އެމެރިކާގެ ކެލިފޯނިއާ ސްޓޭޓްގައި ރޯވެ އަނދަމުންދާ ބޮޑެތި އަލިފާންގަނޑުތަކުގެ ސަބަބުން ފަސްމީހުން މަރުވެ، ހާހަކަށް ވުރެ ގިނަ އިމާރާތް އަނދައި އަޅިއަށް ވެއްޖެ އެވެ.

އެމެރިކާ އޮފިޝަލުންނާ ހަވާލާދީ ރޮއިޓާސް ބުނި ގޮތުގައި ކެލިފޯނިއާ ސްޓޭޓްގެ ޖަންގަލިތަކުގެ އެކި ސަރަހައްދުތަކުގައި ތިން އަލިފާންގަނޑެއް، މިހާރު ވެސް ކޮންޓްރޯލް ނުވެ އަނދަމުން އެބަ ދެ އެވެ. އެ އަލިފާންގަނޑުތައް މީހުން ދިރިއުޅޭ ސަރަހައްދުތަކަށް ފެތުރިފައި ވާއިރު އެންމެ ބޮޑު ގެއްލުމެއް ލިބެމުންދާ ކަމަށް ރިޕޯޓްކޮށްފައި ވަނީ ލޮސްއެންޖަލިސް އިންނެވެ. އެ ޝަހަރުން 100،000 އަށް ވުރެ ގިނަ މީހުން ގެދޮރު ދޫކޮށް ދާން ޖެހިފައި ވާއިރު އޭގެ ތެރޭގައި ހޮލީވުޑް ސެލެބްރިޓީން ވެސް ހިމެނެ އެވެ.

ކެލިފޯނިއާގައި ރޯވެ އަނދަމުންދާ އަލިފާންގަނޑުތަކުގެ ސަބަބުން، ވިޔަފާރިތަކާއި ގެތައް ހިމެނޭ ގޮތުން ޖުމްލަ 1.5 މިލިޔަން ތަނަކުން ކަރަންޓް ކެނޑިފައިވާ ކަމަށް ވެސް ރިޕޯޓްތައް ބުންޏެވެ.

އެމެރިކާގެ އިދާރާތަކުން ބުނާ ގޮތުގައި މިހާރު އަނދަމުންދާ އަލިފާންގަނޑުތަކަކީ މީގެ ކުރިން ދުވަހަކު ވެސް ރޯނުވާހާ ވަރުގަދަ އަލިފާންގަނޑުތަކެވެ. އަދި އެއިން އެއްވެސް އަލިފާންގަނޑެއްގެ އެންމެ ޕަސެންޓެއް ވެސް މިހައިތަނަށް ކޮންޓްރޯލްކުރެވިފައެއް ނުވެ އެވެ.

ލޮސްއެންޖަލިސްގެ މޭޔަރު ކަރެން ބާސް، މީޑިއާތަކަށް ވިދާޅުވެފައިވާ ގޮތުގައި އަލިފާންގަނޑުތައް ވަރުގަދަވީ ހަނަފަސްކަން ބޮޑުވެފައި ވުމާ އެކު ވައިޖެހޭލެއް ގަދަކަމުންނެވެ.