މިއީ މި ރޯދަމަހު މަޖިލީހުން ބޭއްވި ފުރަތަމަ ޖަލްސާ އެވެ. ރޯދައަށް މަޖިލިސް ބަންދުކުރަން މަސައްކަތް ކުރި ނަމަވެސް އާންމުންގެ ފާޑުކިޔުން އަމާޒުވެ މަޖިލީހުގެ ގަވާއިދަށް ގެންނަން އުޅުނު ބަދަލު އަނބުރާ ގެންދިޔައީ އެވެ.

Advertisement