އިންޑިއާއިން ރާއްޖެއަށް ކަނޑައެޅި އާ ސަފީރު, ޖީ ބާލަސުބްރަމާނިއަން އޭނާގެ މަގާމުގެ ފަތްކޮޅު ރައީސް ޑރ. މުހައްމަދު މުއިއްޒުއަށް މިއަދު އަރުވައިފި އެވެ.

ރައީސް އޮފީހުގައި ބޭއްވި ރަސްމިއްޔާތެއްގައި, މަގާމުގެ ފަތްކޮޅާ ހަވާލުވެވަޑައިގަތުމަށް ރައީސް ވަނީ އޭނާއަށް މަރުހަބާ ދަންނަވާފަ އެވެ.

އެއަށް ފަހު ބޭއްވި ބައްދަލުވުމުގައި ދެ ބޭފުޅުން ކުރެއްވި މަޝްވަރާތަކުގައި ސަފީރު ބާލަސުބްރަމަނިއަން ވަނީ އިންޑިއާގެ ބޮޑުވަޒީރު ނަރަންދުރަ މޯދީީ އާއި އެކްސްޓާނަލް އެފެއާޒް މިނިސްޓަރު ޑރ. އެސް ޖައިޝަންކަރުގެ ތަހުނިޔާ ރައީސްއަށް ރައްދުކުރައްވާފަ އެވެ.

މި ބައްދަލުވުމުގައި ދެ ގައުމުގެ ގުޅުން އިތުރަށް ބަދަހިކުރުމާ ގުޅޭ ގޮތުންނާއި އިންޑިއާ ސަރުކާރުގެ އެހީގައި ރާއްޖޭގައި ހިންގަމުން މަޝްރޫއުތަކާއި އެކި ދާއިރާތަކުން ކުރަމުންދާ އިންވެސްޓުމަންޓުތަކުގެ އިތުރުން ދެ ގައުމުގެ ރައްޔިތުންގެ ގުޅުން ވަރުގަދަކުރުމާ ގުޅޭ ގޮތުން ވެސް މަޝްވަރާކުރެއްވި އެވެ.

ރައީސް އޮފީހުން ބުނި ގޮތުގައި މި ބައްދަލުވުން ނިންމަވާލައްވަމުން އިންޑިއާއާ އޮންނަ ގުޅުން ދެމިގެންދާނެ ކަމުގެ ޔަގީންކަން ރައީސް ދެއްވި އެވެ.