މޯލްޑިވްސް އިމިގްރޭޝަނުން މިއަދު މާލޭ ލޯކަލް މާރުކޭޓް ސަރަހައްދުގައި ހިންގި ރެއިޑް އޮޕަރޭޝަނެއްގައި ގަވާއިދާ ހިލާފަށް އުޅުނު 23 ބިދޭސީން އެ މުއައްސަސާގެ ބެލުމުގެ ދަށަށް ގެންގޮސްފި އެވެ.

އިމިގްރޭޝަނުން ބުނީ އިމިގްރޭޝަން ވޮޗްއަށް ލިބުނު މައުލޫމާތަކާއި ގުޅިގެން މިއަދު ފަތިހުން ފެށިގެން މެންދުރާއި ހަމައަށް ކުރިއަށް ގެންދިޔަ ރެއިޑް އޮޕަރޭޝަނުގައި 148 ބިދޭސީން ބަލައި ފާސްކޮށް، ގަވާއިދާ ހިލާފަށް އުޅުނު 22 ފިރިހެނުންނާއި އެއް އަންހެނަކު ބެލުމުގެ ދަށަށް ގެނެސްފައި ކަމަށެވެ.

"މި ރެއިޑު އޮޕަރޭޝަންގައި އެ ސަރަހައްދުގައި އަޅާފައިވާ އުޅަނދުފަހަރާއި، އެ ސަރަހައްދުން ލަފާ/ފުރާ އުޅަނދުފަހަރު ވެސް ބަލައި ފާސްކޮށްފައިވޭ،" އިމިގްރޭޝަނުން ބުންޏެވެ

ހުޅުމާލޭގެ ފޭސް 1 އަދި 2 ގެ އެކި ސަރަހައްދުތަކުގައި ގަވާއިދާ ހިލާފަށް ވެހިކަލް ދޮވެ ސާފުކުރުމުގެ މަސައްކަތް ކުރަމުންދާ ބިދޭސީންނަށް އަމާޒުކޮށް އިއްޔެ ހިންގި އޮޕަރޭޝަނެއްގައި އަށް ބިދޭސީއަކު އިމިގްރޭޝަނުން ވަނީ އަތުލައިގަނެފަ އެވެ.

މީގެ ކުރިން ވެސް އިމިގްރޭޝަނުން ލޯކަލް މާރުކޭޓް ސަރަހައްދުގައި ރެއިޑް އޮޕަރޭޝަންތައް ކުރިއަށް ގެންގޮސް، ގަވާއިދާ ހިލާފަށް އުޅޭ ބިދޭސީން އަތުލައިގަނެފަ އެވެ.

އިމިގްރޭޝަނުން އަންނަނީ ރާއްޖޭގައި ގަވާއިދާ ހިލާފަށް އުޅޭ ބިދޭސީން އުޅޭ ތަންތަން ފާހަގަކޮށް، އެ ބިދޭސީން އިމިގްރޭޝަންގެ ބެލުމުގެ ދަށަށް ގެނައުމަށްފަހު ޑީޕޯޓް ކުރަމުންނެވެ.