ނައިންޓީ ޕްލަސް ގޯލްޑް ކަޕްގެ ދެ ވަނަ ބުރުގެ ގްރޫޕް ސްޓޭޖުގައި ރޭ ކުރެންދޫން އަތުން 1-0 އިން މޮޅުވެ މާލެ ސިޓީން މުބާރާތުގެ ކުއާޓާ ފައިނަލުން ޖާގަ ހޯދައިފި އެވެ.

މި ނަތީޖާއާ އެކު، ކުރެންދޫ ކަޓައި، އަލިފުށްޓަށް ވެސް ވަނީ ކުއާޓާގެ ޖާގަ ޔަގީންވެފަ އެވެ. މި ގްރޫޕްގައި ދެން އޮތީ އަލިފުށްޓާއި މާލެ ސިޓީ ބައްދަލުކުރާ މެޗެވެ. އެއީ ގްރޫޕްގެ އެއް ވަނަ ކަނޑައަޅާނެ މެޗެވެ. ކުއާޓާ ފައިނަލުގެ ޖާގަ ދެން ހޯދި ދެ ޓީމަކީ، ކ. ގުރައިދޫ އާއި ޅ. ނައިފަރު އެވެ.

ގަލޮޅު ދަނޑުގައި ރޭ ކުޅުނު މެޗުގެ ފުރަތަމަ ހާފުގައި މާލެ ސިޓީން ފޮނުވާލި ގިނަ ހަމަލާތަކެއް ކުރެންދޫ ގޯލު ބެލެހެއްޓި ސްރީ ލަންކާ ގައުމީ ޓީމުގެ ކީޕަރު ސުޖަން ޕެރޭރާ ވަނީ މަތަކޮށްފަ އެެވެ. ކައުންޓަ އެޓޭކުގައި ކުރެންދޫން ވެސް ލަނޑެއް ޖެހޭތޯ އެޓޭކްތަކެއް ކުރި ނަމަވެސް، މާލެ ސިޓީ ޓީމުގެ ގޯލުގައި ހުރި ތަޖުރިބާކާރު ކީޕަރު، ތޮލާލް ހަސަން (ޓޮޕްލަކް) ވަނީ އެ ބޯޅަތައް ހުއްޓުވައިފަ އެވެ.

މެޗުގައި ފެނިގެންދިޔަ ހަމައެކަނި ލަނޑު ދެ ވަނަ ހާފުގައި ޖެހީ، 53 ވަނަ މިނިޓްގައި މުހައްމަދު ޔަޒްދާން ހުސެއިން (ޔަޒޭ) އެވެ. މާލެ ސިޓީގެ ފުލްބެކް، އަހުމަދު މާއިޝް ރަޝީދު (މާއި) ނެގި ހުރަހަކަށް އަރައި، ޔަޒޭ ފޮނުވާލި ބޯޅަ ގޯލަށް ވަނީ ކީޕަރު ސުޖަން އަތުގައި ޖެހި ދަނޑީގައި ވެސް ޖެހިފަ އެވެ. މާއި އާއި ޔަޒޭ އަދި ސުޖަން އަކީ ފުރަތަމަ ޑިވިޝަންގައި އެކުގައި ޓީސީ ސްޕޯޓްސް ކްލަބަށް ކުޅުނު ކުޅުންތެރިންނެވެ.

މި މެޗުގައި މާލެ ސިޓީގެ ކެޕްޓަން، އަބްދުﷲ މުއާޒް (އޮޓޯ) ބޮލުން ފޮނުވާލި ބޯޅައެއް ވަނީ ދަނޑީގައި ވެސް ޖެހިފަ އެވެ.

ކުރެންދޫ ޓީމުގެ އަބްދުލްވާހިދު އިބްރާހިމް (ވާޑު) ފޮނުވާލި ޝޮޓެއް ވަނީ ދަނޑިކައިރިން ވެސް ގޮސްފަ އެވެ.