އިޒްރޭލުގެ ބަޔަކު އަލް އަގްސާ މިސްކިތަށް މިސްކިތަށް ވަދެގަތުން ރާއްޖެއިން ކުށްވެރިކޮށްފި އެވެ.

ފޮރިން މިނިސްޓްރީން ނެރުނު ނޫސް ބަޔާނެއްގައި ބުނީ އިޒްރޭލު ރައްޔިތުންގެ މި އަމަލަކީ ބައިނަލްއަގުވާމީ ގާނޫނުތަކާއި ހިލާފަށް ހިންގި އަމަލެއް ކަމަށެވެ.

އަލް އަގްސާ މިސްކިތަށް އިޒްރޭލު ރައްޔިތުން ވަދެ މިސްކިތުގެ ހުރުމަތް ކަނޑާލައި، އެތަނުގެ ތެރޭގައި ލަވަ ކިޔައި ނަށާ ހަދާފައިވެ އެވެ.

ތަކުރާރުކޮށް ހަމަނުޖެހުން ނަގާލައި ހިންގާ އެ އަމަލުތަކުގައި ސަބަބުން ފަލަސްތީނު މީހުންނާއި މުސްލިމުންގެ ދީނީ ހައްގަށް އަރައިގަންނަ ކަމަށް ވެސް ރާއްޖެއިން ބުންޏެވެ.

މީގެ ކުރިން ވެސް އަލް އަގްސާ މިސްކިތަށް އިޒްރޭލުގެ ރައްޔިތުންަގެ އިތުރުން އިޒްރޭލު ސިފައިން ވަދެ ހަމަލާތައް ވެސް ދީފައި އެބަހުއްޓެވެ. އެގޮތުން ކޮންމެ ރޯދަ މަހަކާ ދިމާކޮށް ކަހަލަ ގޮތަކަށް އެ މިސްކިތުގައި އިޒްރޭލުން ހަމަނުޖެހުން ހިންގާކަން ވެސް ފާހަގަކޮށްލެވެ އެވެ.

ރާއްޖެއިން ބުނީ ބައިނަލްއަގުވާމީ ފަރާތްތަކުން އިޒްރޭލުގެ އަމަލުތަކަށް އެ ގައުމު ޖަވާބުދާރީ ކުރުވައި، އަލް އަގްސާ މިސްކިތާއި ފަލަސްތީނުގެ ރައްޔިތުންނަށް ހިމާޔަތް ދޭން ޖެހޭ ކަމަށެވެ.

ރާއްޖެއިން ވަނީ ފަލަސްތީނަށް ލިބެން ޖެހޭ ހައްގުތައް ލިބި، ހަމަނުޖެހުންތަކަށް ދެމެހެއްޓެނިވި ހައްލެއް ގެނެވޭނީ، 1967 ގެ ކުރިން އޮތް ބޯޑަރުތަކުގެ މައްޗަށް ބިނާކޮށް، އިރުމަތީ ގުދުސްއަކީ ފަލަސްތީނުގެ ވެރިރަށެއްގެ ގޮތުގައި ކަނޑައަޅައި، ފަލަސްތީނުގެ މިނިވަން ދައުލަތެއް ގާއިމު ކުރެވިގެންކަން ފާހަގަކޮށްފަ އެވެ.