ކައުންސިލްތަކުގެ ސައިޒު ކުޑަ ކުރެއްވުމަށް އެންމެ ފުރަތަމަ ހުށަހެޅުއްވި ހިޔާލުގެ ބަދަލުގައި ކައުންސިލްތަކުގެ އަދަދު މަދު ނުކޮށް އިންތިހާބު ކުރާ މެންބަރުންގެ ތެރެއިން ރައީސް އާއި ނައިބު ރައީސް ފިޔަވައި އެހެން ހުރިހާ މެންބަރުންނަކީ ޕާޓް-ޓައިމް މަގާމުތަކަށް ބަދަލުކުރުމަށް ރައީސް ޑރ. މުހައްމަދު މުއިއްޒު މިރޭ ހިޔާލު ހުށަހަޅުއްވައިފި އެވެ.

ހުވަދޫ އަތޮޅަށް ކުރައްވަމުން ގެންދަވާ ދަތުރުގެ ތެރެއިން މިރޭ ފިޔޯރީގައި ބޭއްވި ޖަލްސާގައި ވާހަކަ ދައްކަވަމުން ރައީސް ވަނީ އެމަނިކުފާނު ޖުލައި 7، 2024 ގައި ކައުންސިލްތަކުގެ ސައިޒު ކުޑަކުރަން ހިޔާލު ހުށަހެޅުމުން އަމާޒުވި ފާޑުކިޔުންތަކާ އެކު އެ ހިޔާލަށް ބަދަލުތަކެއް ގެންނަވާފަ އެވެ.

އެ ރޭ ކައުންސިލްތަކާ ގުޅޭ ގޮތުން ވާހަކަ ދައްކަވަމުން ރައީސް ވިދާޅުވީ މިހާރު ތިބޭ އަދަދަށް އެއްގޮތަކަށް ވެސް ކައުންސިލްތަކަށް މެންބަރުން ބޭނުން ނުވާ ކަމަށެވެ. އެއާއެކު ބައެއް ފަރާތްތަކުން ވަނީ ކައުންސިލްތަކުގެ ސައިޒު ކުޑަކުރުމަކީ ރައްޔިތުންގެ ބައިވެރިވުން ގެއްލޭނެ ކަމެއްކަން ފާހަގަކޮށްފަ އެވެ.

"ކައުންސިލަރުންގެ އަދަދު މަދު ނުކޮށް ފުލް-ޓައިމްކޮށް ތިބޭނީ ކައުންސިލްގެ ރައީސާއި ނައިބު ރައީސްގެ ގޮތުގައި ކަނޑައަޅައި، އިންތިހާބުގައި ފުލްޓައިމް މަގާމަކަށް އިންތިހާބު ކުރާނީ ކައުންސިލްގެ ރައީސްގެ މަގާމަށާއި ކައުންސިލްގެ ނައިބު ރައީސްގެ މަގާމަށް ނަގާ ދެ މީހުން ކަމަށް ކަނޑައަޅައި، ދެން މިހާރު ވެސް ތިބި އަދަދަށް ކައުންސިލަރުން އިންތިހާބު ކުރާނީ،" ރައީސް ވިދާޅުވި އެވެ.

އެގޮތަށް އިންތިހާބު ކުރާ ބާކީ މެންބަރުންނަކީ ކައުންސިލްތަކުގެ ޖަލްސާގައި ބައިވެރިވާ އަދަދަށް ބިނާކޮށް އެލަވަންސެއް ލިބޭ ގޮތަށް ހަމަޖެއްސިދާނެ ކަމަށާއި އޭރު ޑިމޮކްރަޓިކް ރެޕްރެޒެންޓޭޝަނަށް އަސަރު ނުކުރާ ކަމަށް ރައީސް ވިދާޅުވި އެވެ. އެ ބަދަލު ސިޓީ ކައުންސިލްތަކަށް ގެނައުމަށް ވެސް ހުށަހެޅުއްވި އެވެ.

"މިހާރު ތިބި އަދަދަށް ކައުންސިލަރުން ތިބޭނީ. އެހެން ނަމަވެސް އޮފީހުގައި ފުލްޓައިމްކޮށް ގާއިމުވެ އޮފީސް ހިންގަން ތިބޭނީ ރައީސާއި ނައިބު ރައީސް. މިކަން ކުރެވިދާނެ ރައީސްކަމަށް ކުރިމަތިލާ މީހާއާ އެކީގައި ރަނިންމޭޓެއްގެ ގޮތުގައި މީހަކު ކުރިމަތިލައިގެން އެ މީހާއާ އެކީގައި ވޯޓުލާން. އޭރުން އެއް ފިކުރެއްގެ އެއް ސިޔާސީ ހިޔާލެއްގެ ދެ މީހުން ހޮވުމުގެ ފުރުސަތު ލިބޭނެ،" ރައީސް މިރޭ ވިދާޅުވި އެވެ.

އެ ބަދަލު އަންހެނުންގެ ތަރައްގީއަށް މަސައްކަތް ކުރާ ކޮމިޓީތައް އިންތިހާބު ކުރުމުގައި ގެނައުމަށް ވެސް ރައީސް ހުށަހެޅުއްވި އެވެ. އޭރުން ހިންގުމުގެ ހަރަދު ކުޑަ ކުރެވޭނެ ކަމަށާއި އެކަމާ ބެހޭ ބަހުސް އާންމުން ކުރެއްވުމަށް ފަހު ރަނގަޅު ވިސްނުމެއް އައުމަކީ އެދޭ ކަމެއް ކަމަށް ރައީސް ވިދާޅުވި އެވެ.

އޭގެ އިތުރުން، ރައްޔިތުންގެ މަޖިލީހުގެ މެންބަރުންގެ އަދަދު ލިމިޓުކޮށް، މިނިވަން ކޮމިޝަންތަކުގެ އަދަދު މަދު ކުރަން ބޭނުންވެވަޑައިގަންނަވާ ކަމަށް ވެސް މީގެކުރިން ރައީސް ވިދާޅުވެފައިވެ އެވެ.