އާންމުންގެ ޒާތީ މައުލޫމާތު ވަގަށް ނަގައި، ސޮއި ފޯޖު ކުރުމަށްފަހު ވެރިކަން ހިންގާ ޕީޕަލްސް ނެޝަނަލް ކޮންގްރެސްއަށް ވަގަށް މީހުން ވައްދާ މައްސަލައިގައި ހޯމް މިނިސްޓަރު އަލީ އިހުސާންއާ ސުވާލު ކުރަން މެންބަރު މީކާއީލް ނަސީމް ހުށަހަޅުއްވައިފި އެވެ.

ގަލޮޅު ދެކުނު ދާއިރާގެ މެންބަރު މީކާއީލް ހުށަހެޅި ވަޒީރުންނާ ސުވާލު ކުރުމާ ބެހޭ ނޯޓިސްގައި ބުނެފައި ވަނީ ޕީއެންސީއަށް މީހުން ވައްދަން ފޯމު ފުރާފައި ވަނީ ޑިޕާޓްމަންޓް އޮފް ނެޝިނަލް ރެޖިސްޓްރޭޝަންގެ މައުލޫމާތު ބޭނުންކޮށްގެން ހާމަވެފައިވާ ކަމަށެވެ.

މީކާއީލް ކުރަން ބޭނުންވާ ސުވާލުގެ ގޮތުގައި ނޯޓިސްގައި ލިޔެފައި ވަނީ އާންމުންގެ ޒާތީ މައުލޫމާތު ރައްކާތެރި ކުރަން އިތުރަށް އަޅަން ގަސްތުކުރާ ފިޔަވަޅުތަކާ ގުޅޭ ގޮތުންނެވެ. އަދި ވަގު ފޯމުތަކުގައި ހޯމް މިނިސްޓްރީގެ ބައެއް އިސް ވެރިން ސޮއިކޮށްފައިވާތީ އެ މުވައްޒަފުންނާމެދު ފިޔަވަޅު އަޅާފައިވޭތޯ ސުވާލު ކުރަން ވެސް މީކާއިން އެދިފައިވެ އެވެ.

ވަގު ފޯމު ފުރައިގެން އާންމުން ޕީއެންސީއަށް ވައްދާ މައްސަލައިގައި ވަރަށް ގިނަ ބަޔަކު ދަނީ ނުރުހުން ފާޅު ކުރަމުންނެވެ. މި ނޫހާ ވާހަކަ ދެއްކި ޕީއެންސީގެ ބައެއް އިސް އޮފިޝަލުން ވިދާޅުވީ ވަގު ފޯމުތަކުގެ އަދަދު އެތައް ހާހަކަށް އަރާނެ ކަމަށެވެ. އަދި ވަގު ފޯމު ފުރުމުގެ މަސައްކަތް ކުރީ ޕީއެންސީގެ ޖަގަހައިގައި ކަމަށް ވެސް އެ ޕާޓީގެ މެންބަރުން ބުނެފައިވެ އެވެ.

ވަގު ފޯމު ފުރައިގެން އެ ޕާޓީއަށް މީހުން ވެއްދި ކަމަށް ޕީއެންސީން މިއަދު ވަނީ އެއްބަސްވެފަ އެވެ.

"މެމްބާޝިޕް ޑްރައިވްގައި ޕާޓީއަށް ހުށަހެޅުނު އެތައް ހާސް ފޯމެއް މި ޕާޓީގެ ފަރާތުން އިލެކްޝަންސް ކޮމިޝަނަށް ހުށަހަޅާފައި ވަނިކޮށް، މަދުން ނަމަވެސް ސައްހަ ނޫން ފޯމުތަކެއް ހުށަހެޅިފައިވާކަން މި ޕާޓީއަށް މިހާރު ވަނީ ފާހަގަ ކުރެވިފައި،" އެ ޕާޓީން ނެރުނު ބަޔާނެއްގައި ބުނެފައިވެ އެވެ.

ސިޔާސީ ޕާޓީތަކުގެ ގާނޫނުގެ 49 ވަނަ މާއްދާގައި ސިޔާސީ ޕާޓީއެއްގެ މެންބަރުކަމަށް، ގަވާއިދާ ހިލާފަށް މީހެއްގެ ނަން ހުށަހަޅައިފިނަމަ އެކަން ކުރި ފަރާތެއް 5،000ރ. އާއި 10،000ރ. އާ ދެމެދުގެ އަދަދަކުން ޖޫރިމަނާ ކުރެވޭނެ އެވެ. އެއީ ގަވާއިދާ ހިލާފަށް ހުށަހެޅި ކޮންމެ ފޯމަކަށް ޖެހޭ އަދަދެވެ.

ދިވެހިރާއްޖޭގެ ގާނޫނުލްއުގޫބާތުގެ 310 ވަނަ މާއްދާގައި އޮންނަނީ، ވަކި ލިޔުމަކީ ވަކި މީހަކު ހެދި އެއްޗެއް ކަމަށް ދެއްކުމަށްޓަކައި ނުވަތަ ވަކި އަސްލެއް އޮތް އެއްޗެއް ކަމަށް ސައްހަ ނޫން ގޮތުގައި ދެއްކުމަށްޓަކައި ލިޔުމެއް އުފެއްދުމާއި، ނަކަލު ކުރުމަކީ ކުށެއް ކަމުގަ އެވެ.

އެކުށަކީ ޖިނާޔާތުގެ ހަތަރު ވަނަ ދަރަޖައިގެ ކުށެއްކަމަށް އެ މާއްދާގެ ނ. ގައި ބުނެ އެވެ. އެހެންވީމާ އެކުށުގެ އަސާސީ އަދަބަކަށްވާނީ އެއް އަހަރާއި ހަތް މަހާއި ހަ ދުވަހަށް ޖަލަށްލުމެވެ. ސައްހަ ނޫން ގޮތުގައި ހުށަހެޅި ކޮންމެ ފޯމަކީ ވަކި ކުށެކެވެ.