ގަލޮޅު ގެއަކުން ވަގަށް ނެގި ދެ މިލިއަނެއްހާ ރުފިޔާގެ ތަކެތި 24 ގަޑިއިރު ތެރޭގައި ފުލުހުން ހޯދައި، ވެރިފަރާތާއި ހަވާލު ކޮށްފި އެވެ.

ފުލުހުން ބުނީ އިއްޔެ ރިޕޯޓުކުރި އެ ވައްކަމުގެ ހާދިސާއާ ގުޅިގެން ތަކެތި ހޯދީ ގަލޮޅު ޕޮލިސް އިންވެސްޓިގޭޝަނާއި ރެސްޕޮންސް އެންޑް ޕެޓްރޯލް ގުޅިގެން ކުރި މަސައްކަތުން ކަމަށެވެ.

ފުލުހުން އާންމު ކޮށްފައިވާ ފޮޓޯތަކުން ފެންނަ ގޮތުގައި ވަގަށް ނެގި ތަކެތީގެ ގިނަ އަދަދެއްގެ އިލެކްޓްރޯނިކް ސާމާނާއި ބޭރު ފައިސާގެ އިތުރުން އެކި ކަހަލަ ގަހަނާތައް ވެސް ހިމެނެ އެވެ.

ވައްކަމުގެ އެ މައްސަލައާ ގުޅިގެން އެއްވެސް މީހަކު ހައްޔަރު ކުރި ކަމެއް އަދި އެ ތަކެތި ހޯދި ގޮތެއް މިހާތަނަށް ފުލުހުން ހާމަކޮށްފައެއް ނުވެ އެވެ.

މާލޭގައި ވައްކަމުގެ މައްސަލަތައް އިންތިހާއަށް ދަނީ އިތުރުވަމުންނެވެ. އެގޮތުން ކޮންމެ ދުވަހަކުހެން ވައްކަމުގެ މައްސަލަތަކުގައި އެތައް ބަޔަކު ހައްޔަރުކޮށް ބަންދުކުރެ އެވެ.