ވަގު ފޯމު ފުރައިގެން ވެރިކަން ކުރާ ޕީއެންސީއަށް މެންބަރުން ވައްދާފައިވާ މައްސަލަ އަނެއްކާ ވެސް ބޮޑުވެއްޖެ އެވެ.
އެކި މީސްމީހުން ނަމުގައި ވަގު ފޯމު ހަދައިގެން، އެ މީސްމީހުންގެ ސިފަ ބަދަލުކޮށްފައި ހުރި ފޮޓޯ ޖަހައިގެން އެތައް ބަޔަކު ޕީއެންސީއަށް ވައްދާފައިވާ ކަމަށް ގިނަ ބަޔަކު އަންނަނީ ސޯޝަލްމީޑިއާގައި ކަންބޮޑުވުން ފާޅު ކުރަމުންނެވެ.
އެގޮތުން ކަންބޮޑުވުން ފާޅުކޮށް ސޯޝަލްމީޑިއާގައި ހިއްސާ ކޮށްފައިވާ ފޯމެއްގައި މަޖިލީހުގެ ޕީއެންސީއަށް ނިސްބަތްވާ މެންބަރުންގެ ސޮއި ވެސް ކޮށްފައިވެ އެވެ.
ގއ. ވިލިނގިލި ދާއިރާގެ ކުރީގެ މެންބަރު، ސައުދު ހުސެއިން އެކްސްގައި ހިއްސާކޮށްފައިވާ ފޯމެއްގައި ހެކިވެރިއެއްގެ ގޮތުގައި ސޮއިކޮށްފައި އޮތީ ވިލިމާލެ ދާއިރާގެ މިހާރުގެ މެންބަރު މުހައްމަދު އިސްމާއިލް އެވެ.
އޭގެއިތުރުން ކަންބޮޑުވުން ހިއްސާކުރި ނާއިލް ކިޔާ މީހަކު ބުނެފައި ވަނީ އޭނާގެ ނަމުގައި ޕީއެންސީއަށް ފުރާފައިވާ ފޯމުގައި ޖަހާފައި ހުރި ފޮޓޯއަކީ އެޑިޓު ކޮށްފައި ހުރި ފޮޓޯއެއް ކަމަށެވެ. އެގޮތުން އެ ފޮޓޯގައި ހުރި ގޮތަށް ދުވަހަކު ވެސް އޭނާ ތުނބުޅި ނުބަހައްޓާ ކަމަށް ނާއިލް ބުނެފައިވެ އެވެ. އަދި އެ ފޯމުގައި ކޮށްފައި އޮތް ސޮޔަކީ ވެސް އޭނާގެ ސޮއި ނޫން ކަމަށް ނާއިލް ބުނެފައިވެ އެވެ.
އޭނާގެ ނަމުގައި ވަގު ފޯމު ފުރި މައްސަލަ ބަލައިދިނުމަށް ނާއިލް ވަނީ ފުލުހުންނާއި އިލެކްޝަންސް ކޮމިޝަނުގެ ކިބައިން އެދިފަ އެވެ.
ވަގު ފޯމުތަކެއް ފުރައިގެން ޕީއެންސީއަށް މީހުން ވައްދާފައިވާ ކަމަށް ބުނާ މައްސަލައާ ގުޅިގެން ހުރި ކަންބޮޑުވުންތައް އިދިކޮޅު އެމްޑީޕީން ވަނީ މިދިޔަ ހަފުތާގައި އިލެކްޝަންސް ކޮމިޝަނާ ހިއްސާ ވެސް ކޮށްފަ އެވެ.
އެމްޑީޕީގެ ގައުމީ މަޖިލިސް މެންބަރުންނާއި ބައެއް މަޖިލިސް މެންބަރުން ހިމެނޭހެން އެ ޕާޓީގެ ޓީމެއް އިލެކްޝަންސް ކޮމިޝަނަށް ގޮސް އެދުނީ ޕީއެންސީން ހުށަހަޅާފައިވާ ފޯމުތައް ޕްރޮސެސް ކުރުން ހުއްޓައިލުމަށްފަހު ހުރިހާ ފޯމެއް އަލުން ބަލައިދިނުމަށެވެ. ނަމަވެސް މިއަދާ ހަމައަށް ވެސް އެ ފޯމުތަކުގެ މައްސަލައިގައި އިލެކްޝަންސްއިން ވަކި ގޮތެއް ނުނިންމަ އެވެ.
ވަގަށް ފޯމު ފުރައިގެން ޕީއެންސީއަށް މީހުން ވެއްދި ކަމަށް ބުނާ މައްސަލައާ ގުޅިގެން ޕީއެންސީން ވެސް އެއްވެސް އެއްޗެއް ރަސްމީކޮށް މިހައިތަނަށް ބުނެފައެއް ނުވެ އެވެ.
ޕީއެންސީން މަސައްކަތް ކުރީ މިދިޔަ އަހަރު ނިމުމުގެ ކުރިން އެ ޕާޓީގެ ދަފުތަރަށް 100،000 މެންބަރުން ހަމަ ކުރުމަށެވެ. އެ އަމާޒަށް ވާސިލުވުމަށްޓަކައި ސަރުކާރުގެ އެކި ވުޒާރާތަކުގެ މުވައްޒަފުން ޓީމު ހަދައިގެން ވެސް އުޅުނެވެ. ނަމަވެސް އަހަރު ނިމުނުއިރު، އެ ޕާޓީއަށް އެ އަދަދަށް މެންބަރުން ހަމަ ކުރެވުނުކަން ރަސްމީ އެއްވެސް ލިޔެކިޔުމަކުން ނުފެނެ އެވެ.
