ގޯލްޑަން ފުޓްސަލް ޗެލެންޖު 2025 ގެ ފ. އަތޮޅު ބުރުގައި ރޭ ކުޅުނު މެޗުން އެންމެ ފަހުގެ އަތޮޅު ޗެމްޕިއަން، ބިލެއްދޫން 3-2 އިން ނިލަންދޫ ބަލިކުރިއިރު، މަގޫދޫން 3-2 އިން ފީއަލިގެ މައްޗަށް ކުރިހޯދައިފި އެވެ.

ފ. އަތޮޅުން މި ފަހަރު ފަސް ޓީމެއް ވާދަކުރާއިރު، މި އަތޮޅުގައި ފަސް ޓީމުގެ މެދުގައި ލީގު ބުރެއް ކުޅުމަށް ފަހު އެންމެ ރަނގަޅު ނަތީޖާ ނެރޭ ދެ ޓީމެއް ފައިނަލަށް ދަތުރުކުރާނެ އެވެ.

ރޭ ކުޅުނު މެޗުގައި ނިލަންދޫން ލީޑުނެގީ ޓީމުގެ ކެޕްޓަން، ފާރޫގު އިސްމާއިލް ޖެހި ގޯލުންނެވެ. އެކަމަކު، މިދިޔަ އަހަރުގެ ގޯލްޑަން ފުޓްސަލް ޗެލެންޖުގެ އެންމެ ގިނަ ގޯލު ޖެހި ކުޅުންތެރިޔާ، މުހައްމަދު ޒީދާން ޒުހުރީ މޮޅު ދެ ގޯލު ޖަހައި، ބިލެއްދޫ ކޮޅަށް ނަތީޖާ އަނބުރާލި އެވެ. ދެ ވަނަ ހާފުގައި ކުޅެން ނުކުމެ، ނިލަންދޫން ވަރަށް ރަނގަަޅަށް މަސައްކަތްކޮށް ލަނޑެއް ޖަހައި، ނަތީޖާ ހަމަހަމަކުރި އެވެ. ހިލޭ ޖެހުމަކުން، ފާރޫގު ދިން ބޯޅަ އަހުމަދު ރިޒްވާން އިސްމާއިލް ވަނީ ގޯލަށް ވައްދާލައިފަ އެވެ.

ފަހު ވަގުތު ކުރި ރަނގަޅު އެޓޭކެއްގައި ބިލެއްދޫ މޮޅުކޮށްދިން ގޯލު ޖެހީ، އެ ޓީމުގެ ކެޕްޓަން، ނަދީފް އިބްރާހިމް އެވެ.

މަގޫދޫ ޓީމަށް ރޭގެ މެޗުގައި ލަނޑުތައް ޖަހައިދިނީ، މޫސާ މާހިލް މިގުދާދު ދެ ގޯލާއި ޖަޒްލާން މާހިރު ގޯލެކެވެ. ފީއަލީން ޒިޔާން ހުސެއިން ގޯލެއް ޖެހިއިރު، އަނެއް ލަނޑަކީ މަގޫދޫގެ މޫސާ އައްސަދު އަންވަރު އަތުން ބައިކޮޅަށް ވަން ގޯލެކެވެ.

ގޯލްޑަން ފުޓްސަލް ޗެލެންޖުގައި މިރޭ ކުޅޭނީ ގއ. އަތޮޅުގެ ހަތަރު މެޗެވެ.

މިރޭ ކުޅެން ހަަމަޖެހިފައިވާ މެޗުތައް:

20:00: ނިލަންދޫ - ދާންދޫ

20:00: ކަނޑުހުޅުދޫ - ގެމަނަފުށި

21:00: ވިލިނގިލި - ދެއްވަދޫ

21:00: ކޮލަމާފުށި - މާމެންދޫ