މިދިޔަ އަހަރަކީ ފުޓްސަލް އާއި ފުޓްބޯޅައިގައި، ބ. އޭދަފުށްޓަށް ކާމިޔާބު އަހަރެއް ކަމަށާއި އެކަން ދަމަހައްޓަން މި އަހަރުގެ މުބާރާތްތަކުގައި ގޮންޖެހުން ބޮޑުވާއިރު އެ އަށް ތައްޔާރުވާން ޖެހޭނެ ކަމަށް އޭދަފުށީ ފުޓްސަލް ޓީމުގެ ކޯޗު އަބްދުﷲ ނަސީރު (އަބޯ) ބުނެފި އެވެ.

އޭދަފުށިން މިދިޔަ އަހަރު ވަނީ ފުޓްސަލްގައި ގޯލްޑަން ފުޓްސަލް ޗެލެންޖްގެ ތަށްޓާއި ބެޓާ އިން ބާ ފުޓްސަލް މުބާރާތުގެ ތަށި ހޯދުމުގެ އިތުރުން، އަތޮޅުތަކުގެ ޓީމުތަކަށް ބޭއްވި، ނައިންޓީ ޕްލަސް ގޯލްޑް ކަޕް ފުޓްބޯޅަ މުބާރާތް ކާމިޔާބުކޮށްފަ އެވެ.

ގޯލްޑަން ފުޓްސަލް ޗެރިޓީ ޝީލްޑް މެޗުގައި ރޭ އޭދަފުށިން ލ. ގަމާ ދެކޮޅަށް ކުޅުނު މެޗުން ވަނީ 1-0 އިން ބަލިވެފަ އެވެ. މިއާ އެކު، މި ފަހަރުގެ މުބާރާތުގައި އަދި ޖުމްލަކޮށް، މިދިޔަ އަހަރު އޭދަފުށިން މި ހޯދި ކާމިޔާބީތަކުގެ ސަބަބުން އަންނަ ޕްރެޝަރު ބޮޑުވާނެތޯ، އަބޯއާ ވަނީ ސުވާލު އަމާޒުވެފަ އެވެ.

"ފުރަތަމަ ހަވާލުވެފައި ވެސް ބުނެލިން މިދިޔަ އަހަރު ތި މީހުން ތި ނެގި ތަށިތަކާ އެކު ތި މީހުންނަށް މި އަހަރު ވަރަށް ބޮޑެތި ގޮންޖެހުންތަކާ ބޮޑެތި ކަންތައްތަކާ އަންނާނެއޭ. އެހެންވީމަ އެ އެއްޗެއްސަށް ވެސް ޓެކަލްކޮށްގެން މި އަހަރު ނުކުންނަން ޖެހޭނީ. ކޯޗަށް ހީވަނީ ގޯހެއް ނޫން މި މެޗު ވެސް ދިޔަ ގޮތް، އަހަރެމެންނަށް ވެސް ޗާންސް ލިބުނު އެ މީހުންނަށް އެ ލިބުނު ޗާންސް ނިންމާލީ،" ރޭގެ މެޗަށް ފަހު، އަބޯ ބުންޏެވެ.

އަބޯ ބުނީ، މި ފަހަރުގެ ގޯލްޑަން ފުޓްސަލް ޗެލެންޖުގެ ޗެރިޓީ މެޗަށް އޭދަފުށްޓަށް އެންމެ ރަނގަޅަށް ތައްޔާރުނުވެވުނީ، ގޯލްޑް ކަޕް ނިމުނު ފަހުން، ޗެރިޓީ މެޗާ ދެމެދު ދިޔަ މުއްދަތު ކުޑަވުމުގެ އިތުރުން، އޭނާ އަށް ވެސް ރަށުންބޭރުގައި ހުންނަން ޖެހުން ކަމަށެވެ. އަދި މިދިޔަ ބުރާސްފަތި ދުވަހު ރާއްޖެ އަައިސް، ޗެރިޓީ ޝީލްޑް މެޗުގައި ކުޅުނީ އެންމެ ދެ ޕްރެކްޓިސް ކޮށްފައި ކަމަށާއި އެ ހުރިހާ ކަމަކަށް ބަލާއިރު، ރޭ ގަމާ ދެކޮޅަށް ދެއްކުނީ އެވްރެޖް ކުޅުމެއް ކަމަށެވެ.

އޭދަފުށީ ޓީމުގެ އެންމެ ސީނިއާ ދެ ކުޅުންތެރިން ކަމަށްވާ އިޝާން އިބްރާހިމް (ސައްޓު) އާއި މުހައްމަދު ފާސިރު (ފާއްޓޭ) މިދިޔަ އަހަރު ހުއްޓުމެއް ނެތި ގިނަ މުބާރާތްތަކެއް ކުޅެފައިވާތީ، އެ ދެ ކުޅުންތެރިންގެ ވަރުބަލިކަން ކޮންމެ ވެސް ވަރަކަށް ހުންނާނެކަން ގަބޫލުކުރާ ކަމަށް އަބޯ ވަނީ ބުުނެފަ އެވެ. އެކަމަކު، އެ ދެ ކުޅުންތެރިން މަސައްކަތް ކުރަނީ އެ ކަންކަން ނުދައްކައި، ވީ އެންމެ ރަނގަޅަށް ކުޅެން ކަމަށް ވެސް އަބޯ ފާހަގަކުރި އެވެ.

"ފާހަގަނުކުރި ކަމުގައި ވިޔަސް، ސައްޓު އާއި ފާއްޓޭގެ ވަރުބަލިކަން އެބަހުރި. އެ ތަން ނުދައްކާ އެ ކުޅެނީ، ފުޓްސަލް ކުޅެފައި ބޮޑު ފުޓްބޯޅައިގައި މަސް ދުވަސް އުޅުނީމަ މި ޓަޗް އަންނަން އުނދަގޫވާނެ. އެ އެއް ދެން ތިބި ކުޅުންތެރިންނަށް ނުދައްކާ އެ މަސައްކަތް ކުރީ ރަނގަޅަށް ކުޅެން. އިރާދަކުރެއްވިއްޔާ ރަނގަޅު ޕްރެކްޓިސްތަކަކާ އެކު ވަރަށް ރަނގަޅުވާނެ ހަމަ. މިހާރު މި ވިސްނަނީ އަތޮޅު މުބާރާތުގެ ފުރަތަމަ މެޗު ނެގުމަށް ރަނގަޅު ފައިޓެއް ދެވޭނެ،" އަބޯ ބުންޏެވެ.

މިދިޔަ އަހަރު ރާއްޖޭގެ ފުރަތަމަ ޑިވިޝަނުގެ ކުޅުން ނެތް ވަގުތަކާ ގޯލްޑަން ފުޓްސަލް ޗެލެންޖް ދިމާވުމުން، ފުރަތަމަ ޑިވިޝަންގެ ކްލަބްތަކަށް ކުޅޭ ކުޅުންތެރިން އޭދަފުށީ ޓީމުގައި ހިމެނި ތަފާތު ދެއްކި އެވެ. ހާއްސަކޮށް، މާޒިޔާ ސްޕޯޓްސް އެންޑް ރެކްރިއޭޝަނުގައި ހިމެނޭ އޭދަފުށީގެ ހައިޝަމް ހަސަން (ބިޑި)، ހަމްޒާ މުހައްމަދު (ހަމްޕު) އަދި އަލީ ފާސިރު (ސެންޓޭ) އެވެ. މި އަހަރު، އެ ކުޅުންތެރިން ނުލައި ކުޅެން ޖެހޭއިރު، އޭދަފުށީ ޓީމަށް ބަދަލުތަކެއް އަންނާނެ އެވެ.

"މާޒިޔާ ކުޅުންތެރިންތަކަށް ނުކުޅެވޭތީ އެތަނަށް ޖެހޭނެ އިތުރަށް ކުޅުންތެރިން ނަގަން، އެ ތަންތަނަށް އެކޮޅުގައި އޮތް އަތޮޅު މުބާރާތުގެ ތެރެއިން ނަގާފައި ހުރި ކުޅުންތެރިން މި ތިބީ، އަދިވެސް ފެންނާނެ ތިނެއް ނޫނީ ހަތަރު އިތުރު ކުޅުންތެރިން އާ ކުޅުންތެރިންނާ އެކު ރަނގަޅުވާނެ،" އަބޯ ބުންޏެވެ.

އޭދަފުށިން މި މަހު 17 ވަނަ ދުވަހު ކުޅޭ މެޗުގައި ބައްދަލުކުރާނީ ތުޅާދޫއާ އެވެ. މި އަތޮޅުން ދެން ބައިވެރިވީ ފެހެންދޫ އެވެ.