މެދުކެނޑުމެއް ނެތި ބޯކޮށް ވާރޭ ވެހި މާލޭގެ ބޮޑު ސަރަހައްދެއްގައި ފެން ބޮޑުވެއްޖެ އެވެ.

މެންދަމު 1:00 ހާއިރުން ފެށިގެން ބޯކޮށް ވެހެން ފެށި ވާރޭގައި މެންދަމު 3:00 ހާއިރު ބައެއް މަގުތަކުގައި ހިނގާ ބިނގާވެ، ވެހިކަލް ދުއްވަން އުނދަގޫވާ މިންވަރަށް ފެން ބޮޑުވި ކަމަށް، ފެންބޮޑުވެފައިވާ ގޭބިސީތަކުންނާއި ފިހާރަތަކުން "އަދަދު" ނޫހާ ވާހަކަ ދެއްކި މީހުން ބުންޏެވެ.

އާންމުކޮށް މާލޭގައި އެންމެ ބޮޑަށް ފެން ބޮޑު ވަނީ މާފަންނުގަ އެވެ. މިހާރު ވެސް ވެހެމުން އަންނަ ވާރޭގައި، މާފަންނުގައި ހުރި ބައެއް ގެތަކާއި ފިހާރަތަކުގައި ވަނީ ފެންބޮޑުވެފަ އެވެ.

މަޖީދީމަގުގައި ހުރި ފިހާރައެއްގައި ބޮޑުވެފައިވާ ފެންގަނޑު ޕަންޕު ބޭނުންކޮށްގެން ހިއްކުމުގެ މަސައްކަތް، އެ ފިހާރައިގެ މުވައްޒަފުން ކުރަނީ. -- ފޮޓޯ: އަދަދު

އައިޖީއެމްއެޗް ހުންނަ ކަނބާއައިޝާރަނި ހިނގުމާއި މާފަންނުގެ ބައެއް އެހެން ސަރަހައްދުތަކުގައި 2 ފޫޓަށް ވުރެ މައްޗަށް ފެންބޮޑުވެފައިވެ އެވެ.

ބޮޑުވެފައިވާ ފެންގަނޑު ހިންދުމުގެ މަސައްކަތް ދިވެހި ސިފައިންނާއި ފުލުހުން އަދި ސިޓީ ކައުންސިލް ގުޅިގެން ދަނީ ކުރަމުންނެވެ.

ގޭބިސީތަކުގެ ހާލަތު ގާތުން މިދަނީ މޮނިޓާ ކުރަމުން އަންނަ ކަމަށް ނެޝަނަލް ޑިޒާސްޓަ މެނޭޖްމެންޓު އޮތޯރިޓީން ބުންޏެވެ.