ރާއްޖޭގައި އެންމެ ގިނަ ޓީމުތައް ބައިވެރިވެގެން ކުރިއަށްގެންދާ ކުޅިވަރު ހަރަކާތަކީ ގޯލްޑަން ފުޓްސަލް ޗެލެންޖް އެވެ. އެ މުބާރާތް ބާއްވާތާ މި ހިނގަނީ ނުވަ ވަނަ އަހަރެވެ. އަހަރުން އަހަރަށް ގޯލްޑަން ފުޓްސަލް ޗެލެންޖުގެ ފެންވަރު ރަނގަޅުވަމުން އަންނައިރު، ބައިވެރިވާ ރަށްރަށުގެ އަދަދު މިދިޔަ އަހަރުތަކުގެ މުބާރާތްތަކަށް ބަލާއިރު ހުރީ ސަތޭކަ އަށް ވުރެ މަތީގަ އެވެ. މިހާތަނަށް މި މުބާރާތުގެ ތާރީހުގައި ވެސް ބެންޗަކުން ފެނުނު ހަމައެކަނި އަންހެން ކޯޗަކީ ރާއްޖޭގެ އެންމެ މޮޅު އަންހެން ފުޓްސަލް ކުޅުންތެރިޔާ، ފާތިމަތު ސާލިޔާ އެވެ.

މި ފަަހަރުގެ ގޯލްޑަން ފުޓްސަލް ޗެލެންޖުގައި ސާލިޔާގެ ކޯޗުކަމުގައި، ށ. ގޮއިދޫން ވާދަކުރާއިރު، އެ ޓީމުގެ ފުރަތަމަ މެޗުގައި ރޭ ވަނީ ބިލެތްފަހި އަތުން 2-1 އިން ބަލިވެފަ އެވެ. ރޭގެ މެޗަށް ފަހު ސާލިޔާ، "އަދަދު ސްޕޯޓްސް" އަށް ދިން އިންޓަވިއުގައި ބުނީ، އެވްރެޖްކޮށް ތައްޔާރީތައް ދިޔަ ގޮތާ ބަލާއިރު، ކަންކަން ރަނގަޅުކަމަށާއި ރަނގަޅުކުރަން ހުރި ކަންކަމަށް މަސައްކަތްކޮށް ކުރިއަށް ހުރި މެޗުތަކަށް ފޯކަސް ކުރާ ކަމަށެވެ.

"ހިތްހަަމަޖެހޭ އެވްރެޖްކޮށް، އަސްލު ތޯހާ ކޯޗުގެ ވަރަށް ބޮޑު ސަޕޯޓަކާ އެއްކޮށް މި ހުރީ ނުކުމެ، ވަރަށް އެކްސްޕީރިއަންސް ކޯޗުން މި އުޅެނީ، އަސްލު ވަރަށް ސަޕޯޓިވް ހުރިހާ ކޯޗުން ވެސް. ދަސްކުރަން ޖެހޭ އޮޕޮޗިއުނިޓީއެއްވީމަ (ނެގީ). ދެން ތޯހާ ކޯޗުގެ ފުލް ސަޕޯޓާ އެކީގައި ނުކުމެ މި ހުރީ،" ސާލިޔާ ބުންޏެވެ.

ކްލަބް މޯލްޑިވްސް ކަޕްގެ އަންހެން ޑިވިޝަން، އެއިޓީން ތާޓީ ފުޓްސަލް ފިއެސްޓާގެ ޗެމްޕިއަންކަން ތިން ފަހަރު ހޯދައި، ރެކޯޑެއް ގާއިމްކުރި އޭރު އެމްޕީއެލް ޓީމުގެ ކެޕްޓަަން ސާލިޔާ ވަނީ އެ މުބާރާތުގެ މޮޅު ކުޅުންތެރިޔާގެ މަގާމު ވެސް ގިނަ ފަހަރުތަކެއްގައި ހޯދައިފަ އެވެ.

ސާލިޔާ ބުނީ، ގޮއިދޫ ޓީމުގެ ކުޅުންތެރިން ބޭނުންވާ ލެވަލަށް ގެންދަން މަޑުމަޑުން ކަންކަން ރަނގަޅުކުރަމުން އަންނަ ކަމަށެވެ.

"ރަށްރަށުގައި އުޅެފައި މި އަންނަނީ، ދެން އެ ކުދިންނަކީ އަނެއްހެން ކޯޗެއް ބޭނުންކޮށްގެން (ގަވާއިދުން) ޕްރެކްޓިސް ކުރާ ބައެއް ނުވީމަ މި ކޮޅަށް އައިސްފައި މި ލިބޭ މަދު ދުވަސްކޮޅެއްގެ ތެރޭގައި، ބޭނުންވާ ވަރަށް މުބާރާތަށް ރެޑީނުވެ މި އަންނަން ޖެހެނީ، އެކަމަކު، މި އުންމީދު ކުރަނީ މުބާރާތް ކުރިއަށްދާ ވަރަކަށް މި ލިބޭ ޕްރެކްޓިސްތަކާ އެކު ރަނގަޅުވެގެންދާނެ ކަމަށް،" ސާލިޔާ ބުންޏެވެ.

ރާއްޖޭގެ އަންހެން ފުޓްބޯޅަ ޓީމުން މިހާތަނަށް ބައިނަލްއަގުވާމީ ފުޓްބޯޅައިގައި ހޯދި އެންމެ ބޮޑު ކާމިޔާބީގައި ވެސް ސާލިޔާގެ ހިއްސާ ބޮޑެވެ. އެއީ، ނޭޕްލާގައި 2019 ގައި ބޭއްވި ސައުތު އޭޝިއަން ގޭމްސްގެ އަންހެން ފުޓްބޯޅަ އިވެންޓުން ރާއްޖޭން ލޯ މެޑަލް ހޯދިއިރު، ޓީމުގެ ކެޕްޓަނަކީ ޝާލިޔާ އެވެ.

ކުޅިވަރު ހިންގުމާއި ކުޅިވަރަށް ހިދުމަތް ކުރުމުގެ ރޮނގުން 2021 ގައި ގައުމީ އިނާމު ވެސް ލިބިފައިވާ ޝާލިޔާ މިހާރު ނުކުމެ އެ ހުރީ ކުޅިވަރުގައި އާ ޗެޕްޓަރެއް ފަށައި، ޗެލެންޖެއް ވެސް ނަގައިގެންނެެވެ.

"(ކޯޗިން) މިއީ ހަމަ ކުރިއަށްދާން ލިބުނު ރަނގަޅު ފުރުސަތެއް. ކުރިއަށް އޮތްތާގައި މި އުންމީދުކުރަނީ ހަމަ (އިތުރު ފުރުސަތު ލިބޭނެ ކަމަށް). އަންހެން ކުއްޖެއް ވީމަ ތަންކޮޅެއް ގިނަ މީހުން އުންމީދުކުރާނެ ޓީމެއް ހަވާލުކުރަން ވެސް. އެ ގޮތަށް ވަރަށް ޝުކުރު އަދާކުރަން ބޭނުން ށ. ގޮއިދޫގެ ކައުންސިލަށާއި (ޓީމު) މެނޭޖްމަންޓަށް. ހާއްސަކޮށް ތޯހާ ކޯޗަށް. ދެން، އުންމީދުކުރަނީ އިތުބާރު ދީގެން އިތުރަށް މި ކަހަލަ ޗާންސް ލިބޭނެ ކަމަށް، ލިބެންޏާމު ހަމަ ކުރިއަށްދާން،" ސާލިޔާ ބުންޏެވެ.

ގޮއިދޫން މި މުބާރާތުގައި ކުޅޭ ދެ ވަނަ މެޗުގައި، ހުކުރު ދުވަހުގެރޭ ޅައިގަމާ ދެކޮޅަށް ނުކުންނާނެ އެވެ.