ހެންވޭރުގައި ހުންނަ ގެސްޓްހައުސްއެއްގެ ފާހާނާ ތެރޭގައި މަރުވެފައި އޮއްވާ މިދިޔަ ހޮނިހިރު ދުވަހު ފެނުނު މީހާ މަރުވި ސަބަބެއް އަދި ނޭނގޭކަމަށް ފުލުހުން ބުނެފި އެވެ.

ގެސްޓްހައުސް ތެރޭގައި މަރުވެފައި އޮއްވައި ފެނުނީ އައްޑޫ ސިޓީ ހުޅުދޫ، ބޮކަރުމާގެ، އަބްދުﷲ ޒަކީ، 59 އެވެ. އޭނާ ވަނީ އިއްޔެ މެންދުރު ނަމާދަށްފަހު އާސަހަރާގައި ވަޅުލާފަ އެވެ.

ފުލުހުން ބުނީ އެ މީހާގެ މަރުގެ ތަހުގީގުގައި މިހާތަނަށް ބެލި ބެލުމުން، ތުހުމަތު ކުރެވޭ ކަމެއް ފާހަގަ ކުރެވިފައި ނުވާ ކަމަށާއި މަރުވި ގޮތް ވެސް ނޭގޭ ކަމަށެވެ.

"ކޯޒް އޮފް ޑެތު އަދި ނޭނގެ. ތަހުގީގުން މިހާތަނަށް ބެލިބެލުމުން، ތުހުމަތު ކުރެވޭ ކަމެއް ފާހަގަ ކުރެވިފައެއް ނުވޭ،" ފުލުހުން ބުންޏެވެ.

ނަމަވެސް ފުލުހުން ބުނީ އެ މައްސަލައާ ގުޅިގެން ބަލަން ޖެހޭ ކަންކަން ބަލަމުންދާ ކަމަށެވެ.

ހޮސްޕިޓަލާ ހަވާލާދީ ފުލުހުން ބުނީ އެ މީހާ ފާހާނާގައި ވެއްޓިފައި އޮތް ކަމުގެ ރިޕޯޓު ލިބުމާ ގުޅިގެން ހޮސްޕިޓަލަށް ގެންދިޔައިރު ވެސް މަރުވެފައިވާ ކަމަށެވެ.

މާލޭގައި އެކި ތަންތަނުގައި މަރުވެފައި ތިއްބާ ފެންނަ މީހުންގެ އަދަދު ދަނީ އިތުރުވަމުންނެވެ. މިގޮތުން މި އަހަރު ތެރޭގައި ވެސް ހިނގި އެފަދަ މަރުތަކެއްގެ މައްސަލަ ފުލުހުން ދަނީ ބަލަމުންނެވެ.

މީގެ ކުރިންވެސް މަރުވެފައި އޮއްވާ ފެނިގެން އައިޖީއެމް ހޮސްޕިޓަލަށް ޖެނުއަރީ 7، ގައި ގެންދިޔަ މީހެއްގެ ޕޯސްމޯޓަމް ހެދުމަށް ވެސް ނިންމި އެވެ. ފުލުހުން ބުނީ އޭނާގެ ޕޯސްޓްމޯޓަމް ހަދަން ނިންމީ ޝައްކު އުފެދޭ ކަންކަން ހުރުމުން ކަމަށެވެ.