މިހާރު ކުރިއަށްދާ "އޭޓީއެފް މޯލްޑިވްސް ޖޫނިއާ އޯޕަން" ދެ ވަނަ މުބާރާތުގެ 16 އަހަރުން ދަށުގެ އަންހެން ސިންގަލްސް ބައިން، އާރާ އާސާލް އާޒިމް ޖާގަ ހޯދައިފި އެވެ.

އާރާ ވަނީ މީގެ ކުރިން، މި މަހު ބޭއްވި އޭޓީއެފް މޯލްޑިވްސް އޯޕަން މުބާރާތުގެ އަންހެން ސިންގަލްސް ޗެމްޕިއަންކަމާއި އަންހެން ޑަބަލްސް ޗެމްޕިއަންކަން ހޯދައިފަ އެވެ.

މާލޭ ޓެނިސް ކޯޓުގައި ކުރިއަށްދާ މި މުބާރާތުގައި، އޭޓީއެފް ޖޫނިއާ އޯޕަންގެ ސެމީ ފައިނަލުގައި އާރާ މިއަދު ނުކުތީ ރާއްޖޭގެ އައިޝަތު ކެރިން ސައިޒާންއާ ދެކޮޅަށެވެ. އާރާ މި މެޗުން މޮޅުވީ، 6-2، 6-1 އިންނެވެ. މާދަމާ ކުޅޭ ފައިނަލް މެޗުގައި އާރާއާ ދެކޮޅަށް ނުކުންނާނީ ހޮންގް ކޮންގްގެ ހުއި ލަމް އެލާ ވޯންގް އެވެ. އޭނާ ވަނީ ސެމީ ފައިނަލްގައި، ކަޒަކްސްތާންގެ އަރްޒާން ބަޔަލީނާ އަތުން 6-3، 6-4 އިން މޮޅުވެފަ އެވެ.

ފައިނަލް މެޗުގައި، އާރާ އާއި އެލާ ވޯންގް ބައްދަލުކުރާއިރު، ތިން ވަނަ ހޮވާ މެޗުގައި، ކެރިން ކުޅޭނީ އަރްޒާންއާ ދެކޮޅަށެވެ.

މުބާރާތުގެ ފިރިހެން ސިންގަލްސްގެ ފައިނަލުގައި ސްރީ ލަންކާގެ ދެ ކުޅުންތެރިންނެވެ. އެއީ، ކުބެރާނޭ މަޔޫރާން އާއި އަޝްލިން ޑި ސިލްވާ އެވެ.

އަންހެން ޑަބަލްސް ފައިނަލުގައި، ރާއްޖޭގެ އައިޝަތު ލިވިއާ ކަތީރު އާއި ނީމް އަހުމަދު ސަލީމްގެ ޕެއާ ބައްދަލުކުރާނީ ކަޒަކްސްތާންގެ އަރްޒާން އާއި ރާއްޖޭގެ ކެރިންގެ ޕެއާއާ އެވެ.