ދިވެހި ރާއްޖޭގެ ދިފާއީ ބާރުގެ ގާބިލުކަން އިތުރު ކުރުމަށްޓަކައި އިންޑިއާ އާ ގުޅިގެން އަސްކަރީ ތަމްރީނުތަކާއި އެކްސަސައިޒްތައް ހިންގުމަށާއި އެމްއެންޑީއެފަށް ބޭނުންވާ ދިފާއީ އާލާތްތައް އިންޑިއާއިން ހޯދުމާ ގުޅޭ ގޮތުން އެގައުމުގެ ޑިފެންސް މިނިސްޓަރު، ޝްރީ ރަޖްނަތު ސިންހާ ރާއްޖޭގެ ޑިފެންސް މިނިސްޓަރު، ގައްސާން މައުމޫން މަޝްވަރާ ކުރައްވައިފި އެވެ.

ޑިފެންސް މިނިސްޓަރު ކަމުގެ މަގާމާ ހަވާލުވެވަޑައިގެން ފަހުން އިންޑިއާއަށް ކުރައްވާ ފުރަތަމަ ރަސްމީ ދަތުރުގެ ތެރެއިން ޝްރީ ރަޖްނަތު ސިންހާ ގައްސާން ބައްދަލު ކުރެއްވީ މިއަދެވެ.

ޑިފެންސް މިނިސްޓްރީން އެކްސްގައި ކުރި ޕޯސްޓެއްގައި ބުނީ އެ ބައްދަލުވުމުގައި މަޝްވަރާ ކުރީ ދެ ގައުމުގެ ދިފާއީ ގުޅުން އިތުރަށް ބަދަހިކޮށް ވަރުގަދަ ކުރުމާ ގުޅޭ ގޮތުން ކަމަށެވެ. އިތުރު ތަފުސީލެއް ޑިފެންސުން ހާމައެއް ނުކުރެ އެވެ.

ނަމަވެސް އިންޑިއާގެ ބައެއް ނޫސްތަކުން ރިޕޯޓު ކޮށްފައިވާގޮތުގައި މިއަދުގެ ބައްދަލުވުމުގައި ގައްސާން ވަނީ އިންޑިއާ އާ ގުޅިގެން އަސްކަރީ ތަމްރީނުތަކާއި އެކްސަސައިޒްތައް ހިންގުމުގެ އިތުރުން ދިވެހި އަސްކަރިއްޔާއަށް ބޭނުންވާ ބައެއް އާލާތްތައް އިންޑިއާއިން ސަޕްލައި ކޮށްދިނުމާ ގުޅޭ ގޮތުން މަޝްވަރާ ކުރައްވައިފަ އެވެ.

ގައްސާން މައުމޫން އިންޑިއާއަށް ރަސްމީ ދަތުރެއް މިހާރު ކުރައްވަމުން ގެންދަވާއިރު، އޭނާއަކީ އިދިކޮޅު ޕާޓީއެއްގެ ގޮތުގައި ޕީޕީއެމް އާއި ޕީއެންސީ އޮތްއިރު އެ ދެ ޕާޓީން ހިންގި އިންޑިއާ އައުޓް ހަރަކާތުގެ އެންމެ އިސް އެއް ބޭފުޅާ އެވެ.

ނަމަވެސް ވެރިކަމަށް އައުމަށްފަހު އެ ކެމްޕޭނުގެ މައްޗަށް ބިނާކުރި މި ސަރުކާރުގެ ހާރިޖީ ސިޔާސަތުގެ ސަބަބުން، އިންޑިއާ އާއި ރާއްޖެއާ ދެމެދު އޮތް ގުޅުމަށް ބުރޫ އެރުމުގެ ސަބަބުން ދިވެހި ސަރުކާރުން މިހާރު ގެންދަނީ އިންޑިއާ އާ ގުޅުން ބަދަހި ކުރުމަށްޓަކައި މަސައްކަތްތަކެއް ކުރައްވަމުންނެވެ.

އެގޮތުން ފާއިތުވި އަހަރެއްހައި ދުވަސްތެރޭގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު އާއި ސަރުކާރުގެ އެކި ފަންތީގެ ބޭބޭފުޅުން އިންޑިއާއަށް އެތައް ފަހަރެއްގެ މަތިން ވަޑައިގެންފައިވެ އެެވެ.