ގޯލްޑަން ފުޓްސަލް ޗެރިޓީ ޝީލްޑް މެޗުގައި، ރޭ ބ. އޭދަފުށި އަތުން 1-0 އިން މޮޅުވެ، ލ. ގަމުން ޝީލްޑް ދިފާއުކުރި މެޗުގައި ކަންކަން ދިޔައީ ގާތްގަނޑަކަށް ބޭނުންވި ގޮތަށް ޕްލޭނާ ވެސް އެއްގޮތަށް ކަމަށާއި އަނިޔާގެ މައްސަލަތަކެއް ދިމާވި ނަމަވެސް ގަން މި އަހަރު ވެސް ވަރުގަދަވާނެ ކަމަށް ގަން ފުޓްސަލް ޓީމުގެ ކޯޗު އިސްމާއިލް ޝަރީފް (އިއްސެ) ބުނެފި އެވެ.

ކުރު މުއްދަތެއްގެ ޕްރެކްޓިހަަށް ފަހު ގަމާއި އޭދަފުށި ރޭ ކުޅުނު މެޗު ދިޔައީ ދާދި ހަމަހަމަކޮށެވެ. މެޗުގެ ފަރަގަކަށްވީ ގަމު ޓީމުގެ ތަރި، އަބްދުﷲ ޖުނައިދު (ޖެންނޭ) ޖެހި ގޯލެވެ.

"ލިބުނު ދުވަސްކޮޅާ ބަލާފައި ފުދޭ ވަރަކަށް ޕްރެޕެއާ (ތައްޔާރު) ވެލިން، ދެން ހަމަ މި މެޗަށް ފޯކަސް ކޮށްގެން ރެޑީވެލައިގެން އައީ. އެކަމަކު، ވެސް އޭދަފުށްޓާ ކުޅެންވީމަ ހަމަ އިންނާނެތާ ޕްރެޝަރެއް ކޮންމެހެނެއް ވިޔަސް އެ ކަހަލަ ޕްރެޝަރު ބައެއް ވަގުތުތައް އައި. ޖުމްލަކޮށް މެޗު ހަމަ ހިތްހަމަޖެހޭ،" ރޭގެ މެޗަށް ފަހު، "އަދަދު ސްޕޯޓްސް" އަށް ދިން އިންޓަވިއުއެއްގައި އިއްސެ ބުންޏެވެ.

ރެހެންދި ފުޓްސަލް ދަނޑުގައި ރޭ ކުޅުނު މެޗަށް ނުކުތްއިރު، ގަން ޓީމުގެ މުހިންމު ދެ ކުޅުންތެރިން ކަމަށްވާ ކެޕްޓަން، ހުސެއިން ޝަރީފް (އޮންލީ) އާއި އަލީ ޝާމިސް (ތޮއްޕޭ) ހުރީ އަނިޔާގަ އެވެ. އަނެއްކޮޅުން މިދިޔަ އަހަރު އޭދަފުށްޓަށް ފައިނަލުގައި 4-2 އިން ގަން ބަލިކޮށް، ގޯލްޑަން ފުޓްސަލް ޗެލެންޖުގެ ތަށި ހޯދައިދިން ޓީމުގެ ތިން ކުޅުންތެރިން ކަމަށްވާ އަލީ ފާސިރު (ސެންޓޭ)، ހައިޝަމް ހަސަން (ބިޑި) އަދި ހަމްޒާ މުހައްމަދު (ހަމްޕު) އަށް މާޒިޔާ ސްޕޯޓްސް އެންޑް ރެކްރިއޭޝަނުން ރިލީސް ދޭން އެއްބަސްނުވުމުން ނުކުޅެ އެވެ.

އިއްސެ ބުނީ ދެ ޓީމުން ވެސް މުހިންމު ކުޅުންތެރިންތަކެއް ނެތި ކުޅެން ޖެހުނުއިރު އޭގެ ބޮޑު ގެއްލުން ކުރިމަތިވީ އޭދަފުށްޓަށް ކަމަށެވެ.

"އަޅުގަނޑުމެންނަށް މާ ކުރިން ވެސް އިނގޭ މިއަދު ޓީމުގައި ނުހިމެނެނީ ކޮން ޕްލޭޔަރުންނެއްކަން، އެކަމަކު އޭދަފުށްޓަށް އަޅުގަނޑަށް ހީވަނީ އެ ކަންތައް އެ އައީ ތަންކޮޅެއް ފަހު ވަގުތު ހެން. އަޅުގަނޑަށް ލަފާކުރަނީ އޭދަފުށްޓަށް އޭގެ އަސަރު ކުރި ކަމަށް. އަޅުގަނޑުމެންގެ އައީ ރެޑީވެގެން ހަމަ މުޅި ބްރެޒިލްގެ ހުރިހާ ކުޅުންތެރިންނާ އެކު ކުޅެ ތަށި ނަގާލަން ވެގެން އައީ، އެ ފުރުސަތު ކަންދިމާކުރި ގޮތުން ނުލިބުނީ. އެހެންވީމަ އަޅުގަނޑުމެން ރާވައިގެން ދިޔަ ގޮތަށް މެޗު އިރާދަކުރެއްވިއްޔާ ވިން ކޮށްލެވިފައި މީނީ،" އިއްސެ ބުންޏެވެ.

ގަން ޓީމު މިދިޔަ އަހަަރެކޭ އެއްގޮތަށް ޓާގެޓްތަކަކާ އެކު ނުކުތްއިރު، އިއްސެ ބުނީ، ޓީމު ވެސް ރަނގަޅުވާނެ ކަމުގެ އުންމީދު ބޮޑު ކަމަށެވެ.

"މި ފަހަރު ޑިފެންޑިން ޗެމްޕިއަން ގޮތުގައި އެ ޓެގް ނެއްޓިފައި އޭނީ. އެހެންވީމަ ގަން ވީމަ އެ އިންނަ ތަންކޮޅު އިންނާނީ، އެކަމަކު، އަޅުގަނޑުމެން ޓީމަކަށް އެހާ ޕްރެޝަރެއް ނާންނާނެ. ޖުމްލަކޮށް މި އޮތް ސްކޮޑަށް ބަލާއިރު އަޅުގަނޑު ގަބޫލުކުރަނީ. މިދިޔަ އަހަރަށް ވުރެ ގަން ޓީމު ވަރުގަދަވާނެ،" އިއްސެ ބުންޏެވެ.

ގަން ވަނީ ގޯލްޑަން ފުޓްސަލް ޗެލެންޖުގެ ފައިނަލުގައި ތިން ފަހަރު ކުޅެ، އެއް ފަހަރު ތަށި ޙޯދައިފަ އެވެ. އަދި ޝީލްޑް ދެ ފަހަރު ކާމިޔާބުކޮށްފަ އެވެ. ގޯލްޑަންގައި ގަމުގެ ހުރިހާ ކާމިޔާބެއްގައި ކޯޗު އިއްސެގެ ދައުރު ބޮޑެވެ.