މިލާން (ޑިސެމްބަރު 31) - އޭސީ މިލާންގެ ކޯޗުކަމުން ޕައޮލޯ ފޮންސޭކާ ވަކިކޮށް އެ މަގާމަށް ސާޖިއޯ ކޮންސެސާއޯ ހަމަޖައްސައިފި އެވެ.

މީގެ ކުރިން، އިޓާލިއަން ލީގުގައި އިންޓަ މިލާން، ލާޒިއޯ އަދި ޕާމާ އަށް ކުޅުނު މިޑްފީލްޑަރު، ކޮންސެސާއޯ، 50، ވަނީ މިލާނާ އެކު، 18 މަސް ދުވަހުގެ ކޮންޓްރެކްޓެއްގައި ސޮއިކޮށްފަ އެވެ. މިދިޔަ ސީޒަނުގެ ނިޔަލަށް ޕޯޓޯގެ ކޯޗަކަށް ހުރި ކޮންސެސާއޯ އެ ޓީމާ ހަވާލުވެ ހޭދަކުރި ހަ އަހަރުގެ މުއްދަތުގެ ތެރޭގައި ވަނީ 11 ތަށި ހޯދައިފަ އެވެ.

ކޮންސެސާއޯގެ ކޯޗުކަމުގައި މިލާނުން ކުޅޭނެ ފުރަތަމަ މެޗަކީ އިޓާލިއަން ސުޕަ ކަޕް ސެމީ ފައިނަލް ފުރަތަމަ ލެގުގައި ޔުވެންޓަސްއާ ދެކޮޅަށް ޖެނުއަރީ ތިން ވަނަ ދުވަހު ނުކުންނަ މެޗެވެ. ކޮންސެސާއޯގެ ދަރިފުޅު، ފްރާންސިސްކޯ ކޮންސެސާއޯ ކުޅެމުން އަންނަނީ ޔުވެންޓަސް އަށެވެ.

ޔޫރަޕްގެ ޗެމްޕިއަންކަން ހަތް ފަހަރު ހޯދާފައިވާ މިލާނުގެ ކޯޗުކަމުން ފޮންސޭކާ ވަކިކުރީ އިޓާލިއަން ލީގުގައި އެންމެ ފަހުން ކުޅުނު މެޗުން ރޯމާއާ 1-1 އިން އެއްވަރުވި މެޗަށް ފަހު އެވެ. އެ ނަތީޖާއާ އެކު، މިލާން އޮތީ ލީގުގެ އަށް ވަނަ އަށް ވެއްޓިފަ އެވެ. އަދި ލީގުގެ ކުރީގައި އޮތް އެޓަލަންޓާ އާއި ނަޕޯލީ އަށް ވުރެ 14 ޕޮއިންޓް ފަހަތުގަ އެވެ.

މިލާނުގެ ކޯޗަކަށް ފޮންސޭކާ ހަަމަޖެއްސީ މިދިޔަ ޖޫން މަހު އެވެ. އެއީ ކުރިން އެ މަގާމުގައި ހުރި ސްޓެފާނޯ ޕިއޯލީ ވަކިކުރުމަށް ފަހު އެވެ. ޕިއޯލީގެ ކޯޗުކަމުގައި މިލާނުން ވަނީ 2022 ވަނަ އަހަރު އިޓާލިއަން ލީގުގެ ޗެމްޕިއަންކަން ހޯދައިފަ އެވެ. އެއީ، 11 އަހަރު ތެރޭ މިލާނަށް އިޓާލިއަން ލީގު ކާމިޔާބުކުރެވުނު ފުރަތަަމަ ފަހަރެވެ. މިދިޔަ ސީޒަނުގައި މިލާން ވަނީ ލީގުގެ ދެ ވަނަ ހޯދައިފަ އެވެ.