ފޮރިން މިނިސްޓަރު ޑރ. އަބްދުﷲ ހަލީލް ރަސްމީ ދަތުރެއްގައި އިންޑިއާއަށް ރޭ ވަޑައިގެންފި އެވެ.

ހަލީލް "އެކްސް" ގައި ވިދާޅުވީ އިންޑިއާއަށް ކުރައްވާ ދަތުރަކީ އެ ގައުމުގެ އެކްސްޓާނަލް އެފެއާޒް މިނިސްޓަރު ސުބްރަމާނިއަމް ޖައިޝަންކަރުއާ ބައްދަލު ކުރެއްވުމަށް ކުރައްވާ ދަތުރުފުޅެއް ކަމަށެވެ.

އެ ދަތުރުފުޅުގައި ދެ ގައުމުގެ ރައްޔިތުންގެ ލާބައާއި މަންފާއަށް ދެ ގައުމުގެ ދެމެދުގައި އޮތް ގުޅުން އިތުރަށް ބަދަހި ކުރުމަށް މަޝްވަރާތަކެއް ކުރެވޭނެ ކަމަށް ހަލީލް ވިދާޅުވި އެވެ.

މިއީ މިދިޔަ އަހަރުގެ ސެޕްޓެމްބަރު 30، ގައި ފޮރިން މިނިސްޓަރުގެ މަގާމާ ހަލީލް ހަވާލުވެވަޑައިގެންނެވި ފަހުން ރަސްމީ ދަތުރުފުޅެއްގައި އިންޑިއާއަށް ވަޑައިގެންނެވި ފުރަތަމަ ފަހަރެވެ.

މިދިޔަ އަހަރު ފެށުނުއިރު ރާއްޖެ އާއި އިންްޑިއާއާ ދެމެދު އޮތް ގުޅުން ވަރަށް ބޮޑަށް ގޯސްވި އެވެ. ނަމަވެސް ފަހުން ދެ ގައުމުގެ ގުޅުން މަޑުމަޑުން ރަނގަޅުވި އެވެ.

ދެ ގައުމުގެ ގުޅުން އިތުރަށް ބަދަހިވީ ޖަޔަޝަންކަރު ރާއްޖެއަށް ކުރެއްވި ރަސްމީ ދަތުރުގެ އިތުރުން ރައީސް ޑރ. މުހައްމަދު މުއިއްޒު އިިންޑިއާއަށް ކުރެއްވި ރަސްމީ ދަތުރަށްފަހު އެވެ.