ވެރިކަން ހިންގާ، ޕީޕަލްސް ނެޝަނަލް ކޮންގްރެސް (ޕީއެންސީ)ން ވަގު މެމްބަޝިޕް ފޯމު ފުރުން، ރައްޔިތުންގެ މަޖިލީހުގެ ވިލިމާލޭ ދާއިރާގެ މެންބަރު މުހައްމަދު އިސްމާއީލް އަށް ބޮޑު މައްސަލައަކަށް ނުވެ، ފޯމުތަކުގެ ސައްހަކަން ކަށަވަރު ކުރުމަކީ އިލެކްޝަންސް ކޮމިޝަނަށް އޮތް ޒިންމާއެއް ކަމަށް އޭނާ ވިދާޅުވެއްޖެ އެވެ.

"ނޫސްވެރިޔާ އާއިދާގެ ނަމުގައި ހުށަހެޅި ވަގު ފޯމަށް ހެކިވެ ސޮއިކުރީ މުހައްމަދު އިސްމާއީލް" ކަމަށް ބުނެ ނޫހެއްގައި ލިޔެފައިވާ ހަބަރެއްގެ ސްކްރީން ޝޮޓަކާއެކު، ކުރީގެ މިނިސްޓަރު މުހައްމަދު މަލީހު ޖަމާލު އެކްސްގައި "ބޯ ހަލާކު" ކަމަށް ވިދާޅުވެފައިވާ ޕޯސްޓަށް ރައްދު ދެއްވަމުން މުހައްމަދު އިސްމާއީލް ވިދާޅުވީ "ތިޔައުޅުއްވަނީ މޮޔަފުޅުވެގެން، ކިޔޭ ނުކިޔޭއެއް ނޭނގިގެން" ކަމަށެވެ.

ޕީއެންސީން އެތައް ހާސް ވަގު ފޯމެއް އިލެކްޝަންސް ކޮމިޝަނަށް ހުށަހަޅާފައިވާ ކަމަށް ތުހަތު ކުރެވޭއިރު، އެކަން ކަށަވަރު ކުރުމުގެ ޒިންމާއެއް ޕާޓީއަށް އޮތްކަން ގަބޫލު ކުރައްވާކަން އޭނާ ފާހަގަ ކުރައްވާފައެއް ނުވެ އެވެ.

ޕާޓީގެ މެމްބަޝިޕް ފޯމު ފުރާފައި ވަނީ ރައްޔިތު މީހާގެ ރުހުމުގައިތޯ، ނޫންތޯ އިލެކްޝަންސް ކޮމިޝަނުން ބަލައި ކަށަވަރު ކުރާނެ ކަމަށާއި އެނގުމަކާ ނުލާ ފުރާފައިވާ ފޯމެއް ނަމަ ބާތިލް ކުރާނެ ކަމަށް މުހައްމަދު އިސްމާއީލް ވިދާޅުވި އެވެ.

"އިލެކްޝަންސް ކޮމިސަންއަކީ ޕާޓީތަކުން ފުރާ ފޯމްގެ ސައްހަކަން ކަށަވަރު ކުރުމުގެ އެންމެހާ ޒިންމާ މަތިކޮށްފައިވާ ފަރާތަކީ،" އޭނާ ވިދާޅުވެފައިވެ އެވެ.

އޭނާ ގަބޫލު ކުރައްވާ ގޮތުގައި އެކިއެކި ފަރާތްތަކުން ފުރައިގެން ގެންނަ ކޮންމެ ފޯމެއް ސައްހަތޯ ބެލުމުގެ ގާބިލްކަން އެއްވެސް ސިޔާސީ ޕާޓީއެއްގައި ނުހުންނާނެ އެވެ.

ނަމަވެސް، ރާއްޖޭގައި ސިޔާސީ ޕާޓީތައް އުފައްދައި ހިންގަން ފެށި ފަހުން ޕީއެންސީ ފިޔަވައި އެހެން ޕާޓީއަކުން މިހާ ގިނަ ވަގު ފޯމު ހުށަހެޅި މައްސަލައެއް ކުރިން ފެންމަތިވެފައެއް ނުވެ އެވެ.

ޕީއެންސީން ހުށަހެޅި ބައެއް ވަގު ފޯމުތަކުގައި ހެކިވެރިޔަކަށް މުހައްމަދު އިސްމާއީލް ވެސް ސޮއިކުރައްވާފައިވެ އެވެ.

އޭނާ ވިދާޅުވީ ކަމާ ގުޅޭ މުއައްސަސާތަކައް ގޮސް ވަގު ފޯމުގެ މައްސަލަ ހުށަހެޅޭނެ ކަމަށެވެ.

ވަގު ފޯމުގެ މައްސަލަ މި ހަފުތާގައި އިތުރަށް ހޫނުވީ، ވަގު ފޯމު ފުރަމުން ފުރަމުން ގޮސް، ހއ. ވައިކަރަދޫ ދާއިރާގެ ރައްޔިތުން މަޖިލީހުގެ މެންބަރުން ހުސައިން ޒިޔާދު (ފިއްޓޭ) ވެސް ވަގަށް ޕީއެންސީ އަށް ވެއްދިކަން ފަޅައި އެރި ހިސާބުންނެވެ.

ޕީއެންސީ އަށް ވަގަށް މެންބަރުން ވައްދާ ޝަކުވާ ބޮޑުވެފައި ވަނިކޮށް، އެކަން އެގޮތަށް ހިނގާފައިވާ ކަމަށް ޕީއެންސީން އިއްޔެ އެއްބަސްވި އެވެ.

އެފަދަ ބައެއް މައްސަލަތައް ބައެއް ފަރާތްތަކުން ޕޮލިހަށް ހުށަހަޅާފައިވާއިރު، އިލެކްޝަންސް ކޮމިޝަނުން ވެސް ދަނީ އެ މައްސަލަ ބަލަމުންނެވެ.

.