މާލޭގައި ހަރަކާތްތެރިވާ ގޭންގުތަކުން ބޮޑެތި ކުށްތަކަށް އަރައިގަނެ، އިންތިޒާމުވެގެން ކުށްކުރަމުންދާ މައްސަލަތައް ގިނަވަމުން އަންނަ ކަމަށް ތަފާސްހިސާބުތަކުން ދެއްކި ނަމަވެސް މާލޭގައި ހަރަކާތްތެރިވާ ގޭންގުތަކުގެ ލިސްޓެއް ނުގެންގުޅޭ ކަމަށް ފުލުހުން ބުނެފި އެވެ.

މާލޭ ސަރަހައްދުގައި ހަރަކާތްތެރިވާ ގޭންގުތަކުގެ ލިސްޓަކާއި ގޭންގުތަކުގައި ހަރަކާތްތެރިވާ މެންބަރުން ނުވަތަ މީހުންގެ އަދަދު ހޯދުމަށް މި ނޫހުން ހުށަހެޅި އާރުޓީއައި ރިކުއެސްޓަކަށް ދިން ޖަވާބުގައި ފުލުހުން ބުނީ އެފަދަ ލިސްޓެެއް އެ ހިދުމަތުން ބަލަހައްޓަމުން ނުދާ ކަމަށެވެ.

"ގާނޫނީގޮތުން މިހާތަނަށް ގޭންގުތަކެއް ކަނޑައެޅި ލިސްޓު ކުރެވިގެން އެފަދަ ލިސްޓެއް ބަލަހައްޓަމުން ނުގެންދެވޭ،" ލިޔުމުން ފޮނުވި ޖަވާބުގައި ބުނެފައިވެ އެވެ.

ފުލުހުން މިހެން ބުނިއިރު، ކުރީގެ ކޮމިޝަނާ އޮފް ޕޮލިސް މުހައްމަދު ހަމީދު (އެމްސީ ހަމީދު) ވަނީ "ވިއަވަތި ރާއްޖޭގައި" މާލޭގައި ހަރަކާތްތެރިވާ ގޭންގުތަކުގެ އަދަދާއި ހަރަކާތްތެރި ގޭންގުތަކާއި އެ ގޭންގުތަކުގައި އުޅޭ މީހުންގެ އަދަދާއި އޭގެތެރޭގައި ހިމެނޭ ކުޑަކުދިންގެ އަދަދުތައް ވިދާޅުވެފަ އެވެ.

އެމްސީ ހަމީދު އެ ދުވަހު ވިދާޅުވީ 90ގެ އަހަރުތަކުން ފެށިގެން މިހާތަނަށް މާލޭގައި 44 ގޭންގެއްގައި 2,600 މީހުން އުޅެމުންދާކަން ފާހަގަކުރެވިފާ ކަމަށެވެ. އޭގެ ތެރެއިން 10 ގޭންގެއް ވަރަށް ހަރަކާތްތެރިކޮށް, ކުށްތަކަށް އަރައިގަތުމުގައި އުޅޭކަން ފާހަގަވާ ކަމާއި އެ ގޭންގުތަކުގައި 1,300 މީހުން އުޅެމުންދާކަމަށް ވެސް އޭނާ ބުންޏެވެ.

ގޭންގުތަކުގެ ލިސްޓެއް ނުގެންގުޅޭ ތަނުގައި، ގޭންގު ކުށްތަކުގެ ގޮތުގައި ކަނޑައެޅިގެން އެއްވެސް މައްސަލައެއް ނުބަލާ ކަމަށް ވެސް ފުލުހުން ބުންޏެވެ. އޭގެ ބަދަލުގައި ގޭންގުތަކުން ނުވަތަ ފުލުހުން ބުނާ ގޮތަށް "ގްރޫޕުތަކުން" ހިންގާ ނުރައްކާތެރި ކުށްތައް ގިންތިކުރަނީ ގުރޫޕު މާރާމާރީގެ ދަށުން ކަމަށް އެ ހިދުމަތުން ބުންޏެވެ. މި ކުށްތަކުގެ ތަފާސްހިސާބުތައް ވެސް ފުލުހުން ހިއްސާކުރި އެވެ.

އެ ގޮތުން ވޭތުވެދިޔަ ދިހަ އަހަރުގެ ތެރޭގައި، އެއީ 2014 އިން މި އަހަރުގެ މައުލޫމާތު ދިން މުއްދަތާ ހަމައަށް، ގުރޫޕު ހަދައިގެން ހިންގާފައިވާ ކުށްތަކުގެ އަދަދާއި އެފަދަ މައްސަލަތަކުގައި ދައުވާކުރަން ފޮނުވި އަދަދުތައް ފުލުހުން ވަނީ ހިއްސާކޮށްފަ އެވެ. މީގެ ތެރޭގައި ހިމެނެނީ ގްރޫޕު ހަދައިގެން ހަތިޔާރު ބޭނުންކޮށްގެން އަދި ނުކޮށް ހިންގި މާރާމާރީތަކާއި މަރުތަކެވެ.

ފުލުހުން ހިއްސާކުރި އަދަދުތަކުން ދައްކާ ގޮތުގައި މި އަހަރުގެ ތެރޭގައި އެކަނި ވެސް ގޭންގުތަކުން 55 މާރާމާރީއެއްގެ މައްސަލައެއް ފުލުހުންނަށް ހުށަހެޅުނެވެ. މީގެ ތެރެއިން ދައުވާކުރަން ފޮނުވުނީ އެންމެ ނުވަ މައްސަލަ އެވެ. ގޭންގުތަކާ ގުޅުންހުރި މަރުގެ މައްސަލައެއް މި އަހަރު ހިނގާފައިވާ ކަމަކަށް ފުލުހުން ނުބުނެ އެވެ.

މާލޭގައި މިހާރު ވެސް ދަނީ ގޭންގުތަކުގެ މެދުގައި މާރާމާރީތަކެއް ހިންގަމުންނެވެ. އެގޮތުން ރޭވެސް ތިން ސަރަހައްދެއްގައި ގޭންގުތަކުގެ މެދުގައި މާރާމާރީތަކެއް ހިނގި އެވެ.

ގޭންގުތައް ހުއްޓުވުމުގައި ގާނޫނީ ހުރަސްތަކެއް ހުރި ކަމަށް ބުނެ ސަރުކާރުން މިހާރު ވަނީ ގޭންގުތަށް ހުއްޓުވުމަށް އާ ބިލެއް މަޖިލީހަށް ފޮނުވާފަ އެވެ. އެ ބިލުގައި ބޮޑެތި ޖަލު އަދަބުތަކާއި ޖޫރިމަނާތަކެއް ކުރަން ހުށަހަޅާފައިވެ އެވެ.