ގޯލްޑަން ފުޓްސަލް ޗެލެންޖްގެ 2025 ގައި ރޭ ކުޅުނު ތ. އަތޮޅު ގްރޫޕް ސްޓޭޖުގެ މެޗުގައި، މުބާރާތުގެ އެންމެ ކާމިޔާބު ޓީމު ތ. ތިމަރަފުށިން މީގެ ކުރިން އަތޮޅު ޗެމްޕިއަންކަން ހޯދި، ކިނބިދޫ އަތުން 2-1 އިން އުނދަގޫ މޮޅެއް ހޯދައިފި އެވެ.

ތ. އަތޮޅުގެ ގްރޫޕް އޭގައި ތިމަރަފުށްޓާ ދެކޮޅަށް ނުކުތްއިރު، ކިނބިދޫ ޓީމުގެ މުހިންމު ދެ ކުޅުންތެރިންނަށް ނުކުޅެެވެ އެވެ. އެ ގޮތުން، މިދިޔަ އަހަރުގެ މުބާރާތުގައި ކިނބިދޫގެ އިބްރާހިމް އިމްރާހު (އިންމި) އަށް ދެއްކި ރަތް ކާޑުގެ ސަބަބުން އޭނާ ސަސްޕެންޝަންގައި ހުރިއިރު، މުހައްމަދު ސަހާއު (ބޭލް) އަނިޔާގެ ސަބަބުން ނުކުޅެ އެވެ.

ކައުންޓަ އެޓޭކުގައި ކިނބިދޫ އަށް ވެސް ރަނގަޅު ފުރުސަތުތަކެއް ލިބުނު މި މެޗުގައި، ތިމަރަފުށިން ލީޑުނެގީ، އަހުމަދު އަފްލާޒް ޖެހި ގޯލުންނެވެ. ތިމަރަފުށީގެ ގިނަ ހަމަލާތަކެއް ކިނބިދޫ ގޯލު ބެލެހެއްޓި، އަބްދުﷲ ފަޔާޒް (ފަޔާ) ވަނީ މަތަކޮށްފަ އެވެ. ދެ ވަނަ ހާފުގެ ކުރީކޮޅުގައި، އަހުމަދު ހަމްދާން އަތުން ބައިކޮޅަށް ވަން ގޯލުން ތިމަރަފުށިން ލީޑުފުޅާކުރި އެވެ. ކިނބިދޫން ވަނީ އަލީ ފަލާހުގެ ގޯލުން އުންމީދެއް ހޯދައިފަ އެވެ. އަދި މެޗުގެ ފަހު ވަގުތު ތިމަރަފުށީގެ ކެޕްޓަން، އިބްރާހިމް ސިނާހު (ސިނާ) އަށް ދެ ވަނަ ރީނދޫ ކާޑާ އެކު ރަތް ކާޑެއް ދެއްކުމުން، ކިނބިދޫން ކުރިއަށް ޖެހި ގޯލެއް ޖެހޭތޯ މަސައްކަތްކުރި ނަަމަވެސް ތިމަރަފުށިން ލީޑުހިފެހައްޓައި މޮޅުވީ އެވެ.

މި ގްރޫޕްގެ އަނެއް މެޗުން ވިލުފުށިން ވަނީ 2-1 އިން އޮމަދޫ ބަލިކޮށްފަ އެވެ. މީގެ ކުރިން އަތޮޅު ފައިނަލުގައި ކުޅުނު އޮމަދޫގެ ލަނޑު ޖެހީ، މުހައްމަދު ނާބިތު ހުސެއިން އެވެ. ވިލުފުށީގެ ގޯލުތައް ޖެހީ، ސަލްމާން ސަދީފު އާއި ޒަކަރިއްޔާ ޒުހޫރު އިސްމާއިލް އެެވެ.

ތ. އަތޮޅުގެ ގްރޫޕް ބީގައި ވޭމަންޑޫ އަތުން ހިރިލަންދޫ ވަނީ ފަހު ވަގުުތު ލަނޑު ޖަހައި، 3-2 އިން މޮޅުވެފަ އެވެ. މި މެޗުގައި ހިރިލަންދޫން ދެ ގޯލުގެ ލީޑެއް ނެގީ، މުހައްމަދު ޝަމްހާން ޖެހި ގޯލުންނެވެ. އެ ޓީމުގެ ދެ ވަނަ ލަނޑު މުހައްމަދު ނިޝާހް ޖެހިއިރު، ވޭމަންޑޫން ވަނީ ދެ ގޯލު ޖަހައި އެއްވަރުކޮށްފަ އެވެ. ވޭމަންޑޫގެ ފުރަތަމަ ގޯލު އަބްދުﷲ ލަތީފް ޖެހިއިރު، އަނެއް ލަނޑަކީ ހިރިލަންދޫގެ ކީޕަރު، އަހުމަދު ހުޒާމް އަތުން ބައިކޮޅަށް ވަން ގޯލެކެެވެ. ހިރިލަންދޫ މޮޅުކޮށްދިން ގޯލު ޖެހީ މުހައްމަދު ޝާން އެވެ.

މި ގްރޫޕްގެ އަނެއް މެޗުން، ބުރުނިން ވަނީ 4-1 އިން ކަނޑޫދޫ ބަލިކޮށްފަ އެވެ. ބުރުނީގެ މުހައްމަދު ނާހިލް ދެ ގޯލު ޖެހިއިރު، އަނެއް ލަނޑުތައް ޖެހީ، މުހައްމަދު ޝާމް އަދި ހުސެއިން މަމްދޫހު އަހުމަދު އެވެ. ކަނޑޫދޫގެ ހަމައެކަނި ލަނޑު ޖެހީ، މުހައްމަަދު ޒިދާން އީސާ އެވެ.

ގޯލްޑަން ފުޓްސަލް ޗެލެންޖުގައި މިރޭ ކުޅޭ މެޗުތައް:

20:00: ނިލަންދޫ - ބިލެތްދޫ

20:00: މަގޫދޫ - ފީއަލީ

21:00: މަތިވެރި - ތޮއްޑޫ

21:00: ހިމަންދޫ - އުކުޅަސް

22:00: ބޮޑުފޮޅުދޫ - ފެރިދޫ

22:00: ރަސްދޫ - މާޅޮސް