ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒަކީ "ޗައިނާގެ" ބޭފުޅެކެވެ.

ދިވެހިރާއްޖޭގެ ވެރިކަމަށް ވަޑައިގަތުމުގެ ކުރިން ވެސް ރައީސް މުއިއްޒު ގެންގުޅުއްވި ވިސްނުމަކީ، އިންޑިއާ ދުރުކޮށް، ޗައިނާއާއެކު ގުޅުން ބޭއްވުމުގެ ވިސްނުމެކެވެ.

ރައީސް މުއިއްޒުގެ ސިޔާސަތުތައް މި ޕެރެގްރާފުގައި ތަފުސީލުނުކޮށްދިން ނަމަވެސް އެމަނިކުފާނު ގެންގުޅުއްވީ ޗައިނާއާ އެއްކޮޅު ސިޔާސަތެއްކަން، ރާއްޖޭގެ ހަބަރުދަބަރު ބަލައި އޮޅުންފިލުވާ ކޮންމެ މީހަކަށް ވެސް ވިސްނޭނެ އެވެ.

މީގެ އަހަރަކާއި އެއް މަހާއި 21 ދުވަސް ކުރިން އެމަނިކުފާނު ވެރިކަމަށް ވަޑައިގަތުމުން ރައީސް މުއިއްޒުގެ ހާރިޖީ ސިޔާސަތު އިންތިހާ ހާމަވެ، އެންމެނަށް ތިލަވި އެވެ. ރައީސް މުއިއްޒު ގެންގުޅުއްވީ ހަމައެކަނި ޗައިނާއާ އެއްކޮޅު ސިޔާސަތެއް ނޫނެވެ. އެމަނިކުފާނު ގެންގުޅުއްވީ އިންޑިއާއާ ދެކޮޅު ސިޔާސަތެކެވެ.

ޖެނުއަރީ 13، 2023، ގައި ރައީސް މުއިއްޒު ޗައިނާއަށް ކުރެއްވި ދަތުރު ނިންމާލެއްވުމަށްފަހު ހުޅުލެއަށް ވަޑައިގެން އިންޑިއާއަށް ދެއްވި ބަހުގެ ހަމަލާތަކާއި އެމަނިކުފާނު ވަޒީފާ ތިބި ބަޔަކު އިންޑިއާއާ ދެކޮޅަށް ހިންގި ސޯޝަލް މީޑިއާ ކެމްޕެއިނާއި ރާއްޖޭގައި ދުއްވާ އިންޑިއާގެ ދެ ހެލިކޮޕްޓަރާއި ޑޯނިއާ މަތިންދާބޯޓު ދުއްވުން ހުއްޓާލުމުން ވެސް ރާއްޖެއިން އިންޑިއާއާމެދު ދެކުނު ގޮތް ސާފެވެ.

"އަޅުގަނޑުމެންނަކީ ވަކި ގައުމެއްގެ ބެކްޔާޑުގައި އޮތް ގައުމެއް ނޫން. އަޅުގަނޑުމެންނަކީ މިނިވަން މުސްތަގިއްލު ގައުމެއް،" އިންޑިއާއަށް ބަހުގެ ހަމަލާތަކެއް ދެއްވަމުން ޖެނުއަރީ 13، ގައި ރައީސް ވިދާޅުވި އެވެ. "ދިވެހިރާއްޖެ ކިތަންމެ ކުޑަ ނަމަވެސް ގަނާ ކުރުމުގެ ހައްގު އެއްވެސް ބަޔަކަށް ނުލިބޭ."

ނަމަވެސް ރައީސް މުއިއްޒުގެ ސަރުކާރުން މިހާރު ދައުވާ ކުރަނީ އެއްވެސް އިރެއްގައި އިންޑިއާއާ ދެކޮޅު ސިޔާސަތެއް ނުގެންގުޅޭ ކަމަށެވެ. ފޮރިން މިނިސްޓަރު އަބްދުﷲ ހަލީލު މިދިޔަ ހޮނިހިރު ދުވަހު އިންޑިއާގެ ނޫހަކަށް ދެއްވި އިންޓަވިއުއެއްގައި ވާހަކަ ދެއްކެވީ އިންޑިއާއަށް ނުހަނު ތައުރީފުކޮށްފަ އެވެ. މިނިސްޓަރުގެ ވާހަކައިން، އިންޑިއާއާ ދެކޮޅު ސިޔާސަތަކުން އިންޑިއާއާ އެއްކޮޅު ވިސްނުމަކަށް ރާއްޖޭގެ ހާރިޖީ ސިޔާސަތު ބަދަލުވެއްޖެކަން ޔަގީނެވެ.

ހާރިޖީ މިނިސްޓަރު ހަލީލުގެ އިންޓަވިއު އަދި މާޒީގެ ހަގީގަތް

އިންޑިއާގެ ސަރުކާރު ހަބަރުތައް ގެނެސްދޭ ވިއޮން ނޫހަށް ހޮނިހިރު ދުވަހު ދެއްވި އިންޓަވިއުގައި ހާރިޖީ ވަޒީރު ހަލީލު ވަނީ، އިންޑިއާއާ ދެކޮޅަށް ސަރުކާރުގެ ވެރިން ހިންގި ކެމްޕެއިނާއި ވެރިކަމަށް ވަޑައިގަތުމަށްފަހު އިންޑިއާއާމެދު ގެންގުޅުނު "ނުރުހުމުގެ" ސިޔާސަތަކީ ހަގީގަތެއް ނޫން ކަމަށް ވިދާޅުވާން މަސައްކަތްކޮށްފަ އެވެ.

އެގޮތުން އެ އިންޓަވިއުގައި ވަޒީރު އެންމެ ބޮޑަށް މަސައްކަތް ކުރެއްވީ އިންޑިއާ އައުޓް ކެމްޕެއިނަކީ ކުރީގެ ރައީސް ޔާމީން އެކަނި ޒިންމާވާންޖެހޭ ހަރަކާތެއް ކަމަށް ދެއްކެވުމަށެވެ.

"އިންޑިއާ އައުޓް ހަރަކާތަކީ އަޅުގަނޑުމެންގެ ކުރީގެ ރައީސް ޔާމީން ކުރިއަށް ގެންދެވި ހަރަކާތެއް. އެމަނިކުފާނު ވަނީ އަޅުގަނޑުމެންނާ މިހާރު މުޅިން ދުރަށްޖެހިފަ،" ވިއޮންގެ ސިދާންތު ސިބާލްއާ ވާހަކަ ދައްކަވަމުން ހަލީލު ވިދާޅުވި އެވެ.

ހަގީގަތް: އިންޑިއާ އައުޓް ހަރަކާތް ލީޑު ކުރެއްވީ ޔާމީންކަމާމެދު އެއްވެސް ޝައްކެއް ނެތެވެ. އެކަމަކު، ޕީޕީއެމްގެ ލީޑާޝިޕް "އިންޑިއާ އައުޓް" ޖެހި ޓީޝާޓްް ލައިގެން މުޒާހަރާތައްކޮށް، އިންޑިއާއަކީ ރާއްޖޭގެ ގައުމީ ސަލާމަތަށް ހުރި ނުރައްކަލެއް ކަމަށް ބުނެ ވާހަކަ ފެތުރީ ރައީސް ޔާމީން މަޖުބޫރުކޮށްގެނެއް ނޫނެވެ.

އިންޑިއާ އައުޓް ކެމްޕެއިނު މާލޭގައި ފެށީ ވެސް ރައީސް ޔާމީން ޖަލުގައި ހުންނަވަނިކޮށެވެ. އެ ކެމްޕެއިން ލީޑު ކުރައްވަނީ އެމަނިކުފާނު ކަމަށް ޔާމީން ވިދާޅުވީ ޖަލުން ނުކުމެ ބޭއްވި ބައްދަލުވުމެއްގެ ތެރެއިންނެވެ.

އެހެންކަމުން، އިންޑިއާ އައުޓް ކެމްޕެއިނުގައި އަދުގެ ސަރުކާރުގެ ވެރިންގެ ޝާމިލުވުން ނެތް ކަމަކަށް ނުބުނެވޭނެ އެވެ. އަދި އެއީ ހަމައެކަނި ރައީސް ޔާމީން ކުރެއްވި ކެމްޕެއިނެއް ކަމަށް ވެސް ނުނިންމޭނެ އެވެ.

ޕީޕީއެމް/ޕީއެންސީ ނޮވެންބަރު 2023 ގައި ވެރިކަމަށް އައުމުގެ ކުރިން، ރާއްޖޭގައި ތިބި އިންޑިއާ ސިފައިންނާއި އިންޑިއާގެ އަސްކަރީ އުޅަނދުތައް ބޭރުކުރަން ގޮވާލައި މުޒާހަރާކުރަނީ. އިންޑިއާ އަސްކަރިއްޔާ ބޭރުކުރުމަކީ ރައްޔިތުން ވެރިކަން ހަވާލުކުރި މައިގަނޑު ސަބަބެއް ކަމަށް ރައީސް މުއިއްޒު ވިދާޅުވާއިރު، އެ ވައުދު އެ މަނިކުފާނު ފުރިއަށް ނުފުއްދަވާ. އަދިވެސް އިންޑިއާގެ އަސްކަރީ އުޅަނދުތައް ރާއްޖޭގައި ގާއިމުކޮށްފައިވޭ. -- ފޮޓޯ: އަދަދު

އެ އިންޓަވިއުގައި ހަލީލު ދެން ދެއްކެވި މުހިންމު އަނެއް ވާހަކައަކީ އެހެން ގައުމަކާއެކު ގުޅުން ބޭއްވި ނަމަވެސް ރާއްޖެ އާއި އިންޑިއާއާ ދެމެދު އޮންނަ ގުޅުމަށް އަސަރު ނުކުރާނެ ކަމަށް ބުނެ ވިދާޅުވި ވާހަކަ އެވެ.

"އެހެން ގައުމުތަކާއެކު ބާއްވާ ގުޅުމުން، އަޅުގަނޑުމެން އިންޑިއާއާއެކު އޮތް ގުޅުމަކަށް އެއްވެސް ބުރުލެއް ނާރާނެ. އިންޑިއާއަކީ އަޅުގަނޑުމެންގެ އެންމެ އަވައްޓެރި ގައުމު، އެންމެ ގާތް ޕާޓްނަރު އަދި ރާއްޖެއިން އެހީއަށް ބޭނުންވި ކޮންމެ ފަހަރަކު އިންޑިއާއިން ވަނީ އެހީތެރިކަން ފޯރުކޮށްދީފަ،" ހާރިޖީ ވަޒީރު ވިދާޅުވި އެވެ.

ހަގީގަތް: ހަލީލު އެހެން ވިދާޅުވި ނަމަވެސް ޑިޕްލޮމަސީއަކީ ހުދާއި ކަޅުން އެހާ ސާފުކޮށް ލިޔެވިގެން ދަތުރު ކުރެވޭނެ ދާއިރާއެއް ނޫނެވެ. ތަޖުރިބާކާރުން ބުނާ ގޮތުގައި ޑިޕްލޮމަސީގައި ބުނާ ވާހަކައަށްވުރެ އަމަލުން ދައްކާ މަންޒަރު މުހިންމެވެ. އެހެންކަމުން ހަލީލު އެ ދެއްކެވި ވާހަކައިގެ ހަގީގަތް ބަލަންޖެހޭނީ އަމަލުން ކަން ހިނގާފައިވާ ގޮތް ދިރާސާކޮށްގެނެވެ.

ޗައިނާ އާއި އިންޑިއާއަކީ ވާދަވެރި ދެ ގައުމެވެ. ދެ ގައުމުން ވެސް މަސައްކަތް ކުރަނީ އިންޑިއާ ކަނޑުގެ ކޮންޓްރޯލް ހޯދުމަށެވެ. އިންޑިއާ އާއި ޗައިނާއިން ރާއްޖެއަށް އެހާ ބޮޑު ސަމާލުކަމެއް ހަގީގަތުގައި ދެނީ ވެސް ދެ ގައުމުގެ ވާދަވެރިކަމުގެ ތެރެއިންނެވެ.

ރައީސް މުއިއްޒު ވެރިކަމަށް ވަޑައިގެންނެވިތާ ކުރީކޮޅު، ލ. ގާދޫގައި ޓްރާންސްޝިޕްމަންޓް ބަނދަރަކާއެކު މެރިޓައިމް ހަބެއް ތަރައްގީ ކުރަން ޗައިނާގެ ކުންފުންޏަކާ އޭޕްރީލް 11، 2024، ގައި ސޮއި ކުރި އެވެ. ނަމަވެސް ފަހުން، ހަމަ އެ ޕްރޮޖެކްޓުތައް ހިންގަން އިންޑިއާ ސަރުކާރާއެކު ވެސް ރާއްޖެއިން އެއްބަސްވުމެއްގައި ސޮއި ކުރި އެވެ.

ގާދޫގައި ޓްރާންސްޝިޕްމަންޓު ބަނދަރެއް ތަރައްގީ ކުރުމުގެ އެއްބަސްވުމުގައި އިންޑިއާއާއެކު ސޮއި ކުރީ ރައީސް މުއިއްޒު އެ ގައުމަށް ވަޑައިގެން އޮކްޓޯބަރު 7، 2024، ގަ އެވެ.

ދެން އޮތީ އުތުރުތިލަފަޅުގެ މައްސަލަ އެވެ. އުތުރުތިލަފަޅުގައި އިންޑިއާއިން ތަރައްގީ ކުރާ މިލިޓަރީ ބަނދަރަށް އެންމެ ބޮޑަށް ފާޑު ވިދާޅުވި އެއް ބޭފުޅަކަށް ރައީސް މުއިއްޒު ވެވަޑައިގަންނަވާނެ އެވެ. ވެރިކަމަށް ވަޑައިގެން ހަމަ އުތުރުތިލަފަޅުގައި ދަނޑުވެރިކަމުގެ ބޮޑު ޕްރޮޖެކްޓަށް ހިންގަން ޗައިނާގެ ކުންފުންޏަކާ މާޗް 28، 2024، ގައި ހަވާލު ކުރި އެވެ.

ޗައިނާ ކުންފުންޏެއް އުތުރުތިލަފަޅަށް އެރުން އިންޑިއާއަކަށް ބަލައެއް ނުގަނެވުނެވެ. ދިވެހި ދައުލަތުން ނަގާފައި އޮތް ލޯނެއް ރޯލްއޯވާ ކުރުމުގެ ވާހަކަތައް ސެޕްޓެމްބަރު، 2024، ގައި ކުރިއަށްދިޔައިރު އިންޑިއާއިން މަޝްވަރާގެ މޭޒަށް ގެނައީ އުތުރުތިލަފަޅު މައްސަލަ އެވެ. އަދި ލޯނު ރޯލްއޯވާ ކުރަން އެއްބަސްވީ އުތުރުތިލަފަޅުން ޗައިނާ ބޭރު ކުރަން ޝަރުތު ކުރުމަށްފަހެވެ.

ލޯނު ރޯލްއޯނާ ކުރި ފަހުން ރައީސް މުއިއްޒު އޮކްޓޯބަރު، 2024، ގައި އިންޑިއާއަށް ކުރެއްވި ދަތުރުގެ ތެރެއިން، އެ ރަށުގައި އިންޑިއާއިން ތަރައްގީ ކުރާ މިލިޓަރީ ބަނދަރު އެޅުމުގެ މަސައްކަތަށް ފުރިހަމައަށް އެއްބާރުލުން ދޭން އެއްބަސްވެ އެގްރިމެންޓެއްގައި ސޮއި ކުރި އެވެ.

އުތުރުތިލަފަޅުގައި އިންޑިއާއިން ކުރާ މަސައްކަތްތަކަށް އެއްބާރުލުން ދޭން ސަރުކާރުން ނިންމިއިރު، އެ މަސައްކަތުގެ އެގްރިމެންޓު ރިވިއު ކުރަން ރައީސް މުއިއްޒު އޮތީ ވައުދުވެވަޑައިގެންފަ އެވެ.

"އެހެންވީމާ ފުރަތަމަ ކަމަކަށް އަޅުގަނޑުމެން ކުރާނެ ކަމަކީ [ޔޫޓީއެފް] އެގްރިމަންޓް ބަލާނީ. ބަލާފައި އެއީ ދިވެހި ގައުމަށް، މިނިވަންކަމަށ،ް ނުރައްކާވާ ކަމަށް ވެއްޖެއްޔާ، ހަމަ އެކަން ބާތިލުކޮށް، އެގްރިމަންޓް އަޅުގަނޑުމެން ބާތިލުކޮށ،ް އުތުރުތިލަފަޅު އިރާދަކުރެއްވިއްޔާ އަޅުގަނޑުމެން ސަލާމަތް ކުރާނަން،" ސެޕްޓެމްބަރު 2، 2023 ގައި ރައީސް ވިދާޅުވެފައި އޮތެވެ.

އެ ދެ މިސާލުން ވެސް އެނގެނީ ގުޅުން ބޭއްވޭނީ އިންޑިއާ އާއި ޗައިނާ ކުރެން އެއް ގައުމަކާއެކު ކަމެވެ. ރައީސް މުހައްމަދު ނަޝީދާއި ރައީސް ޔާމީން އާއި ރައީސް އިބްރާހިމް މުހައްމަދު ސޯލިހު ވެސް ގުޅުން ބޭއްވީ އިންޑިއާއާއެކު އެވެ. ރައީސް މުއިއްޒު ވެސް މިހާރު އެ ވަޑައިގަންނަވަނީ އެ މަގުންނެވެ.

~

ހޮނިހިރު ދުވަހު ހަލީލު ދެއްވި އިންޓަވިއުގައި ޗައިނާއާ ގުޅޭ ގޮތުން ވެސް ކޮންމެވެސް ވަރަކަށް ވާހަކަ ދެއްކެވި އެވެ. ރައީސް މުއިއްޒުގެ ވެރިކަމުގެ ކުރީކޮޅު ރާއްޖެ އައި ޗައިނާގެ ދިރާސާ އުޅަނދާ ބެހޭ ގޮތުން ކޮމެންޓެއް ކުރަން ނޫސްވެރިޔާ އެދުނެވެ. އެ ސުވާލަށް ޖަވާބު ދެއްވަމުން ހަލީލު ވިދާޅުވީ ޗައިނާގެ ދިރާސާ ކުރާ ބޯޓެއް ދުވަހަކު ވެސް ރާއްޖެ އައިސްފައިނުވާ ކަމަށެވެ.

"[ޗައިނާގެ ރިސާޗް އުޅަނދެއް] ރާއްޖެއަކަށް ނާދޭ. އަޅުގަނޑުމެން ޗައިނާ އަދި އެހެން ގައުމަކާއެކު ނަމަވެސް ބާއްވާ ގުޅުމަކުން އިންޑިއާއާ ދެމެދު އޮތް ގުޅުމަކަށް ބުރުލެއް ނާރާނެ،" ހަލީލު ވިދާޅުވި އެވެ.

ހަގީގަތް: ޗައިނާގެ ދިރާސާ އުޅަނދެއް ރާއްޖެ އައެވެ. ޖެނުއަރީ، 2024، އިން ފެށިގެން ފެބްރުއަރީ، 2024، އާ ދޭތެރޭގައި ގާތްގަނޑަކަށް އެއް މަސް ދުވަހު ޗައިނާގެ ދިރާސާ ކުރާ އުޅަނދެއް ރާއްޖޭގައި ހަރަކާތްތެރިވި އެވެ.

ޗައިނާގެ އެންމެ ތަރައްގީ ރިސާޗް އުޅަނދު ޝިއެން ޔެން ހޮން-3 ރާއްޖެ އަންނަ ވާހަކަ ފޮރިން މިނިސްޓްރީއިން ވެސް އޮތީ ރަސްމީކޮށް ބުނެފަ އެވެ.

"ޗައިނާ ސަރުކާރުން ވަނީ އެ އުޅަނދުގައި ތިބި ކުރޫއިން ބަދަލު ކުރުމާއި ސްޓޮކު އައު ކުރުމަށް ރާއްޖޭގައި ބަނދަރުކޮށްދިނުމުގެ ހުއްދައަކަށް ދިވެހި ސަރުކާރުގައި ރަސްމީކޮށް އެދިފައި. އެ އުޅަނދުން ރާއްޖޭގައި އެއްވެސް ދިރާސާއެއް ނުކުރާނެ،" ޖެނުއަރީ 23، 2024، ގައި ފޮރިން މިނިސްޓްރީން ބުންޏެވެ.

~

ޗައިނާގެ ރިސާޗް އުޅަނދު ރާއްޖެ އައި ވާހަކަ ހަލީލު ދޮގު ކުރުން ފާހަގަ ކުރަންޖެހެނީ ހަލީލު ދެން މި ވިދާޅުވާ ވާހަކައިގެ ސަބަބުންނެވެ. އިންޑިއާ އާއި ރާއްޖޭގެ ގުޅުމުގެ ވާހަކަ ދައްކަވަމުން ވިއޮންއަށް ދެއްވި އިންޓަވިއުގައި ހަލީލު ވިދާޅުވީ އިންޑިއާއާއެކު ރާއްޖެއިން ބާއްވަނީ ނިކަން ސާފުސީދާ، ތެދުވެރި ގުޅުމެއް ކަމަށެވެ.

"އިންޑިއާއާއެކީ އަޅުގަނޑުމެން ބާއްވަނީ ވަރަށް ސާފުސީދާ ގުޅުމެއް. އަޅުގަނޑުމެން ތެދުވެރިވަން އިންޑިއާއާއެކު ކުރިއަށްދާން ބޭނުންވާ ގޮތާމެދު. އިންޑިއާއިން ވެސް ގުޅުން ބާއްވަނީ ތެދުވެރިކަމާއެކީ،" ވަޒީރު ވިދާޅުވި އެވެ.

ހަގީގަތް: ތެދުވެރި ގުޅުމެއްގެ ވާހަކަ ހަލީލު ދެއްކެވިއިރު، ޗައިނާގެ ރިސާޗް އުޅަނދު ރާއްޖެ އައި ވާހަކަ ދޮގު ކުރީ ކީއްވެތޯ އެވެ؟ އެހާ ތެދުވެރި ގުޅުމެއް ބާއްވާ ނަމަ އެއްވެސް ދޮގެއް ހަދާކަށް ނުޖެހޭނެ އެވެ.

ރައީސް މުއިއްޒު މިދިޔަ އަހަރު ޗައިނާ އަށް ކުރެއްވި ރަސްމީ ދަތުރުގައި އެ ގައުމުގެ ރައީސްއާ ބައްދަލު ކުރައްވައި ސަލާމްކުރައްވަނީ. -- ފޮޓޯ: ރައީސް އޮފީސް

ޗައިނާ އާއި ރައީސް މުއިއްޒުގެ ގާތް ގުޅުން

ރައީސް މުއިއްޒު އާއި ރައީސް ޝީ ޖިންޕިންގެ ޗައިނާއާ ގުޅުން ބަދަހިވާންފެށީ ކުރީގެ ރައީސް އަބްދުﷲ ޔާމީންގެ ވެރިކަމުގަ އެވެ.

އެ ގުޅުން ބަދަހިވުމަށް މަގުފަހިވީ، ރާއްޖޭގެ ދާހިލީ ކަންކަމާ ބެހުމުގެ ތުހުމަތުކޮށް، އިންޑިއާ ދުރުކޮށް ޗައިނާއާއެކު ގުޅުން ބަދަހި ކުރަން ރައީސް ޔާމީން ފެއްޓެވުމުންނެވެ. ޗައިނާއާއެކު ގުޅުން ބަދަހިވަމުންދިޔައިރު، ރާއްޖެއަށް ބޮޑެތި ޕްރޮޖެކްޓުތަކެއް ޔާމީން ގެންނެވި އެވެ.

ޗައިނާއިން ރާއްޖޭގެ އުމްރާނީ ތަރައްގީގެ މުހިންމު މަސައްކަތްތަކެއް އެއިރު ވެސް ކުރި އެވެ. ފްލެޓު އެޅުމާއި މަގު ހެދުމާއި ސިނަމާލެ ބްރިޖު ހެދުމާއި އެއާޕޯޓުގެ ބޮޑެތި ޕްރޮޖެކްޓުތަކެއް ހިންގި އެވެ. އެ ހުރިހާ މަސައްކަތްތަކެއް ކުރިއިރު، ރައީސް މުއިއްޒު ހުންނެވީ ހައުސިން މިނިސްޓަރުގެ މަގާމުގަ އެވެ.

ރައީސް މުއިއްޒު އާއި ޗައިނާއާ ގާތް ގުޅުމެއް ބޭއްވި މިންވަރަކީ، ޗައިނާ ކުންފުނިތަކުން އެމަނިކުފާނުގެ ބޭންކް އެކައުންޓަށް ފައިސާ ވެސް ޖަމާ ކުރި އެވެ. އެއިރު ރާއްޖޭގައި މަސައްކަތް ކުރި ޗައިނާގެ ދެ ކުންފުންޏަކުން ރައީސް މުއިއްޒުގެ އަމިއްލަ ބޭންކް އެކައުންޓަށް 1.4 މިލިއަން ރުފިޔާއަށްވާ ވަރަށް އެމެރިކާ ޑޮލަރު ޖަމާކޮށްދިނެވެ.

ހައުސިން މިނިސްޓްރީގެ މަގާމުގައި، ދެ ވެރިކަމެއްގައި، ގާތްގަނޑަކަށް ހަތް އަހަރު މަސައްކަތް ކުރެއްވުމަށްފަހު، ރައީސް ސޯލިހުގެ ވެރިކަމުގައި 2021 ވަނަ އަހަރު މާލޭގެ މޭޔަރުގެ މަގާމަށް ރައީސް މުއިއްޒު އިންތިހާބުވެވަޑައިގަތެވެ. އޭގެ ފަހުން ވެސް އެމަނިކުފާނުގެ ޗައިނާއާއެކު ގާތް ގުޅުމެއް ބޭއްވި އެވެ.

ރައީސް މުއިއްޒުގެ މޭޔަރުކަމުގެ ދަށުން 2022 ވަނަ އަހަރު މާލޭގެ މަގުތަކުގައި ޗައިނާއިން ދިން ވަރަށް ޒަމާނީި ޓެކްނޮލޮޖީ ހިމެނޭ ލެޑު ލައިޓުތަކެއް ބެހެއްޓި އެވެ. ޗައިނާގެ އެކި ސިޓީތަކުގެ އިސް ބޭފުޅުން މާލެ ވަޑައިގެން ސިޓީ ކައުންސިލަށް ޒިޔާރަތް ކުރި އެވެ. ޗައިނާގައި ވެރިކަން ކުރާ ކޮމިއުނިސްޓް ޕާޓީ އޮފް ޗައިނާގެ މުހިންމު ބައްދަލުވުމެއްގައި ވެސް ރައީސް މުއިއްޒު ބައިވެރިވެވަޑައިގަތެވެ.

އޭގެ ފަހުން 2023 ގެ ރިޔާސީ އިންތިހާބުގައި އެއިރުގެ އިދިކޮޅު ޕާޓީއިން ވާދަ ކުރެއްވުމުގެ ފުރުސަތު ލިބިވަޑައިގަތުމުން، ރައީސް މުއިއްޒުގެ ކެމްޕެއިން ބިނާ ކުރެއްވީ ޗައިނާއާ ވާދަވެރި އިންޑިއާގެ ސަބަބުން ރާއްޖެއަށް އޮތް "ނުރައްކަލުގެ" މައްޗަށެވެ. ރައީސް މުއިއްޒުގެ ބަހުން ނަމަ، އެއިރު ދިވެހިރާއްޖެ މިސްރާބު ޖަހާފައި ހުރީ "އިންޑިއާގެ ރާއްޖެއަށް" ވުމަށެވެ.

"ދިވެހިރާއްޖެއަކީ ބޭރުމީހުންގެ ރާއްޖެއަކަށް ވާކަށްނުޖެހޭ. އަޅުގަނޑުމެން މިއަދު ލޯ މަރާލައިފިއްޔާ ވެގެންދާނީ، ބޭރު މީހުންގެ، އިންޑިއާ މީހުން ނޫނީ އެހެން ގައުމެއްގެ ބައެއްގެ ރާއްޖެއަކަށް،" ސެޕްޓެމްބަރު ، 2023، ގައި ރައީސް މުއިއްޒު ވިދާޅުވި އެވެ.

~~

ރައީސް މުއިއްޒުގެ ސަރުކާރުން ވެރިކަމަށް ވަޑައިގަތީ އަދި ވެރިކަމުގެ ކުރީކޮޅު ހިންގެވީ ވެސް "އިންޑިއާ އައުޓް" ސިޔާސަތެކެވެ. އެ ސިޔާސަތު ބަދަލުވީ ފަހުންނެވެ. ސިޔާސަތު ބަދަލުވި ނަމަވެސް މާޒީ އާއި ހަގީގަތް ބަދަލެއް ނުވެ އެވެ.