ގޯލްޑަން ފުޓްސަލް ޗެލެންޖްގެ 2025 ގައި ރޭ ކުޅުނު މެޗުތަކުން، ހދ. އަތޮޅުގެ އެންމެ ފަހުގެ ޗެމްޕިއަން، ނައިވާދޫ އާއި ހއ. އަތޮޅުގެ އެންމެ ފަހުގެ ޗެމްޕިއަން، ދިއްދޫ އިން ރަނގަޅު މޮޅަކުން މި ފަހަރުގެ މުބާރާތް ފަށައިފި އެވެ.

އެ ގޮތުން، ހދ. އަތޮޅުގެ ގްރޫޕް ބީގައި ރޭ ކުޅުނު މެޗުން ވައިކަރަދޫ އަތުން ނައިވާދޫ މޮޅުވީ 4-0 އިންނެވެ. އެ ޓީމުގެ އަބްދުﷲ ވިޝާމް ހެޓްރިކެއް ހެދިއިރު، އަނެއް ގޯލު ޖެހީ އިސްމާއިލް ވަހީދު އެވެ. ހއ. އަތޮޅުގެ ގްރޫޕް ބީގައި މުރައިދޫ އަތުން ދިއްދޫ 2-0 އިން މޮޅުވިއިރު، ލަނޑުތައް ޖެހީ ހުސެއިން ސިފާހު އާއި އަހުޒަމް ރަޝީދު އެވެ.

ހދ. އަތޮޅުގެ ގްރޫޕް ބީގައި ރޭ ނެއްލައިދޫ އަތުން ކުމުންދޫ މޮޅުވީ 4-3 އިންނެވެ. މެޗުގައި ކުމުންދޫގެ ގޯލުތައް ޖެހީ މުޝްރިފު މުހައްމަދު ދެ ގޯލާއި ފަހުމާން އަބްދުލް ހަމީދު އާއި އަހުމަދު ޝަރީފް ގޯލެވެ. ނެއްލައިދޫގެ ލަނޑުތައް ޖެހީ އަލީ ހަސަން، މުހައްމަދު ފާރިސް އަދި މުހައްމަދު ސާވިން އެވެ. ހއ. އަތޮޅުގެ ގްރޫޕް ބީގައި ވަށަފަރާއި އުތީމު ކުޅުނު މެޗު ނިމުނީ 2-2 އިން އެއްވަރުވެގެންނެވެ. އުތީމުގެ ދެ ގޯލު ވެސް ޖެހީ އަހުމަދު އައިހަމް އެވެ. އަދި ވަށަފަރުގެ ލަނޑުތައް ޖެހީ އިބްރާހިމް އަތީގް ހަސަން އާއި އިބްރާހިމް ސަނޫން އެެވެ.

ދިއްދޫ ޓީމުން ރޭގެ މެޗުގައި ލަނޑު ޖެހުމަށް ފަހު އުފާފާޅުކުރަނީ،---- ފޮޓޯ: އިމޭޖަސް،އެމްވީ

ހއ. ގްރޫޕް އޭގައި ރޭ ބާރަށުން ވަނީ 4-2 އިން ހޯރަފުށި ބަލިކޮށްފަ އެވެ. މި މެޗުގައި ބާރަށުގެ މުހައްމަދު މާއިޒް ޔޫސުފް ދެ ގޯލު ޖެހިއިރު، ހަސަން ސޮލާހު (ހައްޓެ) އަދި އަހުމަދު ޝަޒީމް ވަނީ ގޯލު ޖަހައިފަ އެެވެ. ހޯރަފުށީގެ ދެ ގޯލު ވެސް ޖެހީ މުހައްމަދު ރައްޔާން ބިން އަބްދުﷲ އާމިރު އެވެ. މި ގްރޫޕްގެ އަނެއް މެޗުން ކެލާ އިން ވަނީ 2-0 އިން މާރަންދޫ ބަލިކޮށްފަ އެވެ. ލަނޑުތައް ޖެހީ، އަހުމަދު ވަހީދު އާއި ގާސިމް އަތޫފް އެވެ.

ހދ. އަތޮޅުގެ ގްރޫޕް އޭގައި ރޭ މަކުނުދޫން ވަނީ 3-2 އިން ނޮޅިވަރަންފަރު ބަލިކޮށްފަ އެެވެ. މަކުނުދޫގެ ގޯލުތައް ޖެހީ ނުހާދު ފައުޒީ ހެޓްރިކެކެެވެ. ނޮޅިވަރަންފަރުގެ ގޯލުތައް ޖެހީ އިބްރާހިމް ވަހީދު ހަސަން (އިއްބެ) އާއި އަކުރަމް އަބްދުލް ރަޝީދު އެވެ. މި ގްރޫޕުގެ އަނެއް މެޗުން، ހަނިމާދޫ އަތުން ނޭކުރެންދޫ މޮޅުވީ 1-0 އިންނެވެ. މި މެޗުގެ ނޭކުރެންދޫގެ ހަމައެކަނި ލަނޑު ޖެހީ މުހައްމަދު ވިލްފް އެވެ.

ގޯލްޑަން ފުޓްސަލް ޗެލެންޖްގައި މިރޭ ކުޅޭނެ މެޗުތައް:

20:00: ށ. މަރޮށި - ށ. ކަނޑިތީމު

20:00: ށ. ފޭދޫ - ށ. މިލަންދޫ

21:00: ށ. ގޮއިދޫ - ށ. ބިލެއްފަހި

21:00: ށ. ނަރުދޫ - ށ. ޅައިމަގު

22:00: ތ. ވިލުފުށި - ތ. އޮމަދޫ

22:00: ތ. ކިނބިދޫ - ތ. ތިމަރަފުށި

23:00: ތ. ހިރިލަންދޫ - ތ. ވޭމަންޑޫ

23:00: ތ. ބުރުނި - ތ. ކަނޑޫދޫ