ގަލޮޅުގައި ހުރި ގެއެއްގައި އަލިފާނުގެ ހާދިސާއެއް ހިނގައިގެން ފުލުހުންނާއި ސިފައިން ހަރަކާތްތެރިވާން ފަށައިފި އެވެ.

އެމްއެންޑީއެފުން ބުނީ އަލިފާން ރޯވެފައި ވަނީ ގ. އުފުރިޔާގެ ހަވަނަ ފަންގިފިލާގައި ކަމަށެވެ. އެ ގޭގައި އަލިފާން ރޯވެފައިވާކަން ފުލުހުން ވެސް ވަނީ ކަށަވަރު ކޮށްދީފަ އެވެ.

އެ ހާދިސާގައި އެއްވެސް މީހަކަށް ބޮޑު އަނިޔާއެއް ނުވެ އެވެ.

ފުލުހުން ބުނީ ގ. އުފުރިޔާގައި އަލިފާނުގެ ހާދިސާއެއް ހިނގި ކަމުގެ ރިޕޯޓު ލިބުނީ މިރޭ 11:27 ހާއިރު ކަމަށެވެ. އެ ވަގުތުން ފެށިގެން ސިފައިންނާއި ފުލުހުން އެ ގެ ކައިރީގައި ހަރަކާތްތެރިވަމުން އަންނަ ކަމަށް ފުލުހުން ބުންޏެވެ.

އެ ސަރަހައްދުގައި ހުރި "އަދަދު" ގެ ނޫސްވެރިޔާ ބުނީ މުޅި އެ ސަރަހައްދަށް ދުންގަނޑު ފެތުރިފައިވާ ކަމަށެވެ. ނަމަވެސް އަލިފާންގަނޑު މާބޮޑަށް ފެތުރިގެން ނުދާ ކަމަށް އޭނާ ބުންޏެވެ.