ޕެރިސް (ޑިސެމްބަރު 27) - އަންނަ މަހު ފަށާ އޮސްޓްރޭލިއަން އޯޕަން ޓެނިސް މުބާރާތުގައި ވާދަކުރަން، ދުނިޔޭގެ ކުރީގެ ޗެމްޕިއަން، ރުމޭނިއާގެ ސިމޯނާ ހަލެޕް އަށް ލިބުނު ވައިލްޑްކާޑްގެ ފުރުސަތުގެ ބޭނުން ނުހިފި އަނިޔާއާ ހެދި މުބާރާތުން ވަކިވާން ޖެހިއްޖެ އެވެ.

އެންމެ ފަހުން، 2022 ވަނަ އަހަރުގެ އޮސްޓްރޭލިއަން އޯޕަންގައި ވާދަކުރި ސިމޯނާ، 33، އަށް އަންނަ މަހު ފަށާ މުބާރާތުން ވައިލްޑްކާޑް ދޭން ނިންމީ މިދިޔަ ހަފްތާގަ އެވެ. އެކަމަކު، އަބޫ ދާބީގައި ކުރިއަށްދިޔަ، ވޯލްޑް ޓެނިސް އެކްސިބިޝަންގައި ކުޅުމަށް ފަހު، ކޮނޑާއި ކަކުލަށް އަނިޔާވެފައިވާތީ، އަންނަ މަހު 12 ވަނަ ދުވަހު ފަށާ އޮސްޓްރޭލިއަން އޯޕަން އިން ވަކިވާން ސިމޯނާ ނިންމީ އެވެ.

މީގެ ކުރިން، ފްރެންޗް އޯޕަން އާއި ވިމްބަލްޑަން ކާމިޔާބުކުރި ސިމޯނާ އަށް މި އަހަރު ވަނީ، މަނާބޭސް ބޭނުންކުރި މައްސަލައެއްގައި ހަތަރު އަހަރުގެ ސަސްޕެންޝަނެއް އަތުވެފަ އެވެ. އެކަމަކު، އެ ސަސްޕެންޝަނާ ދެކޮޅަށް އެޕީލް ކުރަން ލިބުނު މުއްދަތުގައި ސިމޯނާ ވަނީ ކޯޓް އޮފް އާބިޓްރޭޝަން ފޯ ސްޕޯޓްސް (ކާސް) އަށް ހުށަހަޅައިގެން އަދަބު ނުވަ މަހަށް ކުޑަކޮށްފަ އެވެ.

އޮސްޓްރޭލިއަން އޯޕަންގެ ފައިނަލުގައި 2018 ވަނަ އަހަރު ވާދަކުރި ސިމޯނާ މި ވަގުތު ދުނިޔޭގެ ރޭންކިންގައި އޮތީ 877 ވަނައިގަ އެެވެ. ސމޯނާ މިހާރު އަމާޒުހިފާފައިވަނީ، އުފަން ގައުމުގައި ފެބްރުއަރީ މަހު އޮންނަ އިވެންޓަކުން އަކުން ކުޅުމުގެ ތެރެއަށް އެނބުރި އައުމަށެވެ.