މިދިޔަ އަހަރުގެ ގޯލްޑަން ފުޓްސަލް ޗެލެންޖްގެ ޗެމްޕިއަން، ބ. އޭދަފުށި 1-0 އިން ބަލިކޮށް، ލ. ގަމުން ގޯލްޑަން ޗެރިޓީ ޝީލްޑް ދިފާއުކޮށްފި އެވެ.

މިއީ، ގޯލްޑަން ފުޓްސަލް ޗެލެންޖްގެ ޗެރިޓީ ޝީލްޑް މެޗު ކުރީގެ ދެ ޗެމްޕިއަނުންގެ މެދުގައި ކުޅޭ ގޮތަށް ފޯމެޓް ރޭވި ފަހުން ކުޅުނު ތިން ވަނަ ޝީލްޑް މެޗެެވެ. އެ ގޮތުން، އެންމެ ފުރަތަމަ 2023 ވަނަ އަހަރު ތ. ތިމަރަފުށި 3-2 އިން ބަލިކޮށް ކ. ގާފަރުން ޝީލްޑް ކާމިޔާބުކުރި އެވެ.

ދެ ވަނަ ފަހަރަށް މިދިޔަ އަހަރު ޝީލްޑް މެޗު ކުޅުނުއިރު، ތިމަރަފުށި އަތުން ގަން މޮޅުވީ 3-2 އިންނެވެ. އަދި މިދިޔަ އަހަރުގެ ގޯލްޑަން ފުޓްސަލް ޗެލެންޖް ފައިނަލުގައި، 4-2 އިން އޭދަފުށި އަތުން ބަލިވި މެޗުގެ ބަދަލުހިފައި ގަން މި ވަނީ ޗެރިޓީ ޝީލްޑް ދިފާއުކޮށްފަ އެވެ.

ރެހެންދި ފުޓްސަލް ދަނޑުގައި މިރޭ ކުޅުނު މެޗަށް ނުކުތްއިރު، ގަން ޓީމުގެ މުހިންމު ދެ ކުޅުންތެރިން ކަމަށްވާ ކެޕްޓަން، ހުސެއިން ޝަރީފް (އޮންލީ) އާއި އަލީ ޝާމިސް (ތޮއްޕޭ) ހުރީ އަނިޔާގަ އެވެ.

މިރޭގެ މެޗުގައި ލަނޑު ޖެހި ޖެންނޭ .ބޯޅަ ފޮނުވާލަނީ.--- ފޮޓޯ: އިމޭޖަސް.އެމްވީ

އަނެއްކޮޅުން މިދިޔަ އަހަރު އޭދަފުށްޓަށް ތަށި ހޯދައިދިން ޓީމުގެ ތިން ކުޅުންތެރިން ކަމަށްވާ އަލީ ފާސިރު (ސެންޓޭ)، ހައިޝަމް ހަސަން (ބިޑި) އަދި ހަމްޒާ މުހައްމަދު (ހަމްޕު) އަށް މާޒިޔާ ސްޕޯޓްސް އެންޑް ރެކްރިއޭޝަނުން ރިލީސް ދޭން އެއްބަސްނުވުމުން މި މެޗުގައި ނުކުޅެ އެވެ.

މުޅި މެޗުގައި ވެސް ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، ހަމައެކަނި ލަނޑު ޖެހީ ދެ ވަނަ ހާފުގައި ގަމުންނެވެ. ހިލޭ ޖެހުމަކުން އަހުމަދު ހަލީމް (އައްމަޑޭ) ދިން ބޯޅަ އަބްދުﷲ ޖުނައިދު (ޖެންނޭ) ވަނީ ގޯލަށް ފޮނުވާލައިފަ އެވެ. މި މެޗުގައި އޭދަފުށްޓަށް ލަނޑު ޖަހައިދޭން އެންމެ ރަނގަޅު ފުރުސަތު ލިބުނީ އަލީ ނަސީމް (އައްޔަ) އާއި މުހައްމަދު ފާސިރު (ފާއްޓޭ) އަށެވެ. އައްޔަ ފޮނުވާލި ބޯޅަ ހުރަސްދަނޑިމަތިން ދިޔައިރު، ފާއްޓޭ އަށް ލިބުނު ފުރުސަތުގައި ގަމުން ވަނީ ރަނގަޅަށް ޑިފެންސްކޮށްފަ އެވެ.

މިރޭގެ ޗެރިޓީ ޝީލްޑް މެޗުން، މޮޅުވި ގަމަށް ލިބުނު 25،000 ރުފިޔާ ވަނީ ފަލަސްތީނުގެ ގާޒާ ރައްޔިތުންނަށް ހަދިޔާކޮށްފަ އެވެ.

މި ފަހަރުގެ ގޯލްޑަން ފުޓްސަލް ޗެލެންޖް މުބާރާތް މާދަމާރޭ ފަށާއިރު، މި އަހަރުގެ މުބާރާތުގައި 129 ޓީމެއް ވާދަކުރެ އެވެ. މާދަމާރޭ އޮތީ ހއ. އާއި ހދ. ގެ މެޗުތަކެވެ.