ދުންފަތުގެ ބާވަތެއް އުފެއްދުމަށް ބޭނުން ކުރާ އެއްވެސް އެއްޗެއް އެތެރެކޮށްފި ނަމަ އެ އެއްޗެއް އަތުލުމަށްފަހު ނައްތާލަން ހެލްތު މިނިސްޓްރީން މޯލްޑިވްސް ކަސްޓަމްސް ސާވިސް އަށް އަންގައިފި އެވެ.

ޑިސެމްބަރު 24، ގައި އެ މިނިސްޓްރީން ކޮމިޝަނާ ޖެނެރަލް އޮފް ކަސްޓަމްސް ފާތިމަތު ދިޔާނާއަށް ފޮނުވި ސިޓީއެއްގައި ބުނެފައި ވަނީ ދުންފަތް ކޮންޓްރޯލް ކުރުމާ ބެހޭ ގާނޫނުގެ ދަށުން ރާއްޖޭގައި އެއްވެސް ބާވަތެއްގެ ދުންފަތެއް އުފެއްދުމަކީ މަނާ ކަމެކެވެ.

"ވީމާ ދުންފަތުގެ ބާވަތެއް އުފެއްދުމަކީ މަނާކަމެއް ކަމުގައިވާތީ ދުންފަތުގެ އެއްވެސް ބާވަތެއް އުފެއްދުމަށް ބޭނުންކުރާ އެއްޗެއް ނުވަތަ އާލާތެއް އެއްވެސް ފަރާތަކުން އެތެރެކޮށްފި ނަމަ އެތަކެތި ހިފަހައްޓައި ނައްތާލުމަށް ދަންނަވަން،" އެ ސިޓީގައި ބުނެފައިވެ އެވެ.

ދުންފަތް ބޭނުން ކުރާ މީހުން މަދު ކުރުމަށް ކަމަށް ބުނެ ދުންފަތުން ނަގަމުން ދިޔަ ޓެކްސް ވެސް ސަރުކާރުން ވަނީ ބޮޑުކޮށްފަ އެވެ. މިހާރު ސިނގިރޭޓު ފޮށްޓެއް ރާއްޖޭގައި ލިބެނީ ގާތްގަނޑަކަށް 240ރ. އަށެވެ. ކުރިން ލިބުނީ 100ރ. އަށެވެ.

އޭގެ އިތުރުން ވޭޕް ކުރުން ވަނީ މުޅި ރާއްޖޭގައި މަނާކޮށްފަ އެވެ. އަދި ވޭޕްކޮށްފި ނަމަ ނުވަތަ އެއިން އެއްޗެއްގެ ވިޔަފާރިކޮށްފި ނަމަ ބޮޑެތި ޖޫރިމަނާތަކެއް ވަނީ ހިމަނައިފަ އެވެ. ވޭޕް ކުރާ މީހުން ޖޫރިމަނާ ކުރަނީ 5000ރ. އިންނެވެ. ވިޔަފާރިކޮށްފި ނަމަ ޖޫރިމަނާގެ އަދަދު ބޮޑުވެ އެވެ.