ގޯލްޑަން ފުޓްސަލް ޗެލެންޖުން ފެންނަނީ ހަގީގަތުގައި ރާއްޖޭގެ ފުޓްސަލް އަށް އޮންނަ ފޯރި ކަމަށާއި ރަށްރަށުން މުބާރާތަށް ތައްޔާރުވާ މިންވަރުން އެކަން އެނގޭ ކަމަށް ގަމު ޓީމުގެ ތަރި، އަބްދުﷲ ޖުނައިދު (ޖެންނޭ) ބުނެފި އެވެ.

ގޯލްޑަން ފުޓްސަލް ޗެލެންޖް ފެށުމުގެ ގޮތުން، ކުޅޭ ގޯލްޑަން ޗެރިޓީ ޝީލްޑް މެޗުގައި ރޭ ގަމުން ވަނީ 1-0 އިން ބ. އޭދަފުށި ބަލިކޮށްފަ އެވެ. ގަމުން މި ވަނީ ޖެހިޖެހިގެން ދެ ވަނަ އަހަރު ޝީލްޑް ކާމިޔާބުކޮށްފަ އެވެ. މިދިިޔަ އަހަރު ޝީލްޑް މެޗުގައި، ތ. ތިމަރަފުށި އަތުން މޮޅުވީ 3-2 އިންނެވެ.

ރޭގެ މެޗުގައި އޭދަފުށި އަތުން ގަން މޮޅުވިއިރު މެޗުގެ ހަމައެކަނި ލަނޑު ޖެހީ ދެ ވަނަ ހާފުގައި ޖެންނޭ އެވެ.

"އެއް މަސް ވެސް ނުލިބޭ ހަމަ އެންމެން އެއްކޮށް ތިބެގެން ޕްރެކްޓިސް ކޮށްލަން. ގާތްގަނޑަކަށް ތިން ހަފްތާ ވަރު ލިބުނީ، ދެން ރެޑީ ވެވުނު ވަރާ ބަލާފައި ރަނގަޅު އަސްލު،" ރޭގެ މެޗަށް ފަހު، މެޗުގެ މޮޅު ކުޅުންތެރިޔާގެ މަގާމު ހޯދި ޖެންނޭ ބުންޏެވެ.

ރޭ ކުޅުނު މެޗަށް ނުކުތްއިރު، ގަން ޓީމުގެ މުހިންމު ދެ ކުޅުންތެރިން ކަމަށްވާ ކެޕްޓަން، ހުސެއިން ޝަރީފް (އޮންލީ) އާއި އަލީ ޝާމިސް (ތޮއްޕޭ) ހުރީ އަނިޔާގަ އެވެ. ޖެންނޭ ބުނީ، އެ ވަގުތު ކުޅެން ޓީމުގައި "ނެތް ޕްލޭޔަރެއް ކައުންޓެއް ނުކުރެވޭނެ" ކަމަށާއި ޓީމުގައި ތިބި އެންމެ ޒުވާން ކުޅުންތެރިންނާ އެކު އައީ ތައްޔާރުވެގެން ކަމަށެެވެ.

މިދިޔަ އަހަރުގެ ފައިނަލުގައި އޭދަފުށި އަތުން ގަން 4-2 އިން ބަލިވެ، ތަށި ދިފާއުކުރުމުގެ ފުރުސަތު ގެއްލުނުއިރު، މި ފަަހަރުގެ ގޯލްޑަން ފަށަން އޭދަފުށި އަތުން މޮޅެއް ލިބުމަކީ ރަނގަޅެއްގެ ގޮތުގައި ޖެންނޭ ދެކެ އެެވެ.

"ކުޅިވަރުގައި ދާނެ އެ ކަހަލަ ދުވަސް ވެސް (މިދިޔަ އަހަރުގެ ފައިނަލުން ބަލިވި ކަހަލަ ދުވަސް). ހަމަ އަދި ވެސް ގަބޫލުނުކުރެވޭ އެއްޗެއް އެ ބައްޔަކީ. އެ ކަންތައްތައް ރަނގަޅުކޮށްގެން އިރާދަކުރެއްވިއްޔާ މި އަހަރު ޓީމު ނުކުންނާނީ ފުރަތަމަ ފެށުން ވެސް މިދިޔައީ ބޭނުންވި ގޮތަށް،" ޖެންނޭ ބުންޏެވެ.

މި ފަހަރުގެ ގޯލްޑަން ފުޓްސަލް ޗެލެންޖްގައި ވެސް 129 ޓީމެއް ވާދަކުރާއިރު، ޓީމުތަކުން އަންނަނީ މުބާރާތަށް ވަރަށް ރަނގަޅަށް ދުރާލާ ތައްޔާރުވެ، ރަށު ކައުންސިލާއި ސްޕޮންސަރުންތަކެއްގެ އެހީގައި ބޮޑު ހަރަދުތަކެއް ކުރަމުންނެވެ.

"އަސްލު މި އަށް އޮންނަ ފޯރި މި ފެނިގެންދަނީ، އެކި ރަށްރަށުން ވެސް ދުރާލާ ތައްޔާރުވެގެން މާލެ އަައިސް ޕްރެކްޓިސްތަކެއް ކޮށް ރެޑީ މި ވަނީ، އެންމެން ޓާގެޓްތަކެއް ބޭނުންވެގެން، ކުޅުންތެރިންތަކެއް އުފައްދައިގެން އަންނަތަން މި ފެންނަނީ،" ޖެންނޭ ބުންޏެވެ.

ގޯލްޑަން ފުޓްސަލް ޗެލެންޖްގެ މި އަހަރުގެ މުބާރާތް މިރޭ ފެށިގެންދާނީ ހއ. އާއި ހދގެ މެޗުތަކުންނެވެ.