ރާއްޖޭގައި އެންމެ ޕްރޮފެޝަނަލްކޮށް ހިންގަމުން އަންނަ ބެޑްމިންޓަން ކްލަބް، ރިވައިވަލް ސްޕޯޓްސް ކްލަބްގެ ނައިބު ރައީސަކަށް ހުސެއިން ރައުޝާން ހަމަޖައްސައި، އެ ކްލަބުން އިއުލާނުކޮށްފި އެވެ.

ކެރަމް އެސޯސިއޭޝަން އޮފް މޯލްޑިވްސްގެ ޖެނެރަލް ސެކްރެޓަރީ ރައުޝާން ދާދި ފަހުން، ވަނީ، ކެރަމްގެ ދުނިޔޭގެ ޖަމިއްޔާ، އިންޓަނޭޝަނަލް ކެރަމް ފެޑެރޭޝަން (އައިސީއެފް)ގެ ނައިބު ރައީސްގެ މަގާމަށް އިންތިހާބުކޮށްފަ އެވެ.

ރިވައިވަލްއާ ގުޅުމާ ބެހޭގޮތުން، ރައުޝާން، "އަދަދު ސްޕޯޓްސް" އަށް ވިދާޅުވީ، އެންމެ ފުރަތަމަ ރިވައިވަލް ވުޖޫދުވެގެން އައިއިރު ވެސް އެ ކްލަބްގެ މަގާމެއްގައި ހުރެ ރަސްމީކޮށް މަސައްކަތްތަކާ އެކު ކުރިއަށް ދާން ފުރުސަތު ލިބިގެންދިޔަ ކަމަށެވެ.

އެހެން ނަަމަވެސް، އެއީ އޭނާ ކެރަމް އެސޯސިއޭޝަން ހިންގުމުގެ އެންމެ އިސް ޒިންމާއެއް ކަމަށްވާ ޖެނެރަލް ސެކްރެޓަރީގެ ގޮތުގައި ފުރަތަމަ ދައުުރުގެ ދުވަސްތައް ކަމަށްވާތީ، އޭރު ހުރިހާ ފޯކަސް އެއް ބެހެއްޓީ ކެރަމް އަށް ކަމަށް ރައުޝާން ވިދާޅުވި އެވެ.

އެކަމަކު، ކެރަމް އެސޯސިއޭޝަންގެ ކަންކަން މިހާރު ވަރަށް ރަނގަޅަށް މެނޭޖްކުރެވޭތީއާ އެކު، ރިވައިވަލް އިން ލިބުނު ހުށަހެޅުމަށް އެއްބަސްވެ، އެހެން ކުޅިވަރެއްގެ މަސައްކަތުގައި ވެސް "ޗެލެންޖެއް ނެގުމުގެ" ޝައުގުވެރިކަން އޮތުމުން ރައުޝާން ރިވައިވަލްއާ ގުޅުނީ އެވެ.

"ކްލަބް (ރިވައިވަލް) ހެދިގެން އައިއިރު ވެސް ދެއްކި، އެ ވާހަކަ، ކެރަމް އަށް އޭރު ފުލް ކޮމިޓްމަންޓް ހުރީމަ ނުވީ، މިހާރު ދެ ވަނަ ދައުރު ކެރަމްގައި، އެ ތަން ސްޓޭބަލް ވެފައި އެ އޮތީ، ކެރަމް އަސްލު އޭނީ އޮޓޯ އަށް ލެވިފައި، ކުރަން އައި ހުރިހާ ކަމެއް އެ ހުރީ ރަނގަޅަށް ކުރެެވެން،" ރައުޝާން ވިދާޅުވި އެވެ.

"މިހާރު ޓައިމް އެބައޮތް ރިވައިވަލް އަށް ވެސް ދޭން، އެހެންވެ، ކޮށްދެވެން އޮތް ކަމެއް ވީ އެންމެ ރަނގަޅަށް ކޮށްދޭން މި މަގާމަށް މިއައީ، ބޭނުންވީ އެހެން ޗެލެންޖެއް ވެސް ނަގަން އެހެން ކުޅިވަރުގެ ތެރެއިން، ރިވައިވަލް އަކީ ބެޑްމިންޓަންގައި ރާއްޖޭގެ އެންމެ އެކްޓިވް ކްލަބް،"

ކުރިން ކެރަމް ކުޅުމަށް ފަހު، އަމްޕަޔަރު ކަމުގައި ވެސް މަސައްކަތްކުރި ރައުޝާން، ކެރަމް އެސޯސިއޭޝަން ދުވަހުން ދުވަހަށް ހިންގުމުގެ އިސް ޒިންމާ ގުޅިފައި އޮތް ޖެނެރަލް ސެކްރެޓަރީގެ މަގާމާ އެންމެ ފުރަތަމަ ހަވާލުވީ 2019 ވަނަ އަހަރު އެވެ. އޭގެ ފަހުން، އޭނާ ކެރަމް އެސޯސިއޭޝަން ހިންގުމުގެ އިތުރުން، ބައިނަލްއަގުވާމީ ޖަމިއްޔާތަކާ އޮންނަ ގުޅުން ވަރުގަދަކުރި އެވެ.

ރިވައިވަލް އިން ދެކޭ ގޮތުގައި، ރައުޝާން، އެ ކްލަބްގެ ހިންގާ ކޮމިޓީގެ މަގާމަކަށް އައުމަކީ އިތުރަށް ކަންކަން ރަނގަޅުކުރުމަށް ލިބިގެންދިޔަ ފުރުސަތެކެވެ.